15. التحيز
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
موضوع حلقتنا الإسبوع ده عن التحيز أو الانحياز بشكل عام ، واللي درس علم نفس هيبقى فاهم احنا بنتكلم على ايه ولكن احنا هدفنا ديماً تبسيط المعلومة بشكل يفيدنا في المجال المالي
الانحياز بيحصل غالباً وقت إتخاذ القرار ، لأن الناس ديماً بتتأثر بتحيز معين أو بفكرة معينة بتبقى قريبة لشخصيتها أو مقتنعة بيها أو أتربيت عليها
: بنتكلم في الحلقة على أكتر 7 تحيزات بيأثروا في البدايات
01:44 تحيز النفور من الخسارة (الهروب من الخسارة) -
04:35 تحيز الوضع الراهن -
06:20 تحيز التأكيد (التحيز الذاتي) -
07:55 تحيز أثر عربة الفرقة الموسيقية (عقلية القطيع) -
10:04 تحيز فترة الأهتمام المحدودة -
12:03 تحيز الترسيخ -
14:26 تحيز الثقة المفرطة -
النصيحة الأخير 19:24 -
الخوف ، القلق .. كل دي مسميات لمشاعر بنحسها وبتمنعنا إن أحنا نبدأ ، خليك عارف إن أنت بتاخد مخاطر في الحياة أكبر بكتير من أنك تستثمر بس أنت مش واخد بالك. ابدأ والخطوات الصغيرة البسيطة اللي فالأول هي المهمة
هدفنا في بودكاست كلام ينور إن الناس اللي عمرها ما أبتدت تبدأ ، لأن كل ما تبدأ بدري كل ما الموضوع هيبقى أسهل عليك قدام في إن أنت تستثمر وتحقق الأهداف والنتائج بتاعتك
اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلاً بيكوا في حلقة جديدة من بودكاست كلام ينور
النهاردة احنا هنتكلم عن موضوع التحيزات أو التحيز بشكل عام ، المهتم أوي بعلم النفس ودرس علم نفس هيبقى فاهم احنا بنتكلم على ايه أكتر ولكن احنا بنحاول نبسط المعلومات دي بشكل يفيدنا ازاي ممكن نستخدمة في الحياة المالية بشكل عام
هنلاقي إن الناس كلها ديماً بالذات في إتخاذ القرار بتتأثر ديماً بتتحيز معين أو بفكرة معينة بتبقى قريبة لشخصيتك أو أنت مقتنع بيها أو أتربيت عليها في الخلفية بتاعك ممكن أسباب كتير جداً تبقى مخلية عندك التحيز ده
أحنا النهاردة هنناقش بعض المفاهيم ومع الوقت برده ممكن نكتشف حاجات تانية ونتكلم فيها في حلقات آخرى
01:44
Loss Aversion Bias تحيز النفور من الخسارة
هنبتدي بأول نوع من أنواع التحيزات وهو تحيز النفور من الخسارة أو البعد عن الخسارة ده أول نوع من أنواع التحيز وده أكتر نوع أحنا بنشوفها بتأثر على نفسية الناس في إتخاذ القرار بمعنى إن أنا هاجي أقولك تعالى أستثمر في الأسهم ، أول حاجه هتجيلك في دماغك لما أقولك تعالى أستثمر في الأسهم هي الأسهم فيها خسارة فإجابتك المبدأية لأ ياعم أنا مش عايز أخسر حاجه ، مش عايز أخسر فلوس
طيب أنت هنا مفكرتش بالعقل أنت من غير ما تسمع أي حاجه بعد الموضوع ده بس عشان بس عرفت إنها حاجه فيها أحتمالية الخسارة ، إيه اللي حصل في دماغك؟ حصل قفلة زي قفلة الكهربا كده ، أنت أول ما سمعت عن الأسهم ربطتها بالخسارة يبقى أنت عاطفياً قرارك اتأثر من غير ما تعرف النتائج اللي ممكن تحصل بس علشان الحاجة فيها خسارة ، وده تحيز اسمه النفور من الخسارة ، إن أنت بتهرب من الخسارة ، بتنفور من الخسارة
طيب ده بيحصل ليه؟ ممكن يكون المخ متركب إن أنت عندك نوع من أنواع الخوف ، فأي حاجه ليها علاقة بالخوف ممكن تبقى ليها علاقة بالنجاة أو البقاء أو إن أنت تهرب من المشكلة فالمخ يقول لأ خلاص أنا مش هعملها على طول
