104. متوافق مع الشريعة الإسلامية
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
،حلقة النهاردة هي تاني لقاء لينا مع نادر التهامي
نادر هو صانع محتوى مصري مقيم في كندا، المحتوى اللي بيقدمه نادر عبارة عن فيديوهات بالإنجليزي بتناقش الاستثمار من الناحية الإسلامية
@Halalstocktok فـلو انت مهتم بالإقتصاد الإسلامي وعندك استفسارات تقدر تتابع نادر وتشوف المحتوى بتاعه وتتواصل معاه على إنستجرام وتيك توك
.. بندردش النهاردة مع نادر في الحاجات المتوافقة مع الشريعة الإسلامية من ناحية التمويل أو الإستثمار
02:20 ازاي أتعامل مع البنوك؟
03:25 هل كل الحسابات الموجودة جوه البنك متوافقة مع الشريعة الإسلامية؟
04:22 فتحت حساب في بنك من البنوك الإسلامية هل من حقي أخد تمويل؟
07:44 هل في أي نظام من الـ 3 بيفرق عن التاني من أسعار او طريقة الدفع؟
10:20 هل ممكن أمول عربيتي تمويل إسلامي؟
14:10 رأيك إيه في موضوع الكروت الإئتمانية؟
18:20 ازاي استثمر فلوسي بطريقة إسلامية؟
25:53 هل في صناديق متداولة إسلامية للأسهم والسندات؟
29:33 كلمني على الاستثمار في الشركات الخاصة؟
مهم جداً أننا ننوه إن الموضوع كله اجتهاد، نادر مش دارس شريعة هو زي أي حد مهتم بمواضيع معينة بيعمل البحث بتاعه وبيحاول يجيب الآراء من وجهة نظر العلماء بأسلوب بسيط وسهل
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة أنا معايا نادر التهامي، عملت مع نادر حلقة اللي احنا عملنلها إعادة الحلقة اللي فاتت حلقة الزكاة دايماً عايز افكر الناس بيها وخاصة في شهر رمضان للناس اللي بتدفع الزكاة السنوية بتاعتها السنة المالية يعني بتاعتها بتعملها في رمضان فعيدنا الحلقة اللي فاتت والنهاردة أنا معايا نادر هنتكلم في مواضيع تانية متوافقة مع الشريعة الإسلامية من ناحية التمويل أو من ناحية الاستثمار عايز اخد رأيه كده في شوية حاجات يارب تستمتعوا بالحلقة دي وهسيبكوا مع نادر
عمر: أهلاً بيك يا نادر معانا مرة تانية أنا عارف أحنا بقالنا يمكن آخر حلقة عملناها من سنة وكانت من الحلقات اللطيفة جداً الموضوع بتاع الإقتصاد الإسلامي بشكل عام المتوافق مع الشريعة الإسلامية من أهم الحاجات اللي بيجيلي عليها أسئلة كل سنة وانت طيب انت معانا في رمضان أولاً وأنا سعيد جداً جداً بوجودك معايا
نادر: وأنت بالصحة والسلامة إن شاء الله
عمر: السؤالين الكبار اللي بيجولي أولاً ازاي اتعامل مع البنوك؟ في لغط وفي لخبطة والناس مش فاهمة إيه اللي بيحصل في موضوع البنوك من وجهة نظر إسلامية طبعاً، ومن خلال الأبحاث اللي أنت عملتها من خلال خبرتك في المجال ده. والسؤال التاني الإستثمارات المباحة أو الإسلامياً موافق عليها من اللجنة اللي بتوافق على الإستثمار أو أياً كان فخلينا نبتدي الأول في موضوع البنوك
02:20
ازاي الناس تتعامل مع البنوك أول حاجه كده، أنا مش فاهم أي حاجه ازاي أتعامل مع البنوك؟
نادر: على حسب أنت عايش فين، يعني لما انت بتكون في الدول العربية يعني في إسلامي وفي غير إسلامي. يعني انت لما بتستعمل البنك بس كمجرد مكان بتحط فيه فلوسك يعني لازم تتأكد بس ان الحساب اللي بتحط فيه مبيطلعش ربح من مكان حرام، يعني احنا هنا في كندا لما بتحط فلوسك في حسابات التحقق والتوفير بيكون في فايدة بتنزله بس مجرد إن أنت يكون عندك فلوسك فيها فيعني اهم حاجه لازم الواحد يلاحظها إن الحلال بين والحرام بين
