33. التكلفة الحقيقية للتدخين
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
التدخين عادة من العادات اللي بنشوفها في مجتماعتنا بشكل كبير جداً ، عادة صعبة ومش من يوم وليلة بتقدر تبطلها أو تخرج منها .. طبعاً لا يغفل على أحد أضرارها الصحية ولكن النهاردة احنا بنتكلم على أضرارها من المنظور المالي .. ازاي التدخين بيأثر على حياتك المالية؟ وإيه هي التكلفة الحقيقية للتدخين؟
هدفنا من حلقة النهاردة هو اننا نقول لحضرتك لو قررت تبطل تدخين إيه الفرص البديلة المتاحة قدامك وإيه أفيد استثمار ممكن تعمله بالفلوس اللي أنت وفرتها من التدخين .. ولو قررت تكمل كمدخن تكون واخد قرارك ده عن وعي وعارف أنت بتتخلى عن إيه بالمقابل
: في هذه الحلقة
00:45 المقدمة -
01:21 التدخين -
01:50 متوسط العمر المتوقع للمدخنين بيقل بمقدار 10 سنوات عن المعدل الطبيعي -
02:33 (3) أمراض سببها التدخين -
03:11 (90%) الإقلاع عن التدخين قبل سن الأربعين يقلل من خطر تعرضك لأمراض التدخين بنسبة -
04:24 الأضرار الإقتصادية للتدخين (وفقاً لبحث أجراه المعهد الوطني للسرطان في أمريكا) -
08:16 صحتك وفلوسك (الأختيار ليك) -
09:45 الأعباء الإقتصادية على الدولة بسبب التدخين (المصاريف الطبية) -
10:31 التكلفة الغير مباشرة على الدولة (مبادرات وحملات علاجية) -
10:58 تاُتير التدخين على الأقساط التأمينية (تأمين صحي علاجي أو بوليسة تأمين على الحياة) -
12:43 بدل عادة التدخين بعادة صحية (أكل صحي ، رياضة ، صيد ، ... إلخ) -
14:10 تكلفة الفرصة البديلة للمدخنين -
15:01 التدخين السلبي -
15:23 الخاتمة -
في نهاية الأمر التدخين بنسبة 95% قرارك أنت وهيأثر عليك أنت في المقام الأول سواء صحياً أو مادياً ، احنا بس بنوريك كل الجوانب وفي الأخر الأختيار ليك أنت
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
اهلاً بيكوا في حلقة جديدة من بودكاست كلام ينور
النهاردة أنا هتكلم على عادة من العادات اللي احنا بنشوفها في المجتمع بتاعنا وهتكلم عليها من منظور مالي بحت
حاجه من الحاجات اللي أنت ممكن تستخدمها إنها تساعدك في التقاعد ، حاجه من الحاجات اللي أنت ممكن تبتدي تشيلها من حياتك وتساعدك إنك تعيش حياة أفضل من الناحية المالية ، من الناحية الصحية طبعاً هي ليها فوايد كتير بس أنا مش هحاول أغطي الموضوع ده كتير النهاردة في الحلقة دي أنا هحاول أتكلم على الجانب المادي
01:21
العادة اللي احنا بنتكلم عليها هي عادة التدخين ، وعادة التدخين هي من العادات طويلة الأجل اللي هو أنت بتلاقي المدخنين بيقعدوا 10 / 15 / 20 / 30 سنة مدخنين ، هي حاجه مش بتخلص في يوم وليلة وأنا متعمد أختار حاجه زي دي لأنها بتتواجد عند ناس كتير صعبه في تبطيلها طبعاً وصعب الخروج منها ولكن لو بصينا على الناحية المالية هنلاقي حاجات كتيره جداً مكناش واخدين بالنا منها
01:50
أنا طبعاً مش عايز أغطي جزء كبير طبي لأن أنا مش دكتور أو عندي المعلومات الطبية الكافية ولكن هي حاجه واضحة وضوح الشمس إن التدخين من أكبر الأسباب اللي بتجيب الأمراض المزمنة زي الكانسر (السرطان) أو أمراض غيرها
هنلاقي إن متوقع عمر الإنسان بيقل مع المدخنين بنسبة 10 سنين ، كل سنة بتدخن فيها بعد سن 40 بتقللك تقريباً 3 شهور من العمر المتوقع وأنا هنا ببص على مقالة تبع شركة تأمين كانت منزلاه قريب باخد معلومات منه وبقولها لحضراتكوا
02:33