وده أول نوع من أنواع التحيزات ولكن أنت في طبيعة الأمر وذكرنا المعلومة دي في الحلقة رقم 10 ، إن أنت ممكن تكون بتعمل حاجات وقرارات أنت شايفها مفهاش أي خسارة ولكن هي فيها خسارة أعلى بكتير زي مثلاً إنك تروح تشارك واحد صاحبك في مشروع ، فرص الخسارة هنا أعلى بكتير عن أنك تستثمر في الأسهم بس أنت مش شايفها لو قعدنا إحصائياً هتلاقي فرص أنك تعمل فلوس في الأسهم هي أعلى بكتير من انك تشارك واحد صاحبك
إن أنت تروح تشتري سلعة إستهلاكية ، أنت لو أشتريت قميص أو إنتي أشتريتي فستان أو أي حاجة إستهلاكية أنت وأنت خارج من المحل أنت خسران 50% على طول ، لأن اللبس المستعمل بيفقد على الأقل 50% لو خرجت بيه من المحل مثلاً يعني ، أنت هنا في خسارة بس أنت مش حاسس بيها ولا شايفها وده أول مفهوم لازم أكون فاهم إنه ممكن يأثر على الوضع بتاعي
04:35
Status Quo Bias تحيز الوضع الراهن
تاني تحيز هنتكلم عليه النهاردة هو تحيز الوضع الراهن اللي هو أنا مش عايز أغير الوضع الراهن ، أنا عندي فلوس في البنك ، عندي حتة أرض ، عندي بيت ، أنا مش عايز أغير الحاجة دي ، أنا عندي تحيز من عدم التغيير أنا ضد التغيير ، أنا خايف أغير ده برده بيمنعك إن أنت تستثمر
ده تحيز عاطفي دي أحاسيسيك أنت للوضع ولكن لو أتكلمت مع حد خبير استثماري مش ديماً محفظتك ممكن تكون في أحسن وضع ، يعني في أوقات أنت لازم تغيرها ، أنت مثلا مستثمر في ودائع في البنك ، وحصلت في 2016 مثلا في دولة زي مصر وجالك تعويم في العملة وأنت شايف عندك علامات واضحة للتعويم كراجل إقتصادي بتبص في السوق ، فأنت لو قعدت على الوضع الراهن أنت ممكن تخسر 50 / 60 / 70 % من القوة الشرائية بتاعة الجنية بتاعك ، ليه؟ لأن هيحصل تعويم
ولكن كان المفروض يحصل إيه في حالة زي دي لما بتحس بالخطورة بتغير شكل محفظك ممكن تروح تشتري أصل ، أو تغير تشكيل محفظتك بس إيه اللي منعك تعمل حاجه زي كده ؟ ممكن يكون التحيز للوضع الراهن ، إن أنت خايف من التغير. وده النوع التاني من التحيزات اللي بتأثر على نفسيتك وتخليك متتحركش
06:20
Confirmation Bias تحيز التأكيد
في نوع من أنواع التحيز اسمه تحيز التأكيد أو التحيز الذاتي ، إن أنت بتروح تدور على معلومات بس علشان تأكد وجهة نظرك ، يعني إفتراضاً أنت داخل تعمل بحث على جوجل على حاجة معينة بتقول مثلاً الاستثمار العقاري في دولة (أ) أحسن من دولة (ب) هتروح تدور على كل المعلومات أونلاين أو هتسأل أصحابك وهتاخد بس المعلومات اللي بتأكد وجهة نظرك وتحاول تبيعها لنفسك أو تحاول تأكد أفكارك لنفسك بالمعلومات ، ده نوع مشهور جداً جداً من التحيزات اللي بيأثر ديماً على القرارات الاستثمارية إن أنت مبتخدش وجهة النظر الأصوب بناءاً على العلم أو بناءاً على الناس المحترفين لأ أنت بتروح تقول أحسن حاجه في الدنيا هي دي وبتروح تدور على معلومات تأكد وجهة نظرك ، وده تحيز كبير بشوفه ديماً الناس المتعاملين في الأسهم وفي حاجات تانية ليها علاقة بالاستثمار
خلي بالك متدورش على المعلومات اللي أنت المفروض تأكد وجهة نظرك ولو حسيت أن أنت أبتديت تخش في التحيز ده حاول تقرأ الرأي الأخر ، الرأي العكسي تماماً ، ازاي ممكن ترفض الفرصة الاسثمارية دي الناس اللي بتهاجم الفرصة الاستثمارية دي بتهاجمها ليه
07:55
The Bandwagon Effect تحيز أثر عربة الفرقة الموسيقية (عقلية القطيع)
