37. ميزانيتك : إزاي وليه؟
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
مع بداية 2022 حبينا نبدأ معاكوا السنة الجديدة بموضوع ناس كتير مستنياه منا ومن أكتر الاسئلة اللي بتجلنا "أنا مش عارف أعمل ميزانية ، ابدأ منين وازاي؟" في حلقة النهاردة بنعرّف المزانية ، ازاي تعمل ميزانية؟ إيه فوايد الميزانية؟ إيه أهداف الميزانية ؟ إيه اللي أنت محتاج تحققه من الميزانية؟ وبنرد على كل التساؤلات الخاصة بالميزانية
00:45 المقدمة -
01:37 ليه بنعمل الميزانية؟ -
03:11 إستراتيجية وضع الميزانية -
05:00 لازم توازن بين أهدافك قصيرة الأجل وأهدافك طويلة -
06:30 الميزانية هتساعدك تتقاعد بشكل أحسن -
07:12 الميزانية هتساعدك تصرف بطريقة اذكى -
08:32 الميزانية هتساعدك تحمي وتأمن عائلتك -
09:09 الميزانية هتساعدك تحسن جودة حياتك -
09:32 الميزانية هتساعدك تزود التفاعل بينك وبين شريكك -
10:32 الميزانية هتساعدك تبدأ مشاريع جانبية -
13:18 الدخل السلبي -
14:58 أهم النسب في ميزانيتك؟ -
17:30 لازم تفهم أنت بتعمل ميزانية ليه ومقتنع تماماً -
18:44 خطواتك لإعداد الميزانية -
19:11 الميزانية الأشهر (50 – 30 – 20) -
19:44 %50بنود الـ -
23:30 %بنود الـ30 -
27:17 %20بنود الـ -
31:14 الخاتمة -
حلقة النهاردة هي بداية الكلام عن الميزانية ، استنونا الحلقة الجاية إن شاء الله هنتكلم على الميزانية بشكل عملي أكتر وهنمشي خطوة بخطوة مع بعض وهنطبق الميزانية على ملف اكسل تقدروا تحفظوه عندكوا وتطبقوا عليه الميزانية بتاعتكم
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
اهلاً بيكوا في حلقة جديدة من بودكاست كلام ينور بمناسبة بداية السنة الجديدة حبيت ابتدي معاكوا السنة إن احنا نتكلم على الميزانية ازاي ممكن تعمل ميزانية؟ إيه فوايدها؟ إيه اللي أنت محتاج تحققه؟ إيه أهدافها؟ وكل الحاجات دي ، ومن أكتر الاسئلة اللي بتجلنا ديماً اننا مش عارفين نعمل ميزانية ، أبتدي منين؟ فتعمدت كده مع بداية السنة إن الناس تبتدي تفكر في 2022 بطريقة مختلفة ، تعمل ميزانية في أول السنة وتحاول تلتزم بيها أنا عن نفسي بقعد كل يناير تقريباً أعمل العادة دي فتعمدت أعملها معاكوا واحده واحده كده نمشي مع بعض بخطوات بسيطة نشوف احنا ممكن نوصل لإيه
01:37
أول حاجه عايز أتكلم فيها في الحلقة دي احنا ليه بنعمل ميزانية فكر معايا كده أنا ليه بحط ميزانية وهرجع ديماً بمثال رياضي أنا لو بلعب ماتش ومحتاج أنفذ حاجه في الماتش ده إيه اللي أنا بعمله؟ أنا بفكر إني بضع خطة في الأول بيبقى عندي مدخلات بدخلها والنظام بتاعي بيطلعلي مخرجات يعني مثلاً هقول أنا بلعب ماتش كورة في 11 لاعب مين الـ 11 لاعب اللي هيلعبوا اساميهم إيه هحطهم في التشكيل ، هحط الخطط اللي هلعب بيها وبعدين هيطلعلي بعد الماتش نتيجة المباراة
أنا هنا لازم أفرق ما بين حاجتين في فرق كبير جداً ما بين الخطة وما بين النتيجة بتاعة الخطة في حلقة النهاردة عايز أتكلم أكتر عن الخطة ازاي نعمل الإستراتيجية بتاعتي ، زي ما بتقعد تذاكر أنت ممكن تقعد طول السنة بتذاكر وأنت في الجامعة أو المدرسة وبعدين الإمتحان هو النتيجة بتاعة المذاكرة دي نفس الكلام بالنسبة للميزانية أنت بتحط توقعات معينة وبعدين بتقارنها بالحقيقة اللي هتحصل في الحياة