سرطان الرئة ، داء الإنسداد الرئوي ، والأزمات القلبية أو أمراض القلب بشكل عام .. هما دول الـ 3 أمراض الرئيسيين اللي التدخين بيسببهم طبعاً لا يغفل على الناس كمية الإعلانات حتى على علب السجاير الموضوع معروف جداً ودي حاجه واضحة ولكن متوقع العمر اللي بيقل بالنسبالي رقم كبير ومخيف وبرده دي مش مهمه أوي لأن الناس كلها عارفه الموضوع ده
03:11
الخبر السعيد هنا وبرده من خلال الأبحاث إن بيقولك لو حضرتك بطلت تدخين قبل سن الأربعين ده بيقلل فرص حصول هذه الأمراض بنسبة 90% ، يعني لو حضرتك مدخن من وأنت صغير ووصلت لنص التلاتينات أو حتى الأربعين أنت مازال عندك فرصة إنك تبطل تدخين والأمراض المستعصية الكبيرة دي ممكن نسبها تقل بنسبة 90% ، والنسبة دي طبعاً نسبة عالية جداً تخلي في تفائل للناس اللي هو "أنا ليه في نص التلاتين أبطل أو إيه اللي هيحصل يعني!!" لأ أنت هتلاقي إن بعد الأربعين زي ما قولنا كل سنة بتدخنها بتقللك 3 شهور
معنى كده إن التدمير اللي التدخين بيعمله هو بيعمله أكتر بعد سن الأربعين ، وطبعاً ده ينطبق على كل أنواع التدخين يعني مش لازم تدخين السجاير بس ، ممكن السجاير الإلكترونية طبعاً نسبة ضررها بتبقى أقل شوية ولكن هي برده بتصاحبها أضرار كبيرة ولكن احنا لسه معندناش أبحاث كتير مغطية الجزء ده من التدخين ولكن هنعرف أكتر إيه اسبابها مع مرور الوقت
04:24
تعالوا بقى نتكلم على الجانب المالي من التدخين ، بالنسبة للفلوس هنلاقي إن في بحث معمول من المعهد الوطني للسرطان في أمريكا بيقول إن متوسط سعر علبة السجاير 6.28 دولار ، طبعاً في كل الدول الموضوع بيختلف يعني مثلاً بالسعودي أو الإماراتي 20 ريال أو 20 درهم يمكن لمصر الرقم ده حوالي 90 جنية ولكن مصر ممكن التدخين يكون أرخص شوية ولكن احنا هنتكلم على المتوسط العالمي لسعر التبغ لأن مع الوقت ممكن الأسعار دي تتغير في الدول دي وتحصل السعر ده وأنا بتكلم تاني على حاجه في 20 / 30 سنة فبنسبالي المتوسط العام الكبير مهم اني ابقى شايف
فاحنا لو أخدنا الـ 6.28 دولار ده سنوياً هيكلفك 2292 دولار ، شهرياً 188 دولار، بعد 10 سنين حضرتك هتبقى دفعت 22 ألف دولار ، لو حضرتك بصيت حواليك كده وأنت بتسمعني على كمية الناس اللي أنت تعرفهم بيدخنوا أكتر من 10 سنين هتلاقي النسبة كبيرة جداً ، ولو سألتك أكتر هل تعرف ناس بتدخن 20 سنة هتقولي آه ، طب لو 30 سنة هتقولي آه برده فالناس دي ضحت بالمبلغ ده عبر الـ 20 أو 30 سنة اللي دخنوا فيهم .. أنا برده هرجع وأقول ده جانب مادي فقط لا غير .. طيب ده متوسط السعر زي ما قولنا بيختلف من مكان لمكان ، بيختلف من دولة لدولة وهكذا
06:07
في أماكن كمان التدخين بيبقى أغلى من كده هنلاقي في مدينة زي نيويورك في أمريكا ، وممكن ناس تكون بتسمعنا من حتت مختلفة في العالم هنلاقي إن سعر العلبة 10.67 دولار ده هيكلفك في الشهر 320 دولار وفي السنة 3895 دولار فعلى مدار 10 سنين هيكلفك 38,950 يعني قرب الـ 40 ألف دولار في الـ 10 سنين .. احنا هنا بنتكلم بس على التكلفة
06:36
تعالوا بقى نشوف لو حد مثلاً قرر إنه ميدخنش وياخد الفلوس دي ويستثمرها فأنا هاخد على المثال الأول 2292 دولار استثمرهم لمدة 20 سنة بدل ما أدخن بس كده مش هعمل أي حاجه تانية
لو أنا استثمرت الفلوس دي بنسبة مئوية 7% اللي هي النسبة العالمية للأسواق ، يعني السوق في الدول المتقدمة في أمريكا أو شركة ميكرو ستار انترناشونال العالمية أو اي سوق عالمي هنقول مثلاً إن في الـ 20 سنة الأداء بتاعه كان 7% ، فأنا هاخد الفلوس اللي هي بدل ما أدخن هاخد الـ 2292 دولار أحطهم كل سنة في صندوق استثمار أو في صندوق المؤشرات المتداولة أو في أي أداة استثمارية بتجبلي 7% بس كده مش هعمل أي حاجه
