34. (إعادة)١٠ أخطاء شائعة تمنعك من الاستثمار
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة هي إعادة لحلقة رقم 5 بعنوان (10 أخطاء تمنعك من الاستثمار) بنتكلم في حلقة النهاردة عن بعض المفاهيم العامة المغلوطة والموروثات الفكرية الخاطئة في مجال الاستثمار المالي وازاي نتجنب الوقوع فيها
الهدف من إعادة الحلقات بيكون شيء متعمد لأسباب كتيرة زي أهمية الموضوع نفسه أو تجهيزاً لحلقات جايه ، ونظراً اننا هنتكلم في الحلقات اللي جاية إن شاء الله عن حاجات ليها علاقة بالاستثمار فحبينا نفكركوا بالحلقة دي كمان عشان الناس اللي بتسمعنا لأول مره تتابع معانا
حلقة النهاردة بتنقسم لجزئين جزء خاص بـ 5 مفاهيم هتمنعك تبدأ استثمار و 5 مفاهيم هتعيق وتأخر رحلتك في الاستثمار
مفاهيم هتمنعك تبدأ استثمار#
عشان استثمر لازم أكون غن-
متابعة الاستثمار بيحتاج وقت طويل -
أنا صغير/ كبير أوي إني ابدأ -
عشان استثمر لازم اكون خبير -
في الاستثمار مخاطرة كبيرة -
مفاهيم هتعيق وتأخر رحلتك في الاستثمار#
لازم اعمل فلوس بسرعة -
الأعتماد على العوائد التاريخية في توقع او ضمان العوائد المستقبلية -
أشتري رخيص وأبيع غالي -
مخاطرة أعلى = عائد أعلى -
هخسر السيولة بتاعتي بمجرد ما ابتدي -
تحديثات كلام ينور#
مؤخراً عملنا استطلاع رأي إيه صفحات السوشيال ميديا اللي حابينا نتوسع عليها ومن أكتر الإجابات كان فيسبوك وتويتر فاحنا استجابة لرغباتكم بدأنا فعلياً نفعل صفحة الفيسبوك بتاعتنا وعلى أول السنة الجديدة هنبدأ نفعل توتير وكمان خلال شهر أو شهرين إن شاء الله هنبدأ نعمل زي جلسات لايف (بث مباشرصوتي) ونتكلم مع الناس وناخد اسألتهم بشكل مباشر فتابعونا هتلاقوا كل اللينكات موجودة هنا وعلى موقعنا الإلكتروني كمان
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
اهلا بيكوا في حلقة جديدة من بودكاست كلام ينور حلقة النهاردة هي حلقة إعادة عنوانها (10 أخطاء تمنعك من الاستثمار) احنا تعمدنا نلعب الحلقة دي تاني لسبب انها من أكتر الحلقات اللي الناس سمعتها وفي نفس الوقت في ناس جديدة لسه بتسمع البودكاست لأول مرة وديماً في ميل كده أن الناس تسمع أخر حاجه نزلت وأنا بتعمد أشغل الحلقات دي من فترة لأخرى لأن الأهمية بتاعة الموضوع بالنسبالي كبيرة وبرده ممكن هتكون بتجهز حاجات للحلقات اللي جايه ان احنا هنتكلم شوية عن حاجات ليها علاقة بالاستثمار فأنا أتمنى أنها تعجبكوا تاني زي ما الناس سمعتها أول مرة وحتى لو سمعتها بنصح أنك تسمعها تاني لأنك برده مش هتبقى فاكر فيها كل حاجه
01:36
