16. علاقة الحياة المالية بالصحة النفسية (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة الإسبوع ده هي إعاده تشغيل لحلقة رقم 2 "علاقة الحياة المالية بالصحة النفسية" وده لأن جالنا منكم تساؤلات كتيرة على موضوع الصحة النفسية ولأنها الحلقة الأكثر استماعاً حتى الآن ولأننا مؤمنين بأن في الإعادة إفادة ، وحتى لو كنت سمعتها قبل كده جرب تسمعها تاني أكيد هتسمع فيها حاجات مختلفة وهتكتسب منها معلومات جديدة
بنتكلم في الحلقة على بعض العلامات والمؤشرات لو بتحصل معاك او بتلاحظها في حياتك أعرف أن الجانب المالي في حياتك مأثر بشكل سلبي على صحتك النفسية
: في هذه الحلقة
0:460 مقدمة
01:53 ازاي عدم تنظيم حياتك المالية ممكن يأثر على صحتك النفسية
04:45 العلامة الأولى : احساسك بعدم التحكم وفقد السيطرة على حياتك
04:25 ازاي الكلام ده بينعكس على الحياة المالية؟
05:32 الشراء الإندفاعي Impulsive spending
06:38 العلامة التانية : بتتجنب تحل المشاكل المالية بكل الطرق
07:25 الميزانية
08:33 الميزانية المتوقعة
09:02 ليه بنعمل ميزانية ؟
10:36 العلامة التالتة : ثقتك في نفسك بتقل
13:30 العلامة الرابعة : مستويات طاقتك بتقل بسبب تراكم المشاكل المالية
13:56 النوم من اهم واكبر المؤشرات اللي بتعكس حالتك النفسية
14:38 النصيحة الأولي : زود دخلك
15:30 النصيحة التانية : كافئ نفسك
16:23 الخاتمة
تابعوا حلقتنا واكتبولنا آرائكم بعد سماع الحلقة وقولولنا لو حابين في المستقبل نلعب أي حاجه تاني
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
0:460 المقدمة
اهلاً بيكوا مرة تانية في بودكاست كلام ينور ، النهاردة أحنا هنعمل إعادة لحلقة قديمة أو هنعيد تشغيل حلقة قديمة هي الحلقة 2 اللي هي علاقة الحياة المالية بالصحة النفسية وده لسبب ان احنا جالنا عليها اسئلة كتير ، ودي من أكتر الحلقات اللي اتسمعت من ساعة ما ابتدينا البودكاست فاحنا تعمدنا إن احنا نعملها إعادة تشغيل تاني لأننا عايزين كل الناس اللي مسمعوهاش يسمعوها ولو انت كنت سمعتها وجربت تسمعها تاني بعد فترة برده هتسمع فيها حاجات تانية جديدة أنا متأكد ، ودي حاجه ديماً بتحصلي إن انا ببقى بسمع حلقات وبعد شهرين تلاتة أربعة أرجع أسمع الحلقة تاني بسمعها بشكل تاني ، أكتسب منها معلومات جديدة فيارب الإعادة دي تعجبكم وفي المستقبل لو حابين نلعب أي حاجه تاني ياريت تقولولنا وشكراً جداً على وقتكوا
01:53 ازاي عدم تنظيم حياتك المالية ممكن يأثر على صحتك النفسية
حلقة النهاردة بتتكلم على ازاي عدم تنظيم حياتك المالية ممكن يأثر على صحتك النفسية ، هنلاقي موضوع الصحة النفسية ده موجود بشكل كبير في السنين الأخيرة ، الناس بتتكلم عليه في مختلف المجالات ، النهاردة انا عاوز أتكلم عليه من الناحية المالية ، عايز اشوف شوية علامات اتكلم عليها ، لو العلامة دي بتحصلك يبقى أنت في تأثير جاي من الفلوس بيأثر بشكل سلبي على صحتك النفسية فلازم الأول أعرّف إن الحاجة دي موجودة عندك ، أنا النهاردة هتكلم على كذا علامة ممكن نشوفها لو بتحصلك ازاي ممكن تعرفها ، وازاي ممكن تفكر فيها ، وازاي ممكن نحاول مع بعض تخرج منها