أنا هلاقي بعد الـ 20 سنة الرقم اللي وصلتله تقريباً حوالي 100 ألف دولار يبقى مدخلات المعادلة بتاعتي هنا بسيطة جداً أنا بطلت تدخين أخدت فلوس التدخين دي حطتها في استثمار بيجبلي 7% لمدة 20 سنة وطبعاً ألتزمت إن أنا كده كده استثمر الفلوس دي هلاقي معايا 100 ألف دولار
وفي الأماكن اللي هي أغلى كمان زي المثال بتاع نيويورك ، لو أخدت نفس الفلوس اللي أنا حطتها في نيويورك هحطها بنفس الطريقة في استثمار 7% هلاقي إني كمان عندي 170 ألف دولار ، فإفتراضاً حضرتك عندك 30 سنة عند سن 50 هيبقى عندك الأرقام دي
08:16
كل مرة حضرتك بتشتري سجاير أو حاجات تدخين حضرتك بتختار ما بين إن أنت تحط في صندوق التقاعد بتاعك وما بين إن أنت تصرفهم في حاجه بتضر صحتك يعني لازم العادة دي تبقى بالنسبالك أنت شايفها من هذا المنطلق
مش بس من الصحة لأن طبعاً الصحة مهمه وكل حاجه ولكن هي مش ملموسه النهاردة ، يعني حضرتك مش هتحس إيه اللي عندك وأنت عندك 50 أو 60 أو إحساس المدخنين في الوقت ده لأن حضرتك عندك 20 / 30 / 40 / 50 سنة فأنت مش هتحس بإيه اللي هيحصل قدام ، ولكن اللي أنت هتحس بيه النهاردة واللي أنت مفروض تبقى فاهمه وهيأثر فيك حالياً في جيبك هو الفلوس المبلغ اللي حضرتك بتحطه في حاجه زي التدخين
ليه أنا بتكلم معاك النهاردة في الحتة دي؟ لأن أنا صعب أقنعك إنك ممكن تبقى داخل مستشفى أو تعبان لا قدر الله أو حصلك حاجه أو عندك مرض مزمن مش هتقدر تحس بيه ولكن اللي هتحس بيه إيه أن انت النهاردة بعد سنة هتلاقي عندك في البنك رقم معين ، وبعد 10 سنين هتلاقي مبلغ بشكل معين ونقدر نتخيل لأن الحاجات اللي بحطها في المعادلة بتاعتي مش حاجات معقدة يعني هي حاجات بسيطة وواقعية جداً جداً للحسابات واللي بتكسبه كمنفعة إن شاء الله ميبقاش عندك الأمراض المزمنة دي ودي الحاجه الجانبية اللي أنت إن شاء الله تاخدها بعد سنين طويلة
09:45
دي التكلفة اللي حضرتك بتتكلفها من جيبك ولكن الإقتصاد بقى بشكل عام الدولة أو الوطن اللي حضرتك عايش فيه بيتكلف حاجه تانية انت مبتحسها ودي بترجع ليك ولينا كلنا وحتى لغير المدخنين بشكل غير مباشر وهي التكلفة اللي بتحصل من الحكومات على المصاريف الطبية اللي غصب عنك الحكومة لازم توفرها لعلاج الموضوع ده
فلقينا مثلاً من خلال بحث إن أمريكا تقريباً بتتكلف في السنة 130 مليار دولار وده بيكلف الإقتصاد بشكل عام 156 مليار دولار من الإنتاجية المفقودة من التدخين
10:31
في كمان تكلفة حضرتك مش شايفها على الإقتصاد بشكل عام أن الأمراض المزمنة بتزيد فلازم يحصل مبادرات لعلاج الكانسر (السرطان) أو لعلاج الأمراض المزمنة أو الحاجات اللي احنا بنشوفها على طول في المجتمعات بتاعتنا فدي التكلفة التانية الغير مباشرة اللي بتحصل لحضرتك ، حضرتك جزء صغير من المعادلة ولكن أنا بتكلم هنا بشكل عام على البلد
10:58
الحاجه بقى اللي أنا أكتشفتها برده وعمري ما باخد بالي منها إن دي كمان ممكن تأثر على جيبك بشكل تاني إن حضرتك لو حاولت تروح تاخد تأمين صحي على الحياة أو حتى تأمين صحي شخصي إن أنت تتعالج في مستشفى أو في عيادات الأرقام اللي حضرتك بتدفعها شهرياً بتضاعف لو حضرتك مدخن
لو حضرتك بتعمل تأمين على الحياة بيجي يعملك كشف طبي ويسألك كام سؤال كل الحاجات اللي بتتسألها حاجات بتبقى عادية الحاجه الكبيرة اللي بتعلي هي التدخين