احنا مؤخراً عملنا استطلاع رأي إيه الصفحات بتاعة السوشيال ميديا نبتدي نتوسع عليها وكان من أكتر الإجابات فيسبوك وتويتر بحيث الناس ممكن تستهلك المحتوى بتاع البودكاست في أماكن تانية غير إنستجرام وفعلاً ابتدينا ننزل بوست بتاعتنا على الفيسبوك وإن شاء الله على أول السنة الجديدة هنبتدي نفعل الحساب بتاع توتير برده أنا بنصح الناس أنها تبتدي تتابعنا على الصفحات دي لأننا يمكن في وقت قريب كمان يمكن شهر أو شهرين هنبتدي ) جلسات مباشرة( أننا نقدر نتكلم مع الناس وناخد اسألتهم بشكل مباشر في حاجه على تويتر اسمها تويتر سبيسز (مساحات تويتر) بتبقى جلسة عامة مفتوحة للناس تقدر تخش فيها وتشارك زي اللايف (البث المباشر) بس هو بث صوتي مش فيديو فبنصح الناس انها تشترك حساب تويتر بتاعنا موجود برده في الشو نوتس وموجود على الموقع لو حضرتك حابب تتابعنا على الحساب ده ياريت نشوفكوا هناك بإذن الله وهسيبكوا مع حلقة النهاردة وهستنى ديماً التقييم بتاعتكوا
02:54
النهاردة هتكلم على مفاهيم عامة خاطئة عن الاستثمار ، المفاهيم دي موجودة من فترات من الزمن طويلة جداً مش حاجه موجودة النهاردة دي حاجة عبر الأجيال ممكن حاجات تورث ، متعلمنهاش في المدرسة أو في الجامعة ، مفاهيم بشكل عام خاطئة بشوفها في كل مستويات التعليم ما بين الناس بشوفها في كل مستويات الدخل ما بين الناس مش متركزة في جروب معين في الناس
03:24
لو عرفنا المفاهيم الخاطئة دي أعتقد أننا ممكن نتجنبهم بسهوله جداً هو أنا بس عايز أحدد الأول إيه هي الحاجات الغلط دي ونشوف نقدر مع بعض ازاي نتجنب الحاجات دي
03:39
أنا النهاردة في حاجات كتيرة جداً وأنا بدور إيه المفاهيم الخاطئة وبحاول أجمعهم وبحضر للحلقة دي في حاجات كتير جداً لقيتها ، أنا النهاردة أخترت 10 حاجات ، قسمتهم 5 حاجات تمنعك اصلاً أنك تبتدي تستثمر و 5 حاجات تانين لو ابتديت تستثمر وربنا كرمك وعديت المرحلة دي وابتديت تعمل أي حاجه ليها علاقة بالاستثمار في 5 مفاهيم تانية خاطئة ممكن تأخرك برده في طريقك للاستثمار فأنا النهاردة هبتدي وأنا تعمدت اتكلم على الحاجات دي بدري جداً في الحلقات بتاعتنا لأنهم مهمين جداً جداً في الطريق بتاعك في الاستثمار
04:22
أول حاجه ديماً بسمعها إن أنت عشان تستثمر وده أول مفهوم خاطئ بالنسبالي ، (عشان تستثمر لازم تبقى غني أو معاك فلوس - أنا معنديش القدرة المالية إني استثمر) ده أول مفهوم خاطئ من وجهة نظري من الحاجات اللي بتمنعك تخش تستثمر اصلاً السبب إن الناس ديماً بتبقى متخيلة أنا لازم يبقى معايا فلوس كتير عشان أعمل فلوس كتير ده اللي الناس بتسمعه ديماً ودي الأقاويل أو الأمثال اللي الناس بتسمعها (لازم أكون غني جداً عشان أوصل للمعلومة الصح) ، (لازم أكون معايا فلوس عشان أستحمل الخسارة) كل الكلام ده كلام خاطئ رحلتك في الاستثمار لازم تبتدي من نقطة معينة والنقطة المعينة دي لازم تبتدي حتى وأنت مش معاك فلوس خالص ، الناس بتستثمر ساعات أنها تاخد كورس أو بتصرف مثلاً على تعليم ولادها أو أيا كان بس هما عمرهم مفكروا طب أنا ليه بصرف الحاجه في الحته دي هي نوع من أنواع الاستثمار أنت بتستثمر في نفسك ، نفس الحاجه تطبق على الأسهم أو على السندات أو على الودايع أو العقار أو أي نوع من أنواع