04:45 العلامة الأولى : احساسك بعدم التحكم وفقد السيطرة على حياتك
أول حاجة إن أحساسك بعدم تحكمك في حياتك بمعني هديك مثال أنت النهاردة لو نازل خارج في الزحمة لو عندنا مشوارين المشوارين 45 دقيقة بس أنت نازل في طريق هتنزل من أوله لأخره مفيش ولا إشارة ومش هتقف وهتاخد 45 دقيقة في طريق مستقيم من غير أي مشاكل ، وعندك طريق تاني 45 دقيقة ولكن في زحمة بتظهر أنت متعرفش بس الطريقين هتوصل من النقطة أ للنقطة ب في 45 دقيقة ، احنا نفسيا في الطريق الأول مبنحسش بالطريق والوقت بيعدي بينا بسرعة.. ليه؟ لأن التوقعات بتاعتي هي مطابقة للحقيقة بمعني أنا كنت نازل أخرج في 45 دقيقة ، وروحت من النقطة أ لـ ب في 45 دقيقة من غير ما أشوف حاجات في النص مختلفة ، العربية ماشية مبتقفش. في الطريق التاني الزحمة بتسبب ديماً ضغط عصبي وهي مش بتسبب ضغط علشان بتروح في وقت أطول ، أنت في جميع الحالات هتروح في 45 دقيقة ، ولكن التوتر بيجيلك منين؟ من أنك بيظهر لك حاجات في الطريق غير متوقعة لما بيظهرلك حاجات غير متوقعة بتسبب ضيق أو توتر التراكم بتاع الحاجة دي ممكن يخليك تفقد أعصابك أو تضايق وتزعل بتديك أحساسيك مختلفة مع إن احنا في الطريقين هنوصل في 45 دقيقة
04:25 ازاي الكلام ده بينعكس على الحياة المالية؟
لما أنت بتبقى نازل في الطريق بتاعك ، الطريق بتاعك هنا هو الشهر بتاعك ، أو الفرق ما بين ما بتقبض دخلك من الشهر للشهر ، طيب لو أنا بيظهرلي حاجات كتيرة جداً في نص الشهر أنا مش متوقعها هتسبب لي التعاسة دي وممكن بالعكس كمان دي ممكن توصلني إن انا عشان الأحساس اللي هو جالي وحش ومضايقني ده إن انا بالعكس علشان أتجنب الشعور الوحش ده وأدي نفسي شعور بالسعادة اللحظي إن أنا ممكن أنزل أشتري وأصرف فلوس مكنتش عاوز أصرفها. أنا شوفت ناس ممكن تنزل تجيب حاجة مش محتجاها زي ساعة ، جزمة ، لبس أي حاجة علشان بس يتجنب الشعور الوحش اللي حصله خلال الشهر
05:32 Impulsive spending الشراء الإندفاعي
الحاجة دي بتنسميها اللي هو الشراء الإندفاعي أنت بعد ما خلصت الـ 45 دقيقة بتاعتك في المشوار ده أنت وصلت مضايق ، فأنت هتنزل تعمل أي حاجة بقى عشان تحسسك بالسعادة.. طيب الحل إيه؟ إن أنت لازم تعرّف نفسك إن في حاجة اسمها شراء إندفاعي وإن الحاجة دي بتحصلنا كلنا وبعد ما تعرفها تحاول واحده واحده تعرف مخك إن لما يجيلك الأحساس متنجرفش ورا مشاعرك ، حتى لو كانت مشاعرك قوية في اللحظة دي ، وواحدة واحدة تبتدي تتجنبها. متحاولش برده تجبر نفسك على التغير فجأة.. أنت النهاردة عرفت نفسك إيه ده ده أنا كل الشهر اللي فات أو السنة اللي فاتت بعمل شراء إندفاعي ، كل ما أقبض فلوسي أروح نازل صارفها ، متحاولش تغير بسرعة براحة هتاخد وقت ، لازم يبقى عندك أهداف واضحة وطويلة من التغير أنا مش فارق معايا أنك تغير الموضوع ده في 5 دقايق أو في الشهر ده حتى
06:38 العلامة التانية : بتتجنب تحل المشاكل المالية بكل الطرق