رابع نوع من أنواع التحيزات اللي هنتكلم عليه النهاردة هو تحيز اسمه أثر عربة الفرقة الموسيقية أو عقلية القطيع بمعنى اللي هو كل الناس بتنط على العربية اللي بتجري ، اللي هو احنا شايفين حاجه هي دي النهاردة أحسن حاجه في الدنيا فالناس كلها بتجري تشتريها ، اللي هو أنا عاوز أركب على الحاجة اللي أنا متخيل أن كل الناس بتجري عليها
زي ما بتبقى ماشي فالشارع وتلاقي حته زحمة طابور طويل في الشارع على مثلاً مطعم فممكن تروح تقف في الطابور لوحدك عادي مش مهم تعرف إيه اللي بيبعوه جوه ، ده نوع من أنواع التحيز
في سوق الاستثمار نفسه أو في الأسهم بنشوفها ازاي! إن مثلاً في سهم عمال يطلع يطلع يطلع والناس مش فاهمة بيطلع ليه بس أنت غصب عنك بيجيلك نورع من أنواع التحيز أنك تجري ورا الطلوع ده وتروح تشترية علشان بس هو بيطلع ، ولكن ده ممكن يكون مخالف تماما للخطة الاستثمارية بتاعتك أنت مثلاً مبتشتريش نوع معين من الشركات والشركة دي بس علشان بتجري أنت دخلت أشتريتها لكن هي أصلاً مبتعملش اللي أنت عاوزة
وده نوع غلط جداً بنشوفه في التحيز وده بيبقى مصاحبة حاجة اسمها الخوف ضياع الفرصة أو من إن يفوتك حاجة ، فخلي بالكم برده إن أنت لازم لازم يكون ليك خطة استثمارية وعندك خطة لعب أهم من أنك تجري ورا الحاجات اللي بس بتحصل في الحياة
10:04
Limited Attention Span تحيز فترة الأهتمام المحدودة
النوع الخامس اللي هنتكلم عليه برده إن أنت عندك فترة اهتمام محدودة عند كل واحد فالأهتمام المحدود ده بيخليني مقدرش أدور على كل وأحسن وأجمل وأحلى الأفكار اللي موجودة في الحياة وأنا بستثمر ، كل واحد عنده وقت معين عاوز يحطه بس علشان أنت راجل عندك شغلك الصبح أنت راجل دكتور أنت راجل مهندس ، أنت راجل فنان أيا كان مجالك يعني أنت معندكش وقت أنك تدور في كل الفرص الاستثمارية الجميلة العظيمة اللي هتطلع 10 آلاف في المية فأنت عندك وقت محدود فأنت تروح تبص تلاقي معلومات كتيره أوي في الأسهم ، معلومات كتير أوي في البيوت ، في الأراضي ، في مختلف الحاجات الاستثمارية فتقول إيه ده أنا تعبت من التفكير فيحصلك قفلة في مخك ، انا مش قادر أشتري مش قادر لأن معلومات كتير أوي أنا أتلخبطت مفهمتش أعمل إيه
فالتحيز ده نرجع ونقول أنت لازم تبسط الموضوع ، أنت لو عاوز تشتري أسهم مش لازم تشتري شركات بعينها أنت ممكن تشتري صندوق استثمار ، لو مش عارف تستثمر في بيوت ممكن تشتري صندوق بيستثمر في العقارات صندوق عقاري مثلاً ، لو عاوز تشتري سندات ومش عارف معلومات كتير وسندات كتير روح اشتري صندوق برده
يعني قصدي تحاول تتغلب على الوضع ده بإن أنت متبزلش مجهود كبير علشان تعمل نفس الحاجة في الأخر
12:03
Anchoring Bias تحيز الترسيخ
التحيز رقم 6 حاجة اسمها تحيز الترسيخ مكان ما ابتديت ، يعني انا اشتريت سهم بـ 100 والسهم ده بقى بـ 150 ، أنا ديماً بقارن سعر الـ 150 بالسعر اللي أنا أشتريت بيه اللي هو 100 ، طيب وهو أنا أشتريت بـ 100 ليه؟ لأن حصل إن اليوم اللي دخلت أشتريت فيه كان بـ 100 ، لكن هل له علاقة بقرارك في الخروج أو الدخول من الاستثمار؟ المفروض لأ ، بس اللي بنشوفه إن الناس بتتحيز للمكان اللي أشترت فيه الحاجة ، يعني أشتريت بيت بـمليون للتسهيل بعيداً عن البورصة والأسهم ، أشتريت بيت بمليون أنا مش هبيع البيت ده إلا لو بميلون و100 ، طيب البيت ده قعد بمليون 10 سنين مبيطلعش وأنا شايف فرص استثمارية في بيوت تانية كل شوية بتظهر الحاجه الفولانية دي بتطلع المفروض نروح نشتري فيها ، أو مثلاً حد جه قالي المكان ده استثماراتة هتبقى أحسن من المكان اللي أنا فيه ، لأ أنا مش هبيع بيتي إلا بمليون و100 طب حضرتك الحاجة التانية دي طلعت من مليون بقت بمليون و200 وحضرتك لسه بمليون وبعدين بيعنا البيت التاني واخدنا حاجه تانية بمليون و200 بقت بمليون و400 وحضرتك لسه قاعد في البيت الأولاني بمليون ليه؟ علشان أنت عندك تحيز لسعر الدخول بتاعك ولكن أنا كمستثمر المفروض أعمل إيه؟ الصح لو أنا شايف إن في زيادة في المستقبل في الحاجة اللي أنا فيها أفضل قاعد فيها ، ولو مش شايف إن أنا عندي فرصة في الزيادة في الحاجة اللي أنا قاعد فيها المفروض أخرج ده ملهوش علاقة بسعر التكلفة بتاعي ، سعر التكلفة ده رقم محاسبي في دماغي أنا الوحيد اللي عارفة ، السوق نفسه مش عارفه ، محدش عارف إن عمر أشترى البيت ده بمليون ومحدش فارق معاه إن عمر أشتري البيت ده بمليون
فأحنا كمستثمرين المفروض نعمل إيه؟ نشوف العوائد المستقبلية من الحاجة اللي أنا شاريها أهم من التكلفة اللي أنا اشتريت بيها ، التكلفة ملهاش أي معنى
14:26
Overconfidence Bias تحيز الثقة المفرطة
التحيز اللي بعد كده هو تحيز الثقة المفرطة وده بنشوفه ممكن في الناس المحترفين في استثمار معين مثلاً أنا راجل محترف وفاهم ليه وبقول كلام كويس وتوقعاتي مبتخيبش اللي هو أنا ديماً صح ، السوق هو اللي غلط ، أو أكيد أكيد أكيد اللي بقوله ده هيحصل بس مش دلوقتي ، دي بنشوفها في الناس المحترفين طبعاً وبنشوفها في حد مثلاً عنده مجموعة من الاستثمارات الناجحة عملهم مثلاً بالحظ ، أنا دخلت في الشركة الفولانية وبعدين كسبت
وبعدين خرجت وأشتريت حتة أرض وعملت فلوس ، فأنا عندي مجموعة من القرارات ورا بعض ناجحة عملتلي ثقة مفرطة ، وده تحيز كبير ومهم في الحالتين هو مدمر لأن أنت بعد شوية بتحس إن الموضوع سهل ولكن هو عمره ما كان سهل
زي ما علمونا وأحنا صغيرين لما تنزل البحر ، مفيش حد كبير على البحر ليه؟ لأن الدنيا ممكن تقلب عليك في لحظة ممكن تبقى فاهم أنك مسيطر على وضعك عارف تعوم كويس ومفيش مشكلة وفجأة الجو العام يتقلب وأنت متقدرش تخرج من البحر تاني فنفس الحاجة دي بتحصل في الاستثمار لأن هنا في السيناريو بتاع البحر أنت حصلك ثقة مفرطة أنا معنديش مشكلة أنا هعرف أطلع أكيد ولكن الموضوع مش كده
فأنت ديماً تفكر نفسك لو حتى أنت حد محترف ولو حتى أنت بتعمل الشغلانة دي كل يوم ، وفاهم أنت بتعمل إيه ياريت متتحيزش ياريت ميبقاش عندك ثقة مفرطة ياريت تفكر إن السوق والحاجات الاستثمارية أكبر منك وإن أنت جز صغير من الأسواق نفسها ، متخليش رأيك يخدعك ومتخليش إحساسك بالأمان ديماً يخدعك ، دور على المعلومة ، دور على الفكرة هي جاية منين وحاول أعقل الفكرة قبل ما تنفذها
إحنا أتكلمنا لحد دلوقتي في 7 أنواع من التحيز أحنا ممكن نكمل 20 أو 30 كمان لو حابين ولكن أنا حاولت النهاردة أختار أكتر 7 حاجات يمكن من وجهة نظري أنا بشوفهم عبر الخبرة بتاعتي في المجال المالي يعني ومعظمهم بيأثروا على البدايات وأنا بالنسبالي البدايات ديما مهمه لأن أنت لو عمرك ما ابتديت أنت مش هيحصل معاك أي حاجة ، فالمهم أنك تبتدي سواء النفور من الخسارة أو إنك عندك إهتمام محدود المعلومات كتيرة أوي عليك فمش عارف تبتدي ، إن أنت خايف قلقان كل الحاجات دي هي كلها مسميات لمشاعر بنحسها وبتمنعنا إن أحنا نبتدي ، ومن أهداف البودكاست ده إن الناس بالذات اللي عمرها ما أبتدت تبتدي ، لأن كل ما تبتدي بدري كل ما الموضوع هيبقى أسهل عليك قدام في إن أنت تستثمر وتحقق النتائج بتاعتك والأهداف بتاعتك