وده معنى الميزانية بشكل بسيط عبارة عن توقعات للصرف بتاعي أو تحديد الفلوس بتاعتي هتروح فين ، بوظف كل دولار أو جنية أو درهم داخلي لوظيفة معينة
03:11
أول حاجه في الميزانية بتاعتك وأنت بتعملها لازم تكون تحفظي بمعني أخر بتحط فيها المثال الأسوأ في الوضع ده بمعنى إيه؟ لو هنتكلم مثلاً على فاتورة التليفون بتاعتك أنت هتبص على السنة اللي فاتت كده هتلاقي فاتورة الموبايل بتاعتك 100 ممكن تحط المتوسط بتاعها كل شهر 100 طبعاً هي متغيره بتطلع وبتنزل ، الكروت اللي أنت بتشحنها بتطلع وبتنزل فهنقول مثلاً إن المتوسط بتاعها السنة اللي فاتت كان 100 أنا عايزك وأنت بتبني الميزانية تحط رقم أعلى شوية من 100 تحط مثلاً 120 أو 115 يبقى أول حاجه في الميزانية لازم تبقى بتحط فيها المثال الأسوأ للبند ده
تاني حاجه عايز الميزانية بتاعتك دي تبقى ميزانية حقيقية ممكن تنفذها ، مش عايزك تقعد تحط أرقام ملهاش علاقة بالواقع
تالت حاجه عايزها تبقى بسيطة وواضحة ، سهلة إنك تفهمها ، سهلة إنك تديها لحد تاني ويفهمها
الهدف بتاع الميزانية دي إنها بتساعدك على تنمية التحويش من الدخل بتاعك أو الجزء اللي أنت بتاخده في الأخر بعد ما بتطلع مصروفاتك أنت بتحاول تعظم ثروتك أو الباقي من الدخل بتاعك
05:00
عايزك برده تعمل توازن ما بين الأهداف قصيرة الأجل والأهداف طويلة الأجل يعني مينفعش يبقى كل حاجه في الميزانية بصه على الشهر بشهره ، أنا عايش الشهر بشهره وأنسى المدى الطويل ، ومينفعش برده أكون ناسي حياتي ومصاريفي اللي هتحقق لي نوع معين من السعادة أو من الرخاء في حياتي وأحوش بس .. فلازم وأنت بتعمل الميزانية دي لازم توازن بين الأتنين
05:36
أخر حاجه مهمه في الميزانية دي إنك لازم تبقى مستمتع وأنت بتعملها متعملهاش وأنت مضايق متعملهاش عشان دي حاجه صعبة عليا ، أنا عايزك تتعرف على فلوسك وتقعد مع فلوسك تتكلم معاها تتفرج عليها تشوف بجد أنت بتصرف في إيه تحاول تنزل في حاجات وتطلع في حاجات عشان أنت بس أبتديت تبص على الأرقام فلازم الموضوع يبقى لذيذ لو الموضوع بالنسبالك هيبقى عبء أنت مش هتنفذ الميزانية دي ودي أهم نقطة في الحديث ده كله لازم الموضوع يبقى بسيط وسهل وممتع أنا عارف إن التعامل مع الأرقام غلس وعارف إن مش أي حد يقدر يعملها بس مع الوقت أنت هتبتدي العادة دي هتلاقي إن السنة اللي وراها واللي وراها الموضوع بيبقى ألطف وأسهل وأحسن وده من خبرتي أنا أول ما أبتديت مكنش بالنسبالي الحاجات دي لذيذة يعني
06:30
طيب احنا كده أتكلمنا على شكل الميزانية هيبقى عامل ازاي أنا بس بحط البداية دي لأن النقط دي مهمه بالنسبالي إن انت تبقى عارفها ودي من واقع خبرتي وأنا ببني الميزانية بتاعتي يعني طيب هديك أهداف معينه إن أنا بعمل الميزانية دي ليه وأنت ممكن تحط الأهداف بتاعتكوا كده على جنب كل واحد هيبقى عنده أهداف معينه فأنا بديك فكرة ازاي تفكر في الأهداف يعني مثلاً في إن أنت تتقاعد بشكل أحسن ده هدف من أهداف الميزانية لأن بيبقى عندك أهداف معينه أو حاجه معينه بتقول أنا عايز أتقاعد
07:12