03:25
عمر: طيب أنا تاني هرجع أقولك أنا مش عايز أدخل نفسي في الكلام ده لما اروح للراجل أقوله إيه؟ أنا عايز حساب إسلامي؟ قبل ما لسه هاخد فيه أي حاجه اروح لبنك إسلامي يعني بالطبيعي هروح لبنك إسلامي بس هل كل الحسابات الموجودة جوه البنك الإسلامي تعتبر متوافقة مع الشريعة الإسلامية؟ أو مفيهاش مشكلة؟
نادر: معرفش حسب البنك يعني انت لازم تاخد لفه في الموجود عنده وبعدين تسأل أسئله يعني هو الربح بيجي منين؟ ساعات ممكن يشغلوها في صكوك والصكوك نفسها بتبقى حلال معظم الوقت يعني دي هم بيشغلوا الفلوس يا اما في تجاره او حاجه زي كده والربح نفسه بيكون من الشغل الاساسي او لو في بيوت او حاجه زي كده ده اللي هو المكسب بتاعهم يعني ده مش ربا بس في نفس الوقت هو الربا والمكسب شكلهم زي بعض، بس الربا هي مكسب فلوس على فلوس والربح هو مكسب فلوس على حاجه تانيه ممكن تكون حاجه غير الفلوس
04:22
عمر: طيب انا النهارده فتحت حساب في بنك من البنوك الإسلامية و وتأكدت ان مفيش مشكله هل من حقي أخد قرض؟ يعني عايز برضه اشوف من الناحية الإسلامية ازاي اخد قرض وخلينا نبتدي كده بالقرض السكني اللي هو أول نوع وأشهر نوع، أنا عايز أشتري بيت فإسلامياً انا ممكن اخد قرض للبيت؟
نادر: هو اسم القرض ده هو اصلا في مشكله من اساسها لان القرض في الإسلام هو المفروض يكون قرض حسن يعني انا لما بسلفك فلوس ترجعلي نفسها بالظبط فأنت لو عايز تشتري بيت في كذا منتج عاملينه يساعدك اللي هو الهدف النهائي نفس الحاجه
عمر: تمويل مثلا؟ يعني ممكن نقول عليه تمويل بدل قرض
نادرو: اه فانت عندك 3 انواع متوافقة مع الشريعة الإسلامية ممكن تشترى بيها بيت اللي هو المشاركة المرابحة والإجارة
المرابحة دي لما واحد بيفهمها بيفهمها على طول ان واحد بيشتريها بالنيابة عنك وبيغلي الثمن وبعدين بيبيعهالك بالتمن ده هو وبيقسطهالك هي دي المرابحة وطالما المكسب على البيت نفسه انا خلاص البيت بقى ملكي وانا ببيعهولك فده من اهم الحاجات اللي لازم لما واحد يبيعلك حاجه تكون ملكه هو عشان يعرف يكسب عليها دي اللي هي المرابحة
المشاركة يعني انتم داخلين شركا وانا ببيعلك النسبه بتاعتي على مكسب وانت تعيش في البيت ولو انت بعت البيت وفي مكسب انت تخلي المكسب ليك، انا بس عايزه الأسهم بتاعتي بالأرباح بتاعتها بس لو انت عرفت تخلصة بادري مفيش أي ربح على الأسهم الموجودة
تالت حاجه اللي هي الإجارة اللي هو أنت بس بتأجر البيت لمدة معينة وعلى أخر المدة ممكن تشتري البيت بالدولار
عمر: ينتهي بالتملك، يعني ينتهي في آخر العقد تقدر تتملكه
نادر: آه الإيجار المنتهي بالتملك، فهما دول الـ 3 متصرحين ليك من الناحية الإسلامية
عمر: تمام، يعني أنا لو روحت للراجل بتاع البنك وقعدت معاه وقولتله أنا عندي بيت عايز اشتريه غالبا هيطلع لي عقد من 3 دول مظبوط
نادر: بالظبط، ده لو هو بنك إسلامي بيعملها بالطريقة الإسلامية
عمر: اه ما احنا زي ما قلتلي بنتأكد دلوقتي ان البنك بيعمل شغله ولا لا