الاستثمار لازم تبتدي حتى لو مش معاك فلوس ، طيب تبتدي ازاي حتى لو مش معاك فلوس في طرق كتير جداً جداً من الاستثمار زي في الأسهم أو الودايع أو أيا كان تقدر تبتدي فيها بمبالغ صغيرة جداً ، يعني أنت ممكن تشتري سهم واحد السهم الواحد ده بـ 50 / 100$ أو 50 / 100 جنية أيا كانت العملة يعني فأن أنت تبتدي بالعكس أنت ممكن تبتدي صغير ، طب هتقولي طب ما أنا لو أبتديت صغير لازم أعمل مجهود وأنا معرفش!! ما صح أنت لازم تبتدي الأول تعرف الطريق فتبتدي بحاجه صغيرة فعلى مدار مثلاً 10 / 15 سنة لما تبتدي صغير مع الوقت هتبتدي تفهم أنت المفروض تعمل إيه ولما يبقى معاك فلوس كتير وقتها أو المحفظة بتاعتك كبرت بحجم معين وقتها هتكون عارف أنت بتعمل إيه .. ده أول حاجه
06:32
الحاجه التانية إن أنا محتاج أضيع وقت كبير جداً في إن أنا استثمر ، يعني هضطر أقعد أتابع استثماراتي كل يوم أفتح اشوف الأسعار طالعه نازلة إيه اللي بيحص وكده ، ده برده مفهوم خاطئ جداً جداً يعني ، لو أنت داخل فاكر أن الاستثمار يوم أو يومين أو شهر أو سنة أنت فاكر غلط ، الاستثمار ده حاجه طويلة الأجل بمعنى إن انت مثلاً لما بتشتري بيت مش بتفكر تبيعه بعد سنة ، أنت غالباً لما بتشتري بيت بتفكر تبيعه بعد 3 سنين ، 5 سنين ، 10 سنين أيا كان.. لما الواحد بيشتري أسهم أو بيحط فلوسه في حاجه تانية بيبقى ديما عايز (أمتى هبيع ، أمتى هتطلع ، أمتى هتنزل) وده مفهوم خاطئ أنت بنفس الطريقة اللي بتعامل بيها البيت مفروض تعامل الأسهم ، ونفس الطريقة اللي بتتعامل بيها مع الودايع اللي أنت حاطتها في البنك وعمرك ما هتفكر فيها لازم تعامل الأسهم برده.. فالاستثمار لو هو بالنسبالك قصير الأجل فهو حاجه خاطئة
07:37
المفهوم الخاطئ اللي بعد كده إن (أنا صغير أوي اني ابتدي - أنا كبير أوي اني ابتدي) مفهوم برده خاطئ جداً مفيش سن للاستثمار لكل سن في حياتك في محفظة متنوعة بمعنى إن انا لو صغير جداً أنا ممكن اخد حاجات زي أسهم أو حاجات على المدى الطويل العوائد بتاعتها عاليه لأن أنا عندي وقت أني استثمر ولو أنا كبير ومحتاج مثلاً دخل ثابت من محفظتي هضطر أنقل استثماري أو محفظتي المتنوعة دي هتبقى أكتر ليها علاقة بالدخل فتبتدي تديني دخل شهري وهكذا فالإجابة بتاعة أنا صغير أوي أني ابتدي واحط نفسي في الروتين بتاع الاستثمار ده حاجه خاطئة جداً أو انا كبير ده برده حاجه خاطئة جداً الإجابة عليها بالنسبالي هتبقى كل سن وله محفظة متنوعة بناءاً على احتياجات الشخص اللي بيتكلم معانا
08:38