تاني هدف ممكن نفكر فيه إن أنا ازاي اصرف فلوسي بطريقة اذكى بمعني إن انا لما حطيت الميزانية بتاعتي وبصيت على أرقامي لقيت إني بصرف على بنود معينه أكتر ما أنا متخيل أصلاً إني بصرف فيها وسايب حاجات تانية في الحياة أنا بحبها اصلاً وعايز أعملها مبصرفش عليها يبقى الميزانية دي هتساعدك تصرف بطريقة اذكى
مثال أنا عملت الميزانية بتاعتي لقيت إني بطلب أكل كل شهر برقم كبير أنا مش مصدق اصلاً إني بطلب بالأرقام دي فلقيت إن ده بند أنا مش عايز اصرف عليه أنا ممكن أبطل أطلب أو أستهلك الأكل اللي ممكن في الأخر ميبقاش مفيد ليا وأبتدي أكل في البيت أكتر أو أيا كانت الطريقة اللي أنت هتعملها ولقيت إن في بند تاني زي مثلاً أروح الجيم أو كنت عايز أسافر أو أخد كورس أو اعمل أي حاجه في التطوير الذاتي بتاعتي لقيت إني مش بصرف عليها بالطريقة الكافية ، عايز اشتري كتب ، عايز أخرج مع اصحابي أيا كان الهدف بتاعك.. الميزانية هتساعدك تفهم أنت بتصرف على إيه لأن 95% من الناس مش بتابع اصلاً هي بتصرف على إيه
08:32
النقطة التالتة من الأهداف اللي الميزانية ممكن تحققهالك إنك تحمي عائلتك أو تبقى نوع معين من أنواع التأمين ، أنت لما بتفهم انت بتصرف في إيه الدراية المالية بتاعتك بتعلى فأنت كده كرب أسرة ، أو لو عايش لوحدك أيا كان أنت كده بتعمل نوع معين من التأمين على المجموعة المسؤول عنها لأن أنت بقيت مادياً أعلى وفاهم أكتر فده نوع من أنواع التأمين اللي أنا بحسه
09:09
النقطة الرابعة ان أنت هتحسن من الجودة بتاعة الحياة بتاعتك زي ماقولنا في المثال قبل كده لما أنا لقيت حاجات معينه كنت عايز أصرف عليها مبصرفش عليها والحاجات دي هتنمي في ذاتي اصلاً الميزانية هتساعدك توصل للحاجه دي فهي هتحسن من مستوى جودة الحياة بتاعتك
09:32
النقطة اللي وراها لو حضرتَك متجوز أو حضرتِك متجوزة هيحصل تفاعل ما بين الأزواج أعلى بكتير لما يكون عندكوا ميزانية أنتو الأتنين مسؤولين عنها وبتتكلموا فيها وبتصرفوا على بعض ليه؟ لأن أنت هنا رفعت حاجات مش واضحة بينكوا في صرف الفلوس لكن لو قعدتوا أول السنة مع بعض حطيتوا الميزانية بتاعتكوا مع بعض ، حطيتوا الأهداف مع بعض دي بتشيل جزء كبير من المشاكل اللي أنا بشوفها ما بين الناس .. فـ وجود ميزانية من وجهة نظري بتساعد الأسرة أنها تفهم هي بتصرف على إيه وإيه أهدافها وإيه اللي عايزين يوصلوله مع بعض لكن لو الحاجات دي مش مكتوبة أو الناس مش بتبص عليها عمر ما الرسايل دي بتوصل لأن احنا مش بنبقى مركزين وبنتوه في الحياة عموماً
10:32
النقطة الأخيرة في الأهداف اللي أنا كاتبها أنها ممكن تخليك تبتدي مشاريع جانبية وأنت مش واخد بالك بمعنى إيه.. أنت النهاردة كان عندك ميزانية والميزانية مش بتصرف فلوسك بطريقة صح لكن بعد ما وفرت وعرفت أنت بتعمل إيه وكده لقيت عندك جزء من الدخل بتاعك فائض ممكن تستثمره في فكرة أنت كنت عايز تعملها بقالك سنين ممكن تكون عايز تفتح مشروع صغير ، ممكن تكون عايز تعمل حاجه على الإنترنت ، عايز تبيع سلعة معينة ، عايز تستورد أو تصدر أيا كان اللي أنت عايز تعمله لما بتلاقي الفلوس دي موجودة في الفائض بتاعك أنت وقتها بتتجرأ وتبتدي المشروع.. جزء كبير جداً من عدم بداية الناس للمشاريع أنها معندهاش تمويل لكن لو حضرتك بصيت على الميزانية بتاعتك ولقيت فيها حتة ممكن تاخد بيها مخاطرة معينة ممكن تفتحلك فكرة في دماغك تخليك تعملها