تاني علامة أنا بشوفها ديماً إن أنت بتحاول تتجنب المشاكل بكل الطرق ، المشاكل المالية ، هتبتدي تحاول تتجنب دفع الفواتير بتاعتك ، تبتدي تحاول تهرب من أي حاجة ليها علاقة بالفلوس ، ايه ده مش عارف ايه عاوز مننا فلوس ، ألحق هات هنا فلوس.. طيب دي مشكلة كبيرة لأنك كل ما تتجنب المشاكل هتتراكم عليك من غير ما تاخد بالك أصلاً ، ودي مشكلة كبيرة لأنك مش هتقدر تفكر في ميزانيتك بشكل واضح ، أنك تعمل ميزانية هيتطلب منك مجهود نفسي كبير أرقام وحسابات كتير علشان توصل لرقم حقيقي بيمثل مصروفك الشهري مثلاً
07:25 الميزانية
بسأل ناس كتير أنت بتصرف كام في الشهر؟ الإجابة بتاعتة بتكون بصرف 100 بس لما أقعد معاه ونتكلم ، بنود واحده واحده كده قولي أنت بتصرف في إيه بلاقي انه أصلاً بيصرف 130 وهو اصلاً دخله 120 ، فكل شهر هو اصلاً فاكر انه مفروض يحوش 20 لأنه فاكر أنه بيصرف 100 ولكن هو بيصرف 130 فبيطلع بعجز كل شهر 10 والعجز ده بيتراكم وبيسبب ضغط نفسي كبير على الناس وبشوف الموضوع ده تقريبا مع كل الناس مش حاجة نادرة الحدوث ، ليه بقى؟ لأنك معندكش ميزانية حقيقية تقعد مع نفسك المفروض الأول تعمل جرد كامل لكل مصاريفك وتكتبها بطريقة منظمة انت ممكن تفهمها ، مش لازم تتبع طريقة معينة مكتوبة في كتاب معين أو حاجة أبتدي بحاجة بسيطة هات ورقة وقلم أكتب مصروفك أكتبة بشكل أنت تعرف تقراه وانت بتستريح ليه مش لازم يعني تتبع أسلوب علمي من أول يوم.. حاجة أنت فاهمها
08:33 الميزانية المتوقعة
كده احنا عملنا ايه حطينا توقعات حقيقية لنفسنا ، ولازم تسيب لنفسك براح شوية وانت بتعمل الميزانية يعني مش لازم تعمل كل حاجة بالقرش ، يعني لو بتصرف 10 جنية أو 10 دولار على بند التعليم في الشهر مش لازم تحط 10 بظبط ممكن تحط 10.5 أو 11 ، ديماً خلي ميزانيتك وأرقامك التقديرية أعلى شوية من الحقيقية حاجة بسيطة ليه لأن احنا هنا بنتكلم في ميزانية متوقعة
09:02 ليه بنعمل ميزانية ؟
أحنا ليه بنعمل الميزانية؟ علشان توقعاتك تبقى قريبة من الحقيقة ، كده أحنا حلينا ¾ المشكلة ال ¼ اللي فاضل عليك انك تنفذ الميزانية دي ، احنا كده كده هنعمل حلقة كاملة ازاي تعمل الميزانية خطوة بخطوة ، يعني مع بعض هنمسك الميزانية بتاعة البيت شكلها عامل ازاي ، مفروض يبقى ايه المصاريف الثابتة ، ايه المصاريف المتغيرة ، التحويش او الادخار بتاعك بيجي فين في الميزانية ، وايه اللي يروح استثمار.. كل التفاصيل دي هنعملها في حلقة لوحدها كاملة ، بس النهاردة أنا بعرفك إن عدم وجود ميزانية دي هو اللي بيخليك بتتجنب أصلاُ الإدارة المالية بتاعتك في البيت وعلى فكرة انا مش بتكلم بس على راجل أو رب أسرة ، بالعكس لو أتنين متجوزين الأتنين جزء من الميزانية ، لو واحدة لوحدها مش متجوزة دورها انها تدور الميزانية بتاعتها لأنها عايشة لوحدها ، فالكلام ده مش موجهة لرب أسرة ، أو الرئيس اللي بيصرف في البيت أنا بتكلم على أي حد عنده دخل وعنده مصروف سواء انت عندك 20 سنة 50 سنة ، 70 سنة أيا كان لازم يبقى عندك ميزانية لازم تيجي تقولي الرقم الحقيقي في الشهر اللي انا بصرفه هو كذا لأن الدخل واضح ، الدخل عبارة عن مرتبك وأي حاجه جانبية بتجيلك من أي أصل جانبي بيدخلك دخل ، ولكن ديما المشاكل بتحصل فين! في الميزانيات