الحاجه اللي بعد كده (أنت لازم تبقى خبير عشان تستثمر) الكلام ده ممكن يبقى صح من 50 سنة لكن النهاردة مع وجود الإنترنت وأبحاث وبيانات طالعه من الأسواق بكتير جداً ، أزدهار حاجه زي (الاستثمار السلبي) اللي هو أنت بتستثمر من غير ما تكون خبير وبتحاول تجيب العوائد بتاعة السوق إن انت بتحط استثماراتك في أسهم ، أو في صناديق استثمار بتحاول تجيبلك العوائد بتاعة السوق أو وجود الودايع أو وجود الوسطاء عبر الإنترنت ، كل الحاجات دي سهلت جداً إنك مش لازم تبقى خبير أنت ممكن من أي حته تقدر تفتح حسابك ، تحط فلوس في حسابك ، تستثمر ، تعمل الحاجات دي كلها من غير ما تكون خبير ، واللي عاوز يستثمر وقته أكتر فيها ويجيب نوع معين من البيانات ويحلله ويشوف العلاقة بينه وبين الأسهم أنت النهاردة تقدر تعمل كده فوجود الإنترنت شال دور الخبير
09:50
طيب لو انا مش عايز أعملها لوحدي إيه الحل؟ أنا مش قادر حتى أفهم الكلام اللي أنت بتقوله النهاردة ده يبقى أنا ممكن أستعين بحد بالمستشار المالي بتاعي ، المستشار المالي ده هو اللي بيكون لي محفظتي وأنا كل اللي عليا أتابع معاه إيه اللي بيحصل ، فممكن من 50 سنة عدم وجود شبكات التواصل والإنترنت مكنش عندي القدره على فتح الحسابات اصلاً لكن بصراحة النهاردة الموضوع بقى سهل جداً جداً ودي برده من الحاجات اللي بشوفها مفاهيم خاطئة
10:29
بعد كده في مفهوم أنها خطر جداً اللي انا بعمله ده ، ان انا لو مثلاً حطيت 100$ في البورصة أو الأسواق في محفظة متنوعة ده أخطر مثلاً من أني أشتري بيت ده مفهوم خاطئ تماماً ، احنا عندنا بيانات في الأسواق العالمية كلها ما بين أسواق الأسهم والسلع والعقارات أيا كان السوق ، عندنا مثلاً بيانات 100 سنة فنقدر نشوف في مراحل إقتصادية معينه إيه اللي بيحصل ، لو بصينا على كل الأزمنة وكل المراحل هنلاقي الحاجات اللي الناس شيفاها خطر جداً زي الأسهم على مدار 10 / 20 / 30 / 50 سنة هي أقل خطورة من سوق العقارات مثلاً في بعض الدول هنلاقي إن العقار ممكن ميكونش أداءة كويس بالنسبة للأسهم الأسهم أحسن بكتير ، وأحسن بكتير معناها بكتير الفروق ضخمة جداً فأنت بتبقى فاكر أنها خطر عشان هي بتطلع وتنزل كتير فأنت حاسس أنها خطر ولكن لما نبص على اتجاهات طويلة بنلاقي إن حاجه زي فئة الأصول ده نفسه أقل خطورة من العقارات اللي انت بس مطمن عنها
11:56
: دول أكبر 5 مفاهيم أنا بحس أن هما بيمنعوك اصلاً تبتدي
أنا مقدرش عشان أنا مش غني
هتستهلك وقت كبير جداً مني
انا صغير / كبير السن الصح اللي ابدأ فيه
لازم أبقى خبير
هي خطر جداً إني ابتدي
12:20
دول الـ 5 نقط اللي بيمنعوك اصلاً تدخل ، طيب لو دخلت وربنا كرمك وابتديت تستثمر أول مفهوم خاطئ أنا بحسه أن أنت لازم تعمل فلوس بسرعة ، الناس كلها بمجرد ما حد بيدخل يستثمر هو عاوز يعمل فلوس بسرعة ، يعني لو مش بيعمل فلوس بسرعة يحس أنه بيعمل حاجه غلط ، أو لو شاف حد جنبه بيعمل فلوس بسرعة قالي أنا اشتريت السوق الفلاني والسوق الفلاني ده بيطلع جامد جداً ، أنا أشتريت بيتكوين (نوع من العملات الرقمية) وبيطلع جامد ، اشتريت اسهم آبل وآبل بتطلع جامد ، تسلا أيا كان .. ده مفهوم خاطئ تماماً عن الاستثمار ، الاستثمار هو زي خطة لعب انت النهاردة لما تبقى نازل ماتش بتبقى متوقع نتيجة معينة مينفعش ابقى بكسب 0:8 كل ماتش أو 0:12 ، ده حتى لو أنا مدرب كورة لو ده طموحي يبقى عندي حاجه غلط ، أنا بدي مثال ماتشات الكورة للتسهيل يعني ولكن الاستثمار الصح هو عبارة عن إيه أني بلعب 20 أو 30 ماتش والمجموع بتاعي كله كسبان إني في أعلى الجدول بتاع الدوري ، لكن أني أكسب كل ماتش 0:8 ده مش حاجه صح اصلاً يبقى أنا النتيجة بتاعتي كمستثمر هتيجي أمتى؟ هتيجي على مدار الـ 10 / 20 / 50 سنة ده بالنسبالي مستثمر صح
13:57
هنلاقي الناس كلها اللي بتتشهر زي (وارين بافيت) كل الكتب والحاجات دي ، الناس دي بتشتغل كتير جداً جداً قبل ما أنت اصلاً تسمع عنهم ، هو بيبقى شغال براحة بيعمل حاجه صح ، الحاجه الصح دي بتعمل العوائد السنوية المطلوبة منها وأنت بتعرفه بس في النص الأخير من الحياة المهنية بتاعه يبقى أكبر مفهوم خاطئ بعد ما تبتدي أن النتايج بتاعتك هتجيلك بكره الصبح ، أو انك هتعمل فلوس بسرعة جداً دي أول حاجه
14:30
تاني حاجه اللي عمل فلوس قريب كتير أوي الناس ديماً بتحاول تستثمر فيه تاني بمعنى إيه؟ الناس بتحاول تشوف إيه اللي طلع الفترة اللي فاتت جامد جداً يلا نشتريه كلنا ، الناس ديماً بتتخيل إن الحاجه اللي طلعت بسرعة جداً هتكمل تطلع إلى ما لا نهاية ده مفهوم خاطئ والعكس برده مش صح هو الحاجه الصح إن تاريخ الحاجه نفسه لا يمثل مستقبلها حاجه طلعت 50% أو 70% السنة اللي فاتت مش معناها إن السنة اللي وراها هتعمل نفس العوائد وبرده مش معناها انها مش هتعمل يبقى لازم يبقى في فصل بين التاريخ والمستقبل شوية
15:20
طيب أنا عندي مجموعة مثلاً من صناديق الاستثمار بختار مابينهم ، عندي مثلاً 10 صناديق استثمار عايز استثمر في 2 أروح جايب أكتر 2 طلعوا السنادي أو السنة اللي فاتت وأروح حاطط فيهم فلوس دي طريقة خطأ للتوزيع ، امال المفروض الصح إيه؟ المفروض الصح إن أنا هحط في صناديق استثمار أو أسهم أو أيا كان اللي أنا بشتريه اللي هتحقق لي الهدف الاستثماري اللي أنا بشتريه منهم بمعنى ان انا عايز حاجه تديني 5% ثابت في السنتين التلاته الجايين في صندوق استثمار يبقى أنا هختار على اساس المعيار اللي أنا محتاجه من الصندوق مش هو عمل إيه الـ 5 أو الـ 3 سنين اللي فاتوا أو السنتين اللي فاتوا وأختاره
16:10
النقطة التالتة بعد ما بتستثمر إيه المشاكل اللي أنت بتعملها إن انت بيبقى عندك قناعة أنك بتشتري السوق ده في أحسن وقت يعني إيه ده دا الحاجه نازله جامد جداً يلا نشتري الحاجه الفلانية ، الحاجه دي طالعة جداً يلا نبيعها بقى كلنا ، تصديق توقيت السوق انا بشوفه حاجه خاطئة جداً في مجموعة معينة من المستثمرين الموجودين وعددهم قليل جداً هو شغلته كلها انه يحاول يبيع ويشتري السوق أو اي حاجه فئة أصول يعني هو شغال عليها يحاول يبيع ويشتريه ويعمل فرق ما بين سعر البيع وسعر الشرا ، هي دي شغلته وهو ده النظام اللي هو بيبنيه بالطريقة دي .. أنت مش لازم تعمل كده نفس الطريقة أن انت تشتري واطي وتبيع عالي ده مفهوم خاطئ عند الناس كلها انت هتعمل فلوس كمستثمر على مدار الـ 10 ، 20 سنة مش من توقيت السوق مش من وقت دخولك وخروجك في السوق أنت هتعمل فلوسك من أختيار الاستثمارات الصحيحة على مدار 10 ، 15 ، 20 سنة ليه؟ لأن وقت الدخول بتاعك والخروج مش هيفرق أوي لو أنت شغال بإطار زمني 10 ، 15 سنة بمعنى ان انا اشتريت شركة لسه نازله جديدة بـ 100$ واشتريتها في أول سنة بـ90 أو بـ 120 لو الشركة دي في الحالتين بعد مثلاً 20 سنة سعرها بقى 500 ، الـ 90 أو 120 أه في فرق في العوائد ولكن أغلبية الفلوس جاية من أنها اتحركت من 120 للـ 500 فأنا بالنسبالي الـ 30 اللي عملتهم في الأول دول كنسبة من الرقم النهائي هي نسبة قليلة يبقى أنا لازم أشوف الطريقة الصح اللي توصلني للحاجات اللي هتطلع في الـ 10 / 20 سنة عن ان انا اركز أوي في انا داخل اشتري أمتى والساعة كام وابيعه أمتى والكلام ده كله ده برده مفهوم خاطئ تماماً
18:44
المفهوم الرابع الخاطئ اللي أنا بشوفه (مخاطرة أعلى = عائد أعلى) دي كلمة بتتقال 24 ساعة اللي هو لازم أخد مخاطرة أعلى عشان أعمل فلوس أكتر الكلام ده خاطئ ، انا بالنسبالي الكلام ده خاطئ مش ديماً الحاجات اللي فيها مخاطرة بتعمل فلوس أكتر والعكس وهدي مثال مثلاً في الـ 10 سنين اللي فاتوا لو قارنا العوائد بتاعة الأسهم المصرية والسندات المصرية (العوائد على أذون الخزانة) العائد عليها مثلاً ما بين 10 لـ 12% على الأذون ولكن الأسهم مقدرتش تطلع في الفترة دي طيب ليه ده حصل؟ ده موضوع تاني ولكن في تعريف المخاطرة الأسهم هي عبارة عن مخاطرة أعلى فلازم المردود بتاعها يكون أعلى ولكن في الـ 10 سنين اللي فاتوا المستثمرين مدفعوش فلوس في الأسهم زي ما دفعوا في السندات وده راجع من حاجات كتير جداً معقدة طيب لو انا مركز باخد مخاطرة أعلى بحط في الأسهم وخلاص أو انا هاخد أكتر حاجه فيها خطورة عشان أعمل أعلى عائد أنا غالباً العوائد بتاعتي في الـ 10 سنين أدمرت بالسبب ده
20:11
في أمثلة كتيرة ممكن نديها على نفس الموضوع مخاطرة أعلى = عائد أعلى ، في ناس متخيلة إن البيتكوين أو العملة الإفتراضية ممكن المخاطرة بتاعتها تكون عالي الفترة دي ، وفي حجج بتقول إن المخاطرة بتاعتها اقل لأنها لسه في مرحلة معينة من الأزدهار
20:36
إيه الحل طيب لما يختلف الآراء؟ الحل ديماً في المحفظة المتنوعة لو أنا مستثمر في مصر عندي عقارات وعندي أسهم ، عندي سندات عندي ودايع ، كاش أيا كان عندي محفظة متنوعة لو الأسهم في الـ 10 سنين اللي فاتوا متحركتش جداً غالباً أنا عملت مردود استثماري كويس من بقيت المحفظة اللي هي محفظة متنوعة
21:08
أنا مش بنصح ديماً أن الناس تاخد مخاطرة عالية جداً أو واطية جداً مش عاوز كده ، أنا عايز المخاطرة تبقى متوزعة مظبوط بحيث انك تعرف تعمل عوائد الجودة بتاعتها اعلى شوية
21:22