11:33
يبقى دي الأهداف اللي أنا شايفها من أهم الأهداف وأنا ببني ميزانيتي ولو عندك أهداف أخرى ممكن تبعتهالي أو ممكن تحطها على الصفحة بتاعتنا زي ما أنت عايز يعني شارك برأيك إيه الأهداف اللي ممكن تكون شايفها مهمه للميزانية خاصة لو كنت بتعمل ميزانية قبل كده
11:55
الأهداف تاني سريعاً أتقاعد بشكل أحسن ، أصرف فلوسي بشكل أذكى ، أحمى عائلتي بإنها بتقلل المخاطرة اللي في الحياة ، بتحسن مستوى المعيشة بتاعي بشكل عام ، بتحسن التواصل مع زوجتي أو زوجي ، بتساعدني أبتدي مشاريع كان نفسي أبتديها وعمري ما أبتديتها والمشاريع دي على فكرة ممكن أحط فيها الاستثمار في الذات زي مثلاً عايز أخد كورس كودينج ، كورس تصوير ، عايز ألون أي حاجه أنت عايز تعملها
12:30
الميزانية بشكل بسيط هي إيه.. هي عبارة عن جزئين جزء دخل ليك وجزء مصروف بمنتهى البساطة ، الفرق ما بين الدخل بتاعك والمصروف هو ده الفائض النقدي بتاعك اللي أنت ممكن تعمل بيه حاجات.. طيب بالنسبة للدخل الدخل حسابه أسهل بكتير من المصروف لأن بنود الدخل ديماً قليلة ولكن بنود المصاريف ديماً كتير بمعنى إن أنا لو موظف أنا عندي دخل من وظيفتي ، أنا كل شهر عندي وضوح في الدخل بتاعي ، طب أنا لو صاحب عمل الموضوع هيختلف شوية لازم أخد توقعات للدخل بتاعي ، لو أنا بشتغل مستقل نفس الكلام لازم يبقى عندي توقع
13:18
إيه كمان ممكن يجيلي من الدخل؟ أي حاجه بتجيلك "دخل سلبي" زي استثمار كنت عاملة في العقار ، في الأسهم ، في شهادات الاستثمار أو الودايع ، أي نوع من أنواع الدخل السلبي ده يعتبر دخل ، عندك مثلاً حصة في مشروع معين والمشروع ده بيوزعلك كل شهر رقم معين.. يبقى الجانب بتاع الدخل ده سهل حسابه ولكن المصاريف هي اللي ديماً بتبقى معقدة عشان بيبقى عندنا بنود كتير وكل واحد فينا عنده بنود بطريقة مختلفة وكل واحد فينا في مرحلة عمرية عنده طريقة صرف مختلفة يعني مينفعش أقول واحد لسه خارج من الجامعة هو عنده نفس البنود اللي عند واحد عنده مثلاً طفلين أو 3 أطفال فكل واحد في حياته في مرحلة معينة بيبقى عنده نوع معين من المصروف لازم يتسجل بالطريقة اللي هو عايش بيها وأنت كل سنة ميزانيتك هتتغير يعني حضرتك مثلاً لسه حديث الزواج فأنت ومراتك ولكن بعد سنة ربنا رزقكم بطفل الطفل ده هيبقى عنده بنود جديدة كتيرة هتخش على الميزانية بتاعتك ، فالميزانية بتاعتي لازم أبص عليها سنوياً لازم أقعد القاعدة دي تعالوا نقول في يناير أو في أي وقت أنت تختاره خلال السنة تقعد مع نفسك تشوف إيه اللي أتغير في ميزانيتك وتبتدي تعمل مراجعة للبنود اللي جاية
14:58
وأنت كمان بتفكر في الميزانية عايزك تفكر بالنسب المئوية يعني مش بس نفكر بقد إيه احنا بنصرف يعني أنا مثلاً دخلي 1000 في الشهر مش بس هفكر إنه 1000 أنا هفكر إن ده 100% من دخلي طيب لقيت مثلاً مصروف عربيتي 500 الـ 500 دي تمثل قد إيه نسبتها من دخلي يبقى أنا مش هفكر في الأرقام بشكل مطلق لأ أنا كمان عايز أبص عليها كنسب مئوية من الأساس اللي أنا ببص عليه وهنشوف مع بعض لما نمشي في المثال الرقمي بعد شوية هنشوف احنا ممكن نفكر في النسب المئوية دي ازاي