نادر: هم دول عامه الثلاثه اللي هم بيستعملوها في التمويل الاسلامي وانا شغال مع منزل هنا في كندا وهم عندهم المشاركة والمرابحة
07:44
عمر: هل في أي نظام من الـ 3 بيفرق عن التاني من أسعار او طريقة الدفع ولا هما كلهم بيبقوا شكل بعض بس نوع العقد نفسه أو نوع العملية نفسها؟
نادر: المرابحة عامه اغلى من المشاركة وهو غالي عشان لو انت هتشتري البيت وتقسطوا على 25 سنه ان واحد يعمل التزام لفلوس لمده 25 سنه صعب وفي مخاطره برضه فلازم الربح يكون اعلى
بس اللي هي المشاركة ممكن تبقى زي ربح متغير فهما بيحددوها من الشروط بتاعه أيوفي، أيوفي عباره عن شركه كده بتحدد القواعد بتاعه الشريعة الإسلامية والتمويل الإسلامي واللي موجود في العالم كله وهو موجود في الكويت هو مجرد عباره عن شيوخ ومفتيين وكده بيحددوا ايه الصح الغلط لما بتتكلم على التمويل الإسلامي ومعظم الوقت لو انت بصيت على أي بنوك واي خدمه لو هما معترفين بأيوفي تطمن ان هم ماشيين صح
فهو بيحددلك ويقولك ان الأرباح بتحدده من من فايده موجوده ممكن اي واحد يشوفها ومعظم الوقت يا إما الفايدة دي ناحية الصكوك الموجودة في البلد أو من ناحية الفايدة بتاعة البلد نفسها هو ده اللي بيحددلك الحد الأدنى للربح لو واحد بيستثمر فلوسه انه يرجعله الربح زيه تقريبا عشان ده بيساعد الناس انهم يساعدوا في التمويل نفسه فهي المشاركة عشان ممكن تبقى متغيرة فممكن تتغير الأرباح في أي وقت ده بيقلل المخاطرة وفي نفس الوقت بيخلي المنتج أرخص شوية، فمن ناحية المشاركة هي احسن من الأتنين عشان هي أكثر حداثة أنت ممكن تعمل اللي انت عايزه في المشاركة بس في المرابحة هو السعر اللي انت اتفقت عليه هو ده أخر تمن حتى لو عرفت تخلص البيت بدري لازم تدفع التمن ده إلا لو البنك سامحك في الباقي بس ده مش مضمون يعني فلو تقدر تعمل مشاركة هو احسن من المرابحة
10:20
عمر: اوكيه تمام، طيب لو أنا عندي مثلاً المشتريات الكبيرة اللي الناس دايماً بتفكر فيها مثلاً العربية، العربيات ده جزء كبير من فكر الناس.. هل أنا ممكن أمول عربيتي تمويل إسلامي؟
نادر: في مجال، بس في كذا فتوى في الموضوع، وطبعاً أنا مش مفتي ولا شيخ ولا اي حاجه
عمر: ولا أنا
نادر: بس أنا بتابع الآراء المهمه في الموضوع، فأولاً لما أنت بتيجي تشتري عربية في حاجتين ممكن تعملهم ممكن تعمل تمويل وممكن تعمل إيجار فده حلال حتى لو فيه فوايد موجودة في العقد وكده ده إيجارة يعني أنت هترجعه على آخر المدة وتبدله بعربية تانية يعني ده مش ملكك انت بس مجرد بتأجره
عمر: بس ده يا نادر مش موجود أوي في المناطق العربية، يعني أعتقد إني بشوفه أكتر في أمريكا في كندا في الغرب أوي اللي هو لما تخلص سنتين تلاته تروح رايح واخد عربية جديدة ومغير وتفضل تدفع الإيجار بتاعها، أعتقد في مصر بالذات أعتقد الناس بتمتلك العربية أكتر من أنهي تأجرها
نادر: أهم حاجه في الموضوع كله إن لازم ملك الحاجه اللي بتبيعها تكون في ملك اللي بيبعها، يعني ميقدرش يبيعلك عقد ويكسب من وراه هو لازم يكون مالك للعربية ويبيعهالك ولو في مكسب في الموضوع مهما كان فوايدة كده لو السعر النهائي مبيتغيرش خلاص بقى متوافق مع الشريعة الإسلامية عشان هو عنده ملك الأصل