طيب أخر حاجه في المفاهيم اللي بعد ما بتبتدي في الاستثمار (بتفقد السيولة بتاعتك بمجرد ما تبدأ) وده مفهوم خاطئ ليه؟؟ لأن الاستثمارات لو كانت في الأسهم والسندات والودايع والحاجات دي هي سهلة جداً انك تسيلها في مقابل مثلاً العقار لو عندك بيت أو أرض ، الناس بتحس انها حاسه بالأمان أكتر لما بتشتري بيت وبتبقى حاسه بتخطورة أكتر لما تشتري أسهم ولكن في حقيقة الأمر إن الأسهم تقدر تسيلها وتاخد السيولة بتاعتك في يوم أو يومين ولكن العقار عشان تلاقي حد يشتريه وتخلصه وتروح تنفذ الصفقة وتاخد فلوسك وتدفع الضرايب اللي عليك وتعمل كل الحاجات دي كلها ممكن الموضوع ياخد شهور ، فإن انا احبس نفسي كل استثماراتي في الحياة هو عبارة عن بيت واحد أو أرض أو اي حاجه ايا كان دي حاجه خاطئة جداً جداً انك توزع استثماراتك في 3 / 4 حاجات بيدولك سيولات مختلفة لو جالي حاجه هاخد من هنا لو حصل حاجه تانية هاخد من هنا وتبقى موزع دي أحسن حاجه .. يبقى في مفهوم خاطئ لو أنا دخلت في الأسهم أنا ممكن ما قدرش اخرج والكلام ده بالعكس تماماً هو موجود لتوفيرالسيولة في أي وقت
23:00
يبقى احنا النهاردة أتلكمنا على 10 حاجات الـ 5 حاجات التانين اللي هما انها حاجه طويلة المدى ومينفعش تفكر فيها على اساس قصيرة المدى أو حاجه سريعة بتحصل ، أنك عمرك ما هتستثمر على الأعتماد على العوائد التاريخية في توقع او ضمان العوائد المستقبلي شوف انت عايز ايه واشتريه ، هشتري واطي وابيع عالي ده مفهوم خاطئ ، انك لازم تاخد مخاطرة عالية عشان تحقق عائد عالي ، أخر حاجه انك هتخسر السيولة بتاعتك لو بديت تستثمر .. أعتقد هما دول الـ 10 حاجات 5 قبل ما تبدأ و 5 بعد ما تبدا لازم نبقى عارفينهم وفاهمينهم وعارفين حلول لكل منهم
24:03
أخر حاجه انا هقولها برده عشان أقفل بيها الحلقة دي مفهوم عام عن الفلوس عموماً ودي من الحاجات الموروثة في المجتمع ، أفكار موجودة وده مفهوم خاطئ تماماً من وجهة نظري إن الفلوس ديماً أو المادة مربوطة ديماً بالجشع ، بحب الحياة ، المادية ، بالمضاربة ، بالمقامرة ، باليانصيب ، دي حاجات كلها مربوطة يعني لما تسمع كلمة فلوس تحس ديماً انها مربوطة بحاجات كلها وحشه أو حاجات كلها غلط ، عصابات ، أغنية بيعملوا ايه في الفقرا كل الحاجات دي
طيب أعتقد النهاردة أي حاجه في الدنيا انت ممكن تستخدمها بكل الطرق ، ممكن تستخدم سلاح معين في الدفاع عن نفسك أو في الهجوم على الاخرين وطريقتك هنا هي اللي بتحدد أنت بتستخدم الحاجه دي ازاي.. نفس الكلام أعتقد الفلوس الدوافع وراها انك تعمل محفظة استثمارية كويسة أو انك تحوش ثروة معينة أنت ممكن تكون بتحوشها عشان تقلل الفجوة ما بين الغني والفقير ، يعني أنك تاخد فلوسك دي في وقت ما تعمل بيهم مؤسسة خيرية تعمل بيهم مستشفى تعمل بيهم أي حاجه انك تستخدم الحاجه دي بطريقة كويسة
الحاجة التانية انك ممكن في جزء معين في المجتمع انت شايف ان فرصه قليلة ممكن تستخدم فلوسك انك تساعد الجزء ده اللي هما ناس معينه مثلاً مبيجلهمش شغل بطريقة معينة