ليه أنا بقولك كده عشان في واحد عايز يركب عربية غالية وواحد مش عايز يركب عربية غالية ، واحد عايز يجيب بيت كبير وواحد مش عايز يجيب بيت كبير أنا بالنسبالي متفرقش أختيارك شكله عامل ازاي يفرق معايا نسبته قد إيه من ميزانيتك هي دي النقطة المهمه ، وزي ما بيقولوا كده مفيش قانون ثابت لنسبة معينة يعني هقولك لازم تجيب عربية بـ 10% من دخلك بس لأ هو ديماً بيبقى في نطاق ما بمعني إني بقولك مثلاً لو هتجيب عربية مسموح ما بين 8% – 15% من دخلك مثلاً يعني أنا بضرب أي مثال ، لو هتأجر بيت بكل مصاريفه وبالحاجات اللي حواليه والكلام ده كله هنقول مثلاً من 25% – 35% من دخلك كمثل ، الراجل اللي عايش على 25% هو أختار إنه يعيش على 25% الراجل اللي أختار 35% هو أختار يقعد على 35% فأنا مش هلزمك إن الرقم ده لازم يطلع بالحاجه الفلانية تاني لأن كل واحد في مرحلة مختلفة من حياته فأول حياتك غالباً احتياجك للبيت بيبقى أقل بكتير من احتياجك وأنت عندك 40 و 50 سنة فأنت لازم تبقى فاهم إنها بتبقى نسبة ما بين رقمين أنت ممكن تختارها ولكن متجيش تقولي أنا مثلاً العربة النسبة بتاعتها من 8 – 15% بس أنا عايز أجيب عربية بـ 30% أنت كده كسرت قاعدة كبيرة في الميزانية بتاعتك وهتدفع تمنها من حتت تانية أنت هتخسرها
17:30
طيب بعد المقدمة الطويلة للحاجات اللي بتميز الميزانية والكلام ده كله اللي بالنسبالي مهم جداً لسبب إنك لو مفهمتش أنت بتعملها ليه ملهاش لازمه اصلاً يعني لازم تبقى مقتنع تماماً بأنت بتعمل ميزانية ليه وبتعملها ازاي وهي هتحققلك إيه لو الحاجات دي أنت مقتنعتش بيها متعملش ميزانية فعشان كده أنا تعمدت أبقى أطول شوية في المقدمة بتاعتي أهم من اني أتكلم في أنت ازاي تعملها فيارب الرسالة دي بس تكون وصلت
18:08
طيب احنا قولنا هنعمل إيه؟ هيبقى في مدخلات للميزانية وفي مخرجات هتطلعلي أول حاجه لازم أعملها لازم اجمع معلومات عن نفسي في أستهلاكي في السنة اللي قبليها مثلاً لازم كمان أعمل تقسيمة لأنواع المصروفات اللي أنا عايزها كل واحد زي ما قولنا عنده حاجات مختلفة فأنا هختار أنواع المصروفات اللي أنا هصرف عليها وهديك مثال دلوقتي
18:44
يبقى أول حاجه جمعت المعلومات بتاعتي دلوقتي هعمل إيه بقى؟ هبتدي ابني ورقة مكتوب فيها الحاجات دي.. يبقى أنا بعد ما جمعت كتبت الميزانية بتاعتي
19:00
بعد ما كتبت الميزانية بتاعتي النقطة التالتة إني هبتدي أتابع الميزانية دي وأشوف أتحققت ازاي
دي الـ 3 خطوات بتاعتك في إن أنت تعمل ميزانية
19:11
أول نوع هنتكلم عليه من أنواع الميزانيات وده أكتر نوع مشهور موجود في كتب كتير من كتب تمويل الأفراد.. الميزانية أسمها 50 – 30 – 20 هتلاقوها أونلاين في كل حتة ، هتلاقي في مقالات كتيرة بتتكلم عليها.. أنا هاخد دي لأنها أبسط ميزانية ممكن تتعمل للناس وهي ينفع الناس كلها يبقى عندها نفس الميزانية بالطريقة دي
19:44