10:36 العلامة التالتة : ثقتك في نفسك بتقل
العلامة اللي بعديها ثقتك في نفسك بتقل مع الوقت في ان أنت مش قادر أو مش عارف تطبق أو أو أو.. أسباب كتير ممكن تخليك تفقد الثقة في نفسك ، أو تفقد الثقة في إدارتك المالية للبيت ، أنا عامل ميزانية بس كل ما أجي أنفذها معرفش اللي أنا عاوز أقولهولك أن ده طبيعي جداً وبيحصل مع كل الناس ، المخ زي أي عضلة في جسمك لما بتروح الجيم مثلاً أو النادي بتبتدي تتمرن بعد وقت طويل بيظهر نتايج التمرين ده عليك ، يعني مش بتروح أسبوع فتبتدي كل عضلاتك جسمك تبقى على المستوى اللي أنت طالبة ، أو تخس أو تعمل اي حاجة.. نفس الكلام في مخك أنت محتاج تمرن مخك ويعدي بتجارب من النجاح والفشل لحد ما توصل لمعادلة مظبوطة أنت راضي بيها والمعادلة دي هتبقى ديماً متغيرة لأن حياتك المالية نفسها بتتغير مع كل وقت أنت لسه في أول حياتك بطريقة لما بتتجوز بطريقة تانية لما بتخلف بطريقة تالتة لما بتتقاعد بطريقة رابعة وهكذا مش هيحصل في يوم وليلة أنك توصل للذاكرة العضلية أو اللي هو العضلة نفسها تبقى فاكرة التمرين بتاعها ، عمر ما مخك هيوصل للكلام ده غير لما بتعدي بتجارب كتير ، لما هتبتدي توصل للعادة دي هتبتدي العادة دي تحققلك نوع من السعادة بمعنى ايه إن أنا قولت أنا هصرف الشهر ده 120 وأنا دخلي 120 معنديش مشكلة بس أنا ألتزمت ان أنا صرفت الـ 120 ده أول نوع من أنواع السعادة وأول خطوة في أن أنت تقدر ترجع الثقة اللي أنت بتفقدها تبتدي ترجعلك تاني ، ليه؟ لأنك أبتديت تحقق أهداف ، الأهداف دي لازم تكون صغيرة جداً يعني حقق هدفك في الميزانية بتاعتك على مدار الشهر ، وبعدين على مدار الربع وبعدين على مدار السنة ، يبقى عشان نوصل للهدف الطويل لازم أحقق نجاحات صغيرة كتيرة ورا بعض ، طب لو فشلت فترة في الأول؟ مش مهم أنت لسه بتتعلم أنت لسه بتاخد وتحط الحاجات على ورق بتعمل ميزانية بتاعتك بتفكر فيها بشكل واضح وبشكل بسيط وبتجرب تحاول تنفذها في الحياة ، وبيجيلك النتايج من الحياة ، ده صح ده غلط وهكذا.. وبرده الميزانية دي هتخليك تعرف أنا في حاجات معينة مثلاً زي المدارس بتجيلي كل فترة معينة ، بتجيلي مثلاً مرتين في السنة فـ فلوسها مش هتتصرف في شهر 1 وشهر 2 وشهر 3 بس هتتصرف مثلا في شهر 4 يبقى أنا شهر 1 ، 2 ، 3 لازم أجنب جزء من دخلي علشان يحميني في شهر 4 ، طبعاً هنمشي في كل الحاجات دي بالتفاصيل في الحلقة بتاعة الميزانية وحلقات أخرى هتبقى بتتكلم بطريقة غير مباشرة
13:30 العلامة الرابعة : مستويات طاقتك بتقل بسبب تراكم المشاكل المالية
العلامة الرابعة اللي بحاول أتكلم فيها ان مستويات الطاقة بتاعتك بتقل لما يبقى عندك مشاكل مالية ده ممكن يسببلك في بعض الحالات أن انت مثلاً متعرفش تنام ، لأنك بتفكر في مشاكل مالية ، بتفكر في حاجة كبيرة فمش عارف تنام ، يقولي انا مانمتش امبارح بليل مجاليش نوم علشان بفكر أنا عليا فلوس والكلام ده كله
13:56 النوم من اهم واكبر المؤشرات اللي بتعكس حالتك النفسية