فلو حضرتك هتدفع 100 جنية أو درهم أو دولار أيا كانت العملة اللي احنا بنتكلم بيها جيت طلبت من شركة التأمين تديك ما هو قسط التأمين بتاعك هتلاقي إن القسط على الأقل بقى الضعف وده علشان شركات التأمين بيبقى عندها في حساباتها إن المدخن غالباً هيجي عند سن معين ويطالبني بمدفوعات كبيرة للعلاج
فأنت النهاردة مش بتوفر بس في الاستثمار بتاعك لأ أنت كمان بتوفر في التأمين ، حضرتك بتوفر نص الأقساط التأمينية مدى الحياة وكل طبعاً ما بنعمل تأمين في سن أصغر التأمين بيبقى أرخص لكن التدخين هو كارثة بالنسبة للأقساط التأمينية فلو حضرتِك بتفكري تعملي بوليسة تأمين على الحياة أو أي نوع من أنواع التأمين وحضرتِك مدخنة هتفاجئي جداً بالأقساط التأمينية
12:43
يبقى احنا في خلال الحلقة دي اتكلمنا على مشكلة أو عادة سيئة طويلة المدى ، وازاي نقدر نبدلها بحاجه مدياً تنفعنا في صندوق التقاعد بتاعنا ، طيب بالنسبة بقى للمدخن أنا بصراحة مش أحسن واحد يقدر ينصحك لو أنا عندي عادة التدخين أبدلها بأيه ولكن في ناس بتقول أو بسمع آرائها يعني اللي هو بدلها بأكل صحي ، بدلها برياضة ، بدلها بحاجات تحسن المود بتاعك بشكل عام ، ممكن تشوف عادات أخرى وهوايات أخرى تحاول تبعد بيها نفسك عن التفكير في التدخين ولكن أنا مش أحسن شخص ممكن يديك معلومة إيه أحسن حاجه ممكن تعملها بدل ما تدخن فأنا بطلب من حضراتكم اللي في المشكلة دي أو عاوز يبطل تدخين انه يعمل البحث بتاعه الخاص وبعدين زي كل مره ما بقول كل حد عنده إهتمامات مختلفة مفيش حاجه واحده بتنفع كل الناس يعني واحد ممكن يقولي أنا هبطل التدخين وأروح ألعب رياضة وأنا كده مبسوط جداً ، واحد يقولي أنا هبطل تدخين وهروح أصطاد أو أي حاجه أيا كان اللي أنت هتعمله تبدل العادة دي بالعادة دي فديماً أعرفوا أن كل واحد عنده عاداته وأفكاره المختلفة اللي تنفعه فأكتر واحد يقدر يفيد نفسه هو نفسه
14:10
أنا برده مش عاوز أقول النهاردة الناس كلها لازم تبطل تدخين أو الناس كلها لازم تدخن مش ده هدفي من الحلقة دي ، أنا هدفي من الحلقة دي أن حضرتك لو مدخن تبقى عارف إيه اللي أنت بتديه قصاد التدخين ده .. إيه تكلفة الفرصة البديلة بتاعتي لو أنا بطلت تدخين إيه أفيد استثمار أعمله بالفلوس أو الأموال اللي أنا وفرتها من التدخين .. فأنا لا أدعو إن حضرتك تبطل أو متبطلش أنا كل اللي بقوله لو بطلت إيه الفرص اللي قدامك ولو أخدت قرار إنك هتكمل تبقى مدخن أنت واخد القرار ده عن وعي إيه اللي بتسيبه على الترابيزة في الناحية التانية فيارب بس تكون الرسالة دي واضحة .. أختيارك في الأخر هو اللي هيأثر عليك ، بطلت أو مبطلتش دي حاجه هتأثر عليك أنت شخصياً
15:01
في برده مواضيع أخرى كتير زي التدخين السلبي والكلام ده كله ممكن تقروا عنه لأن هو برده من الحاجات اللي بتضر بيها الناس الأخرى مش بتضر بيها نفسك في الأخر القرار بنسبة 90 او 95% هو عليك شخصياً
15:23
زي كل اسبوع هقولكوا من فضلكوا أبعتولنا أكتر لو عندكوا أي اسئلة أو استفسارات صفحتنا موجودة على الإنستجرام أو على الإيميل ، برده بالنسبة للناس اللي بيسمعونا احنا بنعتزر اننا بنستخدم مصطلحات إنجليزي ساعات بس ساعات التعبيرات بتخوني والترجمة الحرفية للكلمات مبتبقاش موجودة واحنا عملنا على الموقع بتاعنا في كل حلقة أي كلمة إنجليزي بتتقال احنا مترجمنها ترجمة كاملة
وهتلاقوا الحلقة كلها مكتوبة هناك لو حضرتك عاوز تاخد ملاحظات ، أو عاوز تقرا