بس أنا عندي هنا في كندا في نوعين من التمويل في تمويل الوكلاء يعني لو روحت لهوندا وعايز تشتري هوندا في وكيل هوندا هو اللي بيعملك التمويل، ودي آراء معظم الشيوخ الموجودة هنا مفيهاش اي مشكلة حتى لو في فوايد في الموضوع
عمر: لأن هوندا هنا تمتلك العربية
نادر: آه بالظبط، بس لو في بنك آخر هو اللي بيديلك التمويل زي تي دي أو سكوشيا بنك أو آر بي سي ده مش متوافق مع الشريعة الإسلامية يعني ده واحد بيسلفك فلوس وعايز فلوس يعني هما اللى بيدفعوا لهوندا وانت تاخد ميلك العربية بس انت بتقسط للبنك ده طبعاً مش على الشريعة فهو ده الفرق ما بين الأتنين يعني انت كده بتعمل مرابحة مع الوكيل ولو انت رحت استلفت عن طريق أي بنك آخر هو ده اللي بيحرم الموضوع
عمر: طيب لو تمويل البنوك ده بالنسبالي هو بنك إسلامي، يعني لو بنك إسلامي دخل راح للوكيل قال انا هشتري منك العربية فالبنك اشتراها بعدين البنك بعهالي
نادر: آه لو هما عملوها بالطريقة دي زي المرابحة طبعاً ممكن يعملوها، ومع العربيات المرابحة أكثر منطقية يعني
عمر: آه لأنه مش عقد طويل أوي يعني
نادر: وفي ساعات بتلاقي يعني أنا شوفت في السعودية لو انت عايز تشتري العربية النهاردة بتمن، ولو عايز تشتريها وتقسطها على 5 سنين بتمن فهي تقريباً نفس الحكاية بس هما بيغلوا من ناحية الـ 5 سنين عشان يقسموا الأرباح أو الفوايد في الفترة الـ 5 سنين وهو بيقولهالك كتمن
14:10
عمر: طيب لو روحت بقى للحاجات اللي بعد كده عندنا مثلاً في أنواع التمويل ممكن مثلاً بنشوف حتى في البنوك الإسلامية في الوطن العربي ممكن يطلعوا كروت ائتمانية رأيك إيه أو عندك إتجاه لما الناس بتسألك على الكروت الائتمانية؟
نادر: بص احنا عندنا هنا في كندا إن واحد يكون عنده تاريخ ائتماني حاجه مهمه جداً يعني انت لو عايز تروح تفتح اي حساب في شركة الكهرباء أو عايز تروح تفتح موبايل أو عاوز تروح تفتح اي حاجه بتستعملها من يوم للتاني، لو عايز تروح تشتري عربية لازم يكون عندك تاريخ ائتماني، فلو أنت معندكش تاريخ ائتماني مش هتعرف تعمل أي حاجه هنا في البلد
واحلى حاجه إننا لما كان عندي زباين بقابلها من ناحية منزل عايشين في البلد 15 سنة وعندهم التاريخ الائتماني بتاعهم صفر عشان ولا فتحوا كارت ولا استلفوا اي حاجه ولا عملوا اي حاجه في البلد دي عشان خايفين من الحرام بس هو المشكلة حتى لو أنت في بلد إسلامية وبتتعامل مع المنتجات الإسلامية لازم يكون عندك تاريخ ائتماني عشان هما يعرفوا لو انت هتعرف ترجعلهم القرض او تعمل المدفوعات ولا لأ فالكروت الائتمانية هنا بقت حاجه ضرورية عشان انت تعيش من يوم للتاني عشان انت لما بتشتري حاجات على الكريديت كارد وبتدفعها ومش بتدخل في الربا بتاعهم ده بيساعدك تعمل تاريخ ائتماني هنا في البلد او دي من أسهل الحاجات اللي ممكن تعملها هنا وبعدين كل واحد بيشتري حاجات كل يوم هو سهل جداً في 6 شهور انك تعمل تاريخ ائتماني كويس
بس ان انت تفتح كارت يعني معظم الوقت بيكون في شروط غير إسلامية فيها زي لو انت مدفعتش المبلغ بتاعك في الوقت اللي مفروض تدفعه فيه أحياناً بيكون في عقوبات و أحياناً بيكون في فوايد فدي تعتبر ربا، فحتى مجرد أنك تمضي العقد عشان تاخد الكارت ده ده مجرد حرام انت داخل في عقد انه غير إسلامي