لو عاوزين توضيح أكتر في حتت معينة في التحيزات دي ممكن نعمل حلقات تانية على موضوع التحيز ، ولو عندك أفكار أو عندك اسئلة أحنا زي ما أتفقنا أحنا كل شوية هناخد اسئلتكم ونشغلها في حلقات
Transcript
برده أنا عايز أقول إن أحنا عملنا نسخة من التسجيل مكتوبة على الويب سايت ، حلقة مثلاً زي بتاعة النهاردة هيبقى فيها مصطلحات إنجليزية كتير هنحاول نكتبها ونكتب ترجمتها تاني عشان لو فاتك كلمة معينة مش لازم ترجع تسمعها تاني أنت ممكن تخش على الويب سايت تقرأ عنها وياريت تاخدوا الحاجات دي وتعملولها بحث في جوجل لو حابب تقرأ عنها ، أنا بديلك المصطلح نفسه وأنت ممكن تدور وتقرأ عليه أكتر لو أنت حابب هتلاقوا حاجات كتيرة موجودة أونلاين تساعدكوا أنكوا تطوروا معرفتكوا
19:24
Conclusion النصيحة الأخير
ابتدي متقلقش متخافش أنت بتاخد مخاطر في الحياة أكبر بكتير من أنك تستثمر بس أنت مش واخد بالك. والقرارات العقلانية هي الصح يعني لو قالك إن محفظة متنوعة بتعمل عوائد بطريقة معينة أو عوائد على مدار ال 10 / 20 / 30 سنة متخافش أبتدي والخطوات الصغيرة البسيطة اللي فالأول مهمة جدا
شكراً جداً جداً على وقتكم معانا النهاردة وأشوفكم في حلقة جديدة من كلام ينور
Translation of some words and terms:
Background: خلفية
Loss Aversion Bias: تحيز النفور من الخسارة
تحيز النفور من الخسارة أو الهروب من الخسارة أي تجنب الخسارة على حساب تحقيق الآرباح
Shut down: إغلاق
Survival: نجاة أو بقاء
Status Quo Bias: الانحياز للوضع الراهن
الانحياز للوضع الراهن هو انحياز عاطفي لحالة الوضع الراهن حيث يعتبر الوضع الراهن في هذه الحالة مرجعية، وأي تغيير عليه يُعتبر خسارة
Confirmation Bias: التحيز التأكيدي
التحيز التأكيدي أو التحيز الذاتي، حيث يميل الناس إلى البحث عن معلومات معينة تدعم وتؤكد أفكارهم ويهملون أي معلومات أخرى لا تدعم أفكارهم أو تناقضها، حتى وإن كانت صحيحة
The Bandwagon Effect: أثر عربة الفرقة الموسيقية
هي ظاهرة في علم النفس تسمّى أيضاً "عقلية القطيع" وهي قيام الناس بفعل ما وذلك لأن أناساً آخرين قاموا بنفس الفعل. بغض النظر عن معتقداتهم الشخصية والتي قد يتجاهلونها ، لمجرد رغبتهم في محاكاة الأغلبية
Fear of missing out: الخوف من ضياع أو فقد الفرصة
Limited Attention Span: فترة اهتمام محدودة
Limited Time span: فترة زمنية محدودة
Anchoring Bias: تحيز الترسيخ أو التثبيت
تحيز الترسيخ هو التحيز الذي يحدث عندما يعتمد المستثمر على جانب معين من المعلومات الموجودة لديه مُسبقاً ويميل لاستخدامها في عملية اتخاذ القرارات المستقبلية، وإصدار الأحكام
Overconfidence Bias: تحيز الثقة المفرطة
تأثير الثقة المبالغة ، حيث تكون ثقة المستثمر واعتماده على أحكامه الشخصية أكبر من دقة وموضوعية تلك الأحكام
Transcript: نسخة طبق الأصل
Conclusion: خاتمة
Risks: المخاطر
Returns: عوائد - عائدات
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي # الانحياز #التحيز #التحيزات #علم_النفس