طب إيه هي الـ 50 – 30 – 20؟ 50% ، 30% ، 20% .. الـ 50% هي الإحتياجات الأساسية اللي متقدرش تعيش من غيرها ، يبقى 50% من دخلي هصرفه على الحاجات الأساسية اللي بتخليني أعيش طيب إيه أنواع المصروفات في الحتة دي هنلاقي مصروفات البقالة أو الحاجات اللي بشتريها للبيت الأكل والشرب والحاجات اللي بستهلكها في البيت ده نوع من الأساسيات ، السكن بتاعك سواء حضرتك شاري البيت أو مأجره مصروف له علاقة بإستحواذك على العقار اللي أنت هتعيش فيه ، التأمين على البيت ، الكهربا والماية ، التليفونات ، الإنترنت وأي مصاريف أخرى للتطوير جوه البيت محتاج أصلح حاجه بايظة والكلام ده كله يبقى ده تاني بند موجود في الإحتياجات الأساسية بتاعتي
20:54
الموبايلات ده تالت بند أو الإنترنت على الموبايل مش في البيت بقى ده برده بقى حاجه أساسية أنت تقدر تكمل بيها حياتك ، تعمل بيها شغلك ، تقدر تدخل دخل لازم يبقى عندك تليفون
21:07
رابع نقطة المواصلات ، المواصلات هنا فيها نوعين مواصلات عامة ومواصلات خاصة.. المواصلات العامة زي لو حضرتك بتاخد مثلا تاكسي أو أتوبيس للشغل أي حاجه بتحركك تقدر تحسب الإستهلاك الشهري بتاعك قد إيه في البند ده وتحطه كجزء من الميزانية بتاعتك
لو حاجه بقى خاصة أنا عندي عربية هنرجع للحلقة اللي أتكلمنا فيها على التكاليف بتاعة العربية هنلاقي جوه العربية في تمن العربية نفسه اللي هي المدفوعات اللي بدفعها شهرياً للعربية ، التأمين بتاعها ، البنزين ، قطع الغيار ، الخدمات ، الرخص بتاعتها ، مكان الركنة بتاعك سواء في الشغل أو البيت
يبقى البنود دي كلها أنا بشوف سنوياً أنا بصرف عليها قد إيه وبقسمهم برجعهم في الشهر يطلعلي رقم معين ده تكلفة العربية بتاعتي
أنا ليه بقسم المواصلات بتاعتي بالشكل ده عشان أبقى عارف العربية دي بتكلفني قد إيه كل شهر إن أنا استهلكها وبحطها كجزء من الميزانية بتاعتي وبشوف نسبتها قد إيه من الميزانية بتاعتي عشان أشوف هل أنا بصرف كتير ولا قليل على الموضوع ده
22:23
بعد العربية هنمشي من المواصلات هنروح على التأمينات لو عندك أي نوع من التأمينات بتدفعهم دي من الحاجات الأساسية اللي متقدرش تعيش من غيرها لأن دي حاجه أساسية بتدفع عليك كل شهر فلو عندك تأمين على الحياة لو عندك تأمين طبي لو عندك أي نوع من أنواع التأمينات هتحطها في البند ده
22:44
بعد كده هنقول في المصاريف أساسية للأطفال بتاعتك ومصاريف الأطفال هنا بتبقى لو أنا لازم أوديه حضانة ، ولازم أجيبله أكل أو شرب وأجيبله لو هو طفل صغير لبس أو حفاضات أيا كان هتجيب إيه للطفل بتاعك دي من المصاريف الأساسية اللي هتخليك عايش وهتخليه هو كمان عايش فأنا هحط الحاجات دي من الأساسيات بتاعة الحياة
23:13
لو عندك أي مصاريف تانية زي لو عندك مساعدة في البيت ، لو عندك حد بيجي ينضف البيت مثلاً مرة أو اتنين في الأسبوع ، عندك حد مقيم معاك كحد بيساعدك في البيت ده برده من الأساسيات اللي أنت لازم تضيفها في الحتة دي
23:30
يبقى دي الـ 50% ، هحط إيه بقى في الـ 30% حاجات أنا عايزها تساعدني إني أعيش الشهر بتاعي ولكن هي مش أساسية للمعيشة زي اللبس لو بتصرف على كماليات معينة زي بتشتري ساعة ، جزمة أي حاجه ليها علاقة بالإستهلاك بتحطها هنا ولكن دي تقدر تعيش من غيرها ، بتحطلها رقم كل شهر أنا عايز أصرف كذا في الشهر
هتقولي أنا صعب أوي أعرف ماشي هقولك أرجع السنة اللي فاتت مثلاً شوف أنت نزلت مرتين أو تلاتة في السنة صرفت فيهم رقم معين خد كده متوسط وقسمة على الشهر هتعرف أنت بتصرف قد إيه تقريبا في الشهر.. يعني مثال أنا روحت صرفت 1000 مرة وصرفت 3000 وصرفت 2000 مرة تانية أدي 6000 ، صرفت 6000 السنة اللي فاتت هاخدهم أقسمهم على 12 هيطلعلي 500 يبقى هحط 500 في البند ده كل شهر