بس أنت عندك شيوخ بيقولوا لو انت عندك كريديت كارد وبتستعمله بس بنية انك بتشتري وبتستفيد من البرامج اللي فيها يا إما طيران مخفض أو فنادق مخفضة أو كاش باك ماشي انت ممكن تعمل كده لو انت دفعته في وقته ومش بتخش من ناحية العقد اللي هو بيدخلك في الحرام
بس في شيوخ تانية بتقول لأ مينفعش انك تستعمل أي حاجه في الموضوع ده، وأنا اصلاً مشوفتش العقود اللي هي بتاعة الكروت في البلاد العربية والبنوك الإسلامية بس عمتاً متقدرش أن أنت متستعملش كارت زي الكريديت من غير ما يكون في فوايد إلا لو انت بتتكلم على مصر يعني انا عارف ان في مصر متقدرش تاخد كريديت كارد ويكون عندك رصيد إلا لو عندك نفس الرصيد في البنك فلو انت اشتريت حاجه فهو كده كده بيتاخد من الحساب بتاعك فهو مجرد انك عندك كارت وعليه ماستر كارد بس هو بيطلع من الحساب بتاعك وخلاص اعتقد ان ده حلال
عمر: آه هو المثال ده بتاعك مظبوط ان البنك بيبص على كل الأصول اللى عندك جوه معاه في البنك ويطلعلك كريديت كارد بجزء من الأصول دي
نادر: آه عشان لو انت مدفعتش على طول بيسحب من حاجة من الحاجات الموجودة
18:20
عمر: طيب انا برضه زي ما قولتلك كده الناس برضه بتسألني من الناحية التانية يمكن أنا عندي في الشركة بتاعتي عندنا صندوق إسلامي فعارف المراحل بتاعتها بتمشي ازاي، ازاي بيتراقب علينا من لجنة شريعة بتوافق على العقود وهكذا.. بس أنا عايز أتكلم عن الراجل العادي، ازاي استثمر فلوسي بطريقة متوافقة مع الشريعة الإسلامية؟ ولو مشينا كده الأصول واحده واحده يعني خلينا نقول انا روحت فتحت حساب في البنك، حطيت فلوسي في البنك، عايز أشتري بقى بالكاش ده حاجه والبنك ده إسلامي زي ما اتفقنا
نادر: بص هو أول حاجه وأسهل حاجه الدهب والفضة والحاجات دي يعني دي من الحاجات اللي طبعاً حلال وتعتبر حاجه ممكن سعرها يزيد بالوقت فكل المكسب بيبقى من الأصل نفسه اللي هو الدهب أو الفضة فده من أسهل الحاجات اللي يكون متوافق مع الشريعة الإسلامية
ولو البنك بيبيع زي أسهم بتاعة ذهب حقيقي زي هنا احنا عندنا صندوق استثمار مقيد على الدهب انه عندهم ملك الدهب وهما بيبعهولك في أسهم عشان صعب ان الواحد يروح يشتري اللي هو 24 دهب إلا لو بتشتري حاجات صغيرة زي الجنيه الدهب، صعب تشتري سبيكة الدهب فالبنوك بتوفرلك الموضوع ده وأنت ممكن تشتري دهب حقيقي من عندهم بس ميكونش مجرد دهب على الورق وورق بيبص على الأسعار وبيطلع وبينزل بس لو انت معاك تستثمر في الدهب الحقيقي ده يبقى كويس
تاني حاجه الأسهم في الشركات الحلال أو تعتبر أنها متوافقة مع الشريعة الإسلامية وزي ما انت قولت في لجنة إسلامية هي بتحددلك إيه اللي ممكن تدخل فلوسك فيه أو لأ فأنت لو واحد عادي مش فاهم أي حاجه عن الموضوع لازم تعتمد على البنوك نفسها انها تقولك إيه اللي ممكن يكون حلال وإيه اللي مش حلال فإن الواحد مجرد بس ياخد بصه على التركيب بتاع استثمارات عامل ازاي وهو من السهل جداً انه يقدر يقولك لو دي فيها شك ولا لأ فلو لقيت ان كل الحتت في القطاع المالي دي عمتاً هتبقى حاجه فيها مخاطرة من ناحية الإسلامية فلو انت هتلاقي معظمة حاجات صحية
عمر: في القطاع نفسه