النوم من أهم العناصر اللي في الحياة اللي بتخليك تبقى صحتك النفسية مظبوطة ، لو المشاكل المالية ابتدت تأثر على النوم أعرف أن دي من الحاجات الكبيرة جداً اللي هتنعكس على الصحة النفسية على طول ، تاني الحل بتاعنا لو توقعاتك بنسبة مظبوطة في الميزانية ابتدت تتحقق في الحياة هتلاقي الحاجة دي بتحصلك مع الوقت انك ابتديت ترجع تنام أحسن ، وان انت ابتدا يجيلك مشكلة مالية في حتة معينة اه مانا عامل حسابي عليها الحمدلله ، او انا مركز فيها أو انا شايف فلو شوفت النوم ابتدا يتأثر بسبب مشاكل في الفلوس دي برده حاجة هتنعكس بشكل غير مباشر على صحتك النفسية
14:38 النصيحة الأولي : زود دخلك
بشكل عام.. هقول نصيحتين هقفل بيهم الحلقة بتاعة النهاردة ديماً حاول بأي شكل تزود دخلك ، ركز في شغلك أو مشروعك ، أطلب زيادة في مرتبك لو حاسس أنك تستحق لأن أنت بتعمل مجهود كويس في شغلك ده هينعكس بشكل إيجابي على تحقيق هدفك المالي مع الوقت ده هيساعدك في ميزانيتك ده هيديك أمل أنك توصل لأهدافك بطريقة أسرع فديماً حاول تركز أنك تزود دخلك ، مش لازم تزود دخلك بالاستثمار أنا بكلمك من دخلك الرئيسي اللي جاي من شغلك النهاردة دي أول حاجة أنا بنصح بيها الناس لأن في ناس كتيرة جدا بقعد أقول لهم ممكن تتكلم في شغلك ، ممكن تتكلم في فلوسك أنك تزود دخلك ، بس الناس ديماً بتبقى خايفة وقلقانة ومبتحبش تتكلم في الموضوع ده ، بس دي ديماً حاجة بالعكس أنت ممكن تكون تستحق زيادة لو أنت بس روحت أتكلمت عليها أنت ممكن تاخدها
15:30 النصيحة التانية : كافئ نفسك
نصيحة أخيرة ودي هنتكلم فيها أكتر في حلقة الميزانية لما تعمل ميزانيتك مظبوطة وتحققها بشكل صح شيل جزء صغير من ميزانيتك ده هات حاجة أنت بتحبها أصرفها في أخر الشهر من غير ما تحس بالذنب حتى لو الناس كلها شيفاها وحشه خليها زي جايزة ليك أنت عرفت تنفذ ميزانيتك فأنت بتكافئ نفسك بشكل صحيح في أخر الشهر زي كده الوجبة المفتوحة بتاع الدايت اللي هو بيبقى عندك وجبة كل شهر أو كل اسبوع أيا كان بتكافئ بيها نفسك أنك قعد الشهر كله طيب ده فارق عن طبعاً لأن الشراء الإندفاعي اللي أحنا ذكرناه في أول الحلقة ده بيحصل بسبب إن أنا مضايق فروحت أشتريت هنا لأ هنا أنا حققت ميزانيتي ووصلت للهدف بتاعي أخر الشهر فأنا بكافئ نفسي بحاجة تبسطني
16:23 الخاتمة
دي بدايات تعرفك على الصحة المالية وعلاقتها بالصحة العامة في حياتك ياريت تقولولنا إيه رأيكم في حلقة النهاردة ولو عندكوا أي تعليقات ياريت تبعتولنا.. شكراً جداً
Translation of some words and terms:
Replay إعادة
Topic موضوع
Straight مستقيم
Stress ضغط عصبي
Impulsive Spending الشراء الإندفاعي
Force جبرأو فرض
Expectations توقعات
Saving ادخار
Asset أصل
Muscle Memory الذاكرة العضلية Feedback نتائج أو ردود أفعال
Indirect غير مباشر
Energy levels مستويات الطاقة
Indirectlyبشكل غير مباشر
Cheat Meal وجبة الغش أو الوجبة المفتوحة في الرجيم
Target هدف
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #الحياة_المالية #أقتصاد #الصحة_النفسية #الميزانية