نفس الكلام على الخروج أنا بخرج اتعشى بره مش بتعشي جوه البيت بتعشي بره مع أصحابي هحطله رقم ، بروح السينما ، بروح حفلات ، بعمل أي حاجه بحطلها رقم ، عندي حاجه زي الجيم ، أو بدفع أشتراك في نادي معين أو في هواية معينة بحطلها رقم ، لو بسافر مثلاً مصاريف طيران معينة ، أوتيلات ، عربيات أيا كان الحاجه اللي بتعمله في السفر هتحطله رقم
البند اللي بعد عندك مثلاً نتفليكس ، أمازون ، شاهد أي حاجه من الحاجات اللي بتجيبها على التلفزيون تقدر تجمعهم وتحطله رقم برده
حاجه تانية زي العناية الشخصية لو بتروح مثلاً للكوافير أو الحلاق أو بتروح منتجع صحي أو بتعمل أي حاجه ليها علاقة بالعناية الشخصية بتاعتك حطها برده
ديكورات منزلية لو أنت بتطور البيت ، عايز مثلاً تجيب صور ، عايز ترمم حاجه ، عايز تشتري تليفزيون جديد أي حاجه تعتبر شوية رفاهية مش من الأساسيات هحطها برده هنا
لو عندك حيوان أليف بتوديه مثلاً يعمل نشاط معين حط برده التكلفة بتاعتة هنا
يبقى أنا هنا في الـ 30% هي دي الحتة اللي أنا بحط فيها الحاجات اللي أنا مش عايزها أساسية ولكن هي بتحققلي نوع من السعادة قصيرة المدى ، أنا هنا ليه بحطها؟ عشان أفرق بين الأساسي واللي مش أساسي ممكن تلاقي واحد بيصرف كتير جداً على الأساسي ومبيصرفش خالص على نفسه ، والعكس واحد قاعد عمال يصرف إستهلاك بس والبنود الأساسية بتاعتة هو مش صارف عليها بشكل كفاية فأول معلومة هتعرفها لما تحط الأرقام دي قدامك في ميزانية هتعرف التوازن بتاعتك ما بين العيشة الأساسية بتاعتك والرفاهية هتبص على الأتنين هتعرف على طول أنت بتصرف بطريقة صح ولا غلط هنلاقي هنا إن الناس بتتكلم إن في 50% على الأساسيات و 30% على الرفاهيات طب الـ 20% اللي باقية دي إيه؟
27:17
الـ 20% اللي باقية دي عبارة عن الادخار بتاعك وهي دي الحتة اللي أنت عايز تطلع بيها من الميزانية بتاعتك الناس بتتكلم إن المتوسط مفروض يكون حوالين الـ 20%
طيب ازاي هصرف الـ 20% بتاعتي؟ أولاً هروح أدفع أي ديون عليا وخاصة الديون اللي عليها فوايد عالية يبقى أول حاجه ، طيب تاني حاجه هتيجي في الإهتمام إيه؟ إن أنا ابني صندوق الطوارئ بتاعي ، يبقى بعد ما أخلص إني أدفع الديون اللي عليا هبتدي أبني صندوق الطوارئ بتاعي
صندوق الطوارئ بتاعي زي ما أتكلمنا قبل كده هو من 3 لـ 6 شهور ، طيب أنا خلصت وبنيت صندوق الطوارئ بتاعي هعمل إيه؟ هبتدي أبني حساب التقاعد بتاعي لأن أنا النهاردة دفعت الديون اللي عليا وبقي عندي صندوق للطوارئ فهبتدي أحوش للمستقبل فهبتدي أبني حساب التقاعد بتاعي ، وبعد ما أوصل للرقم اللي يوصلني لحساب التقاعد بتاعي ولوعندي فائض أبتدي أخش في حتة إني أجيب أصول تانية عشان توصلني للحرية المالية ، ما أنا محتاج أصول تانية تبتدي تدخلي دخل عشان لو خسرت دخلي الأساسي يبقى عندي حاجه بتجبلي دخل فممكن وقتها أشتري بيت أعمل محفظة أسهم والحلقة برده بتاعة فئات الأصول هنلاقي فيها حاجات كتيرة مغطية الموضوع ده