نادر: آه لو تلاقي القطاع نفسه معظمها متوافق مع الشريعة، وأصلاً زي ما انت قولت اللجان الإسلامية دي بتخليك ممكن لو دخلت في حاجه متكترش عن حاجه 5% منها حرام أو العائد بيطلع 5% من الحاجه دي حرام ينفع برضه انك تخش فيها بس تطهر الفلوس كل سنة يعني تاخد الأرباح اللي بتطلعلك من الشركات دي وتتبرع بـ 5% لأي واحد محتاج فلوس متديهاش لمساجد او اي حاجه يعني طهر الفلوس دي وهي إن شاء الله تبقى كويسة
عمر: تمام، يعني أنا برضه بما إن دي جزء من شغلتي اللي هو صندوق الاستثمار نفسه هو بيعملك بالنيابة عنك كل الحاجات دي صح؟ يعني انت لما بتروح لصندوق استثمار متوافق مع الشريعة انت بتحط فلوسك جوه الصندوق، الصندوق بيختار الشركات بالنيابة عنك بيتأكد ان الشركات دي إسلامية وبيطهر الفلوس بالنيابة عنك صح كده؟
نادر: اول أتنين صح يعني هما بيبصوا على الشركات وهما أحياناً الصندوق ده بيبقى عندهم زي ما انت قولت لجنة بتبص على كل الحاجات دي واللجنة دي فيها شيوخ ومشايخ وحاجات كده فاهمين اصلاً في التمويل الإسلامي وبيكون عندهم معايير للفحص من ناحيتهم فأول لما هما بيبصوا ويتأكدوا من الكلام ده انت ممكن تحط فلوسك ومتخافش بس انهم يطهروا هما مش بيعملوا الموضوع ده عندنا
عمر: احنا بنعمله
نادر: انتو بتعملوه خلاص، يعني أحنا عندنا هو بيقولك النسبة اللي تطهرها وأنت تعملها بنفسك بس انهم يعملوها بالنيابة عنك هنا مبتحصلش
عمر: هو ممكن يكون في المنطقة العربية أكتر لأن في متواجد صناديق كتير ومجالس الإدارة لقوا ان أسهل على الناس انها تطهر على طول او تطلع النسبة دي وعلى فكرة النسبة دي بتبقى حاجات صغيرة جداً لو مدير الاستثمار في شركة مثلاً كانت تبع الشريعة وبعدين خرجت أو اشترى بالغلط شركة وحصل مثلاً بعد وقت قصير أوي حصل فيها تغيرات جزرية لازم تطلع دلوقتي على طول فاهم
نادر: بس ده بيحصل يعني كتير بس هو كل المشكلة لما يبقى عندك شركة متوافقة مع الشريعة وبعدين مبقتش متوافقة مع الشريعة لازم تشوف هي مبقتش متوافقة ليه؟ هي غير متوافقة من ناحية التمويل بتاعها، أخدت قروض زيادة عن اللزوم أو حاجه زي كده انت ممكن تستنى 3 شهور ولو متغيرتش تاني عشان هما عمتاً بيعملوا كل ربع سنة في تقييم مالي فلو هما غيروا تاني للمتوافق مع الشريعة خلاص متعملش أي حاجه بس لو هما متغيروش هو من الأراء الموجودة ان انت تبيع وتطهر أي حاجه فوق المكسب اللي كان من 3 شهور اللي فاتوا وهو ده اللي بيحصل يعني لما بيكون في لجنة اصلاً بتبص على الحاجات دي بس هو صعب لما واحد يشتري الشركات بنفسه وهو يتابع من يوم للتاني
عمر: ما أنا بالنسبالي وحتى أنا بنصح الناس دايماً اللي بيسمعونا حتى في الحياة عموماً في موضوع الاستثمار إن انت ممكن تستغل وجود صندوق استثمار متداول على البورصة انك تحاول تاخد زي ما بيقولوا عوائد السوق على المدى الطويل في قطاع معين أو في سوق معين أحسن وكل ما البحث اللي ممكن الواحد يرجعله على مدار 15 / 20 / 30 سنة غالباً عوائد السوق بتبقى من أفضل حاجه للناس العادية هنا احنا بس بنحاول نزود ان الحاجه ممكن تبقى إسلامية وفي قطاعات معينة للناس اللي حابه تخش تستثمر بهذه الطريقة
25:53
طيب احنا اتكلمنا كده على الدهب واتكلمنا على الفضة، اتكلمنا إن الدهب والفضة والأسهم الـ 3 دول موجودين على البورصات، في صناديق متداولة إسلامية للأسهم والسندات؟