انا قصدي انك تفكر انك تكون محفظة كويسة لنفسك لعيلتك لولادك دي مش حاجه وحشه ، الناس ديماً لما تفكر عن الفلوس الفلوس هي وسيلة من الوسائل اللي احنا بنسهل بيها حياتنا زي الإنترنت ، زي العربية ، زي أي حاجه فإنك تبتدي تعمل خطة استثمارية تقدر تستخدمها على مدار الـ 10 ، 20 سنة الجايين دي حاجه مهمة جداً جداً جداً لازم تبقى من أولوياتك في حياتك ، لازم تبقى حاجه انت مقتنع انك لازم تعملها ، لازم تاخد خطوات بسيطة منها ، خطوات بسيطة تجاه الهدف ده ومتبعدش نفسك بسبب ان أنا ملهاش لازم أعملها ، أو انت مش هتاخد معاك فلوس بعد عمر طويل معاك.. لأ انت جزء من حياتك انك تأمن عائلتك ، تأمن مجتمعك والحاجه الوحيدة اللي انت تقدر تعملها انك تبتدي تفكر في الفلوس بطريقة مختلفة تبتدي تفكر ان دي حاجه هتتبني على مدار 20 / 30 سنة انت لما بتخلف ابنك بتحاول تعلمه ، بتحاول تعلمه قيم معينه ، بتحاول تعلمه تعليم معين ، بتحاول تديله مهارات معينة في الحياة نفس الكلام المفروض يحصل على الفلوس ده برده من المفاهيم الكبيرة جداً اللي هو أنا ليه عاوز أحوش فلوس مش لازم تحوش فلوس علشان تاخدها وتشتري عربيات وتتفسح مش بقول كده أنا بقول ممكن تكون أهدافك مختلفة وكل واحد هو حر في أهدافه وكل واحد هو عنده فكر معين عاوز يطبقه في الحياة.. الفلوس دي هي وسيلة ولكن هي مش غاية
شكراً جداً جداً ان انتوا كنتوا معايا في حلقة النهاردة من كلام ينور ، ابعتولنا من فضلكوا على إيميل البرنامج وعلى صفحتنا في السوشيال ميديا اسئلتكوا ، اقتراحاتكوا أنا ديماً بحب جداً اسمع من الناس اللي بيسمعونا وشكراً جداً
Translation of some words and terms:
Tendency ميل
Episodes حلقات
Live Sessions جلسات مباشرة
Directly مباشرة
Twitter Spaces: (مساحات تويتر) المساحات هي وسيلة جديدة لإجراء محادثات صوتية مباشرة على تويتر
Live Stream البث المباشر
Feedbacks التقيمات
Generations الأجيال
I can't Afford لا أستطيع تحمل
Short Term قصير الأجل
Optimal أفضل
Returns عوائد
In come دخل
you have to be an expert عليك أن تكون خبيرا
Passive Investment الاستثمار السلبي
Online Brokers الوسطاء عبر الإنترنت
Data البيانات
Financial Adviser مستشار مالي
Too Risky محفوف بالمخاطر
Real estate العقارات
Trends اتجاهات
Asset Class فئة الأصول
Once بمجرد
Bitcoin نوع من العملات الرقمية
Investor مستثمر
Annualized Returns عوائد سنوية
Career حياة مهنية
History تاريخ
Allocation توزيع
Criterion معيار
Believe صدق
System نظام
Market Timing توقيت السوق
Time Frame إطار زمني
Process معالجة
Higher Risk Higher Return مخاطرة اعلى عائد أعلى
Bonds سندات
Arguments الحجج
liquidity السيولة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #موروثات_خاطئة #مفاهيم_مغلوطة #استثمار #أقتصاد