طب أنا خلصت دي كمان فأنا ممكن أبتدي المشروع بتاعي وأعمل الفكرة بتاعتي ، طيب هل ممكن أبتدي الفكرة بتاعتي قبل ما ابني محفظة الدخل السلبي.. ممكن ، بس هل أنا أفضل إني ابدلها بصندوق الطوارئ أو بحساب التقاعد.. لأ
يبقى الـ 3 حاجات اللي أولانين بالنسبالي هما أساسيات في الحياة إني أدفع الدين العالي اللي عليا ، إن أنا أبني صندوق الطوارئ بتاعي ، أني أبني حساب التقاعد بتاعي.. لو عملت الـ 3 دول خد فلوسك أعمل بيها اللي أنت عايزة إن شاء الله لو عاوز تسيبهم لأي حد براحتك.. ليه؟ لأن لو معندكش الـ 3 حاجات دول هما دول اللي بيخلوك ديماً في مشكلة إن أنت حاسس إنك ديماً مش متأمن حاسس إنك قلقان أو خايف من المستقبل ، لكن لو عملت الـ 3 حاجات دول أنت هتبتدي تفكر بشكل أوضح إنك تشتري وتستثمر بقى وتفتح المشروع بتاعك ومعندكش أي مشكلة ده الترتيب بتاعي
طيب هنا أنت بتقولي 20% طيب أنا لو قعدت حسبت إن أنا صافي الدخل بتاعي ممكن أطلع منه 30% لقيت مثلاً عندي 40% أساسيات و20% كماليات فلقيت نفسي بحوش 40% خير وبركة إنت 40% في مقابل 20% اللي احنا المفروض بنستهدفهم فأنت كده عندك فائض أعلى في الادخار خير وبركة ، ولكن لو لقيت بقى العكس لو لقيت إن الفائض بتاعي هو 5% أو 10% لأ هنا أعتقد إنك محتاج تعيد أولوياتك وتطلع ميزانيتك بشكل معين إنها تكون على الأقل عندك 20% من الدخل بيطلع
طب وهتقولي أنا دخلي قليل مش عارف أوصل للحتة دي يبقى أنت محتاج تحاول تعمل مزج بين زيادة دخلك وتحاول تطلب زيادة في شغلك ، أو تحاول تدور على شغل أخر أو تعمل حاجه جانبية وفي نفس الوقت تسيطر على ميزانيتك الحاجتين دول مع بعض هيحاولوا يوصلوك للـ 20%
31:14
الحلقة الجاية أنا هتكلم على الميزانية ونمشي مع بعض كده خطوة بخطوة واحنا بنبنيها على جدول إكسيل وتقدر تحفظة عندك وترجعله وازاي تقدر تعمله ، فحلقة النهاردة أنا بس عايزك تفكر إيه الميزانية ، ليه الميزانية ، هل الكلام ده غريب أو صعب إن أنت تحققه ولا لأ وبداية الميزانيات مهمه جداً شكراً جداً جداً على وقتكم النهاردة وأشوفكم الأسبوع الجاي
Translation of some words and terms:
Practice ممارسة / عادة
Inputs مدخلات
System نظام
Outputs مخرجات
Conservative تحفظي
Worst Case Scenario السيناريو الأسوأ
Average متوسط
Wealth ثروة
Maximization of Wealth تعظيم الثروة
Short Termقصيرة الأجل
Long Term طويلة الأجل
Balance توازن
Develop تطوير
Quality جودة
Communication تواصل / تفاعل
Clear واضح
Disposable Income الدخل النقدي القابل للتصرف
Freelancer مستقل
Passive Income الدخل السلبي
Range نطاق
Introduction مقدمة
Categories تصنيفات
Data بيانات
Sheet ورقة
Personal Finance تمويل شخصي
Articles مقالات
Needs الاحتياجات
Grocery بقالة
Housing سكن
Transportation المواصلات
Services خدمات
Licenses رخص
Parking موقف سيارات
Medical طبي
Diapers حفاضات
Accessories مكملات
Travel Expenses مصاريف السفر
Streaming تدفق
Self-care العناية بالنفس
Spa منتجع صحي
Home Decorations ديكورات منزلية
Saving ادخار
Interest فائدة
Emergency Fundصندوق الطوارئ
Retirement Accountحساب التقاعد
Combination مزج
Spreadsheet جدول
Tracking تتبع
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #الميزانية