نادر: في مجموعة حاجات ممكن الواحد يشغل فلوسه فيها ويتطمن أنها تكون حلال بس على حسب البلد اللي أنت فيها هو ده اللي بيحددلك لو تقدر انك تستثمر في في الحاجات دي ولا لأ
عمر: تمام، في إيه تاني ممكن مثلاً نقول العقارات أو الأراضي، البيوت، الوحدات التجارية، المكاتب كل دي طبعاً مفهاش مشكلة من الناحية الإسلامية صح؟
نادر: في مشاكل لو انت بتتكلم على الصناديق دي هنا في كندا عشان هنا لما معظم الوقت يكون في شركات اللي هما بيسموها صناديق الدخل العقاري هما بيشتروا كل الأراضي بتاعتهم بعقود من البنك وكل ما الأسعار بتطلع بيطلعوا الفلوس بطريقة غير إسلامية وبيروحوا يشتروا حاجات تانية فلازم إن أنت تكون متأكد جداً إن نموذج الأعمال بتاع الشركات دي قبل ما انت تشتري بالعادي فاحنا هنا في صندوق دخل عقاري حلال تبع اس بي آر إي وفيه 21 شركة وعمتاً في زي فوق الـ 1000 صندوق دخل عقاري هنا في السوق عندنا ولما تلاقي هما اشتروا إيه، هما اشتروا الشركات اللي بتكون عندها 100% ملكية من العقار وهما بس بيكسبوا من الإجارة أو بيكسبوا من حاجه تانية ففي صناديق متخصصة انها بتشتري مستشفيات، وبعد كده عندك اللي هما التخزين العام فده هو مجرد انهم عندهم أراضي أنت بتأجرها عشان تروح تحط حاجاتك فيها لما مبيكنش عندك مكان في البيت أو بتروح الخدمات اللوجستية فهما بيبقوا عندهم الأراضي زي الشركات زي أمازون
عمر: فلازم تكون متأكد من الفكرة نفسها ورا الصندوق
نادر: بالظبط، فهي لو مجرد شركة عندها عماير للإيجار تجاري وسكني والكلام ده معظم الوقت هما بيتسلفوا فلوس وبيشتروا فوق العقار فهما داخلين في قروض بالهبل يعني ميقدروش يعملوا كده بالطريقة الإسلامية عمتاً إلا لو أنت بتتكلم على يمكن في الدول العربية ممكن بيعملوها بالمشاركة عشان انت متقدرش تعمل تمويل بالمرابحة مينفعش فلو هما عاملين الهيكلة دي ينفع نظرياً إن يكون في حاجه زي كده بس صعب التنفيذ بتاعه
عمر: طيب لو بقى بعيداً عن صناديق اللي بتشتري العقار، لو انا بشتري العقار بنفسي بروح أتملك العقار
نادر: آه طبعاً لو اشتريته بأي طرق من اللي اتكلمنا عليها مشاركة، مرابحة ينفع، لو أنت دخلت مع أصحابك وكل واحد حط نسبة واشتريتوا كل حاجه مع بعض، أو لو انت اشتريته كله كاش فالمكسب بتاعه حلال
29:33
عمر: تمام، تعالى نتكلم بقى على الاستثمار في الشركة، نادر بيعمل مشروع وأنا عايز أحط فيه فلوس ده نوع من أنواع الاستثمار
نادر: الشركات الناشئة بقى اللي هي رأس المال الخاص اللي محدش بيشوفها، طبعاً انت لازم قبل ما تحط فلوسك في الشركات دي لازم تعرف لو اصلاً هتعمل حاجه حلال ولا لأ يعني هل هيكون في شك فيها يعني أنا لو عايز أعمل شركة يعني مثلاً نقول هنعمل شركة أبحاث للسرطان، ويعني احنا عندنا تكنولوجيا ممكن تساعد إن أنت تبحث جوه الموضوع ده فده طبعاً حاجة كويسة بس لو انا قولتلك اني هعمل حاجه زي أف تي أكس هعمل شركة كريبتو طبعاً في شك في الموضوع انه يكون إسلامي عمتاً فأنت تجرب تتجانب حاجه زي كده وطبعاً لما انت بتعمل شركة ناشئة كل الأصول بتبقى كاش يعني هو لما انت بيبقى عندك مكسب لما واحد يكون عنده كل الكاش ده في فوايد بتطلع فلازم تطهر الفوايد اللي بتطلع من الكاش الموجود لغاية ما الشغل الأساسي بيبقى ظاهر لما انت تبتدي يكون في ربح جاي من أصل الشركة هتبقى إيه فده بقى تاخد بصه عليه اللجنة اللي هي الاسلامية اللي بتبص على الشركات وتشوف التمويل بتاعهم وبتحددلك لو هو حلال ولا لأ، لو حلال كويس لو مش حلال طلع فلوسك قبل ما هم يبتدوا يربحوا شوف اللي هو السعر بتاع السهم بتاعك كان كام في الوقت ده
عمر: تمام، يبقى اتأكد من النشاط واتأكد من طريقة إدارتهم للفلوس أن متبقاش فيها حاجه ولو هي مش بأيدي كواحد مشارك أطهر نصيبي اللي جاي من الحاجات التشغيلية
نادر: صح
عمر: طيب أعتقد احنا كده غطينا حاجات كتير من الأسئلة اللي كانت في دماغي وكالعادة لو في حد عنده أسئلة يبعتلك على طول على الصفحة بتاعتك احنا هنحط في الشو نوتس بتاعتنا العنوان بتاعك وطبعاً بنكرر إن ده كله هو اجتهاد وبحث الموضوع لا ينتهي من العلم والتعلم والكلام ده كله والأدوات المالية مع الوقت بتتغير وبتطلع حاجات جديدة
نادر: وبص احلى حاجه لو انت بصيت على الصفحة بتاعتي لو من أول لما انا ابتديت من سنتين كان عندي آراء كتير اتغيرت وانا مشيلتش الفيديوز عمتاً عشان الواحد فعلاً ممكن آراء تتغير
عمر: في حاجات ممكن تكتشفها أو بتتعلمها وبتلاقي آراء وهكذا.. تمام، احنا كلنا بنجتهد طبعاً في الحتة دي و هكرر تاني حلقة الزكاة من أحلى الحلقات اللي عملناها وكانت حلقة جميلة وان شاء الله دي برضه تبقى من الحلقات الحلوة اللي الناس تتبسط بيها أشكرك جداً يا نادر ولو في حاجه تحب تختم بيها يعني هسيبك انت تختم النهاردة
نادر: بص هو مفيش ختام احسن من اننا نصلي على الرسول عليه الصلاة والسلام، اللهم صلي على سيدنا محمد وعلى أهله وأصحابه اجميع
عمر: عليه الصلاة والسلام، شكراً جداً يا نادر على وقتك معانا وإن شاء الله نشوفك تاني ميرسي جداً
نادر: إن شاء الله
Translation of some words and terms:
Sharia Compliant متوافقة مع الشريعة الإسلامية
Topic الموضوع
Checking And Savings التحقق والتوفير
Mortgage رهن
End Goal الهدف النهائي
Shares الأسهم
Rent To Own الإيجار المنتهي بالتملك
Variable Profit ربح متغير
Finance تمويل
Lease الايجار
West الغرب
Own تمتلك
Asset الأصل
Dealer Finance تمويل الوكلاء
Financing Arm ذراع التمويل
Makes More Sense أكثر منطقية
Payments المدفوعات
Penalties العقوبات
Physical Gold ذهب حقيقي
Gold Bar سبيكة الذهب
Equities الأسهم
Portfolio استثمارات
Financial Sector القطاع المالي
Revenue عائد
Dividend عائد / أرباح
Screening Criteria معايير الفحص
Financial Assessment التقييم المالي
Exchanges البورصات
Collection مجموعة
Real Estate Income Trust - Reits صناديق الدخل العقاري
Business Model نموذج الأعمال
Ownership ملكية
Public Storage التخزين العام
Logistics الخدمات اللوجستية
Commercial تجاري
Residential سكني
Refinance تمويل
Execution تنفيذ
Startups الشركات الناشئة
Private Capital رأس المال الخاص
Research Firm شركة أبحاث
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #متوافق_مع_الشريعة_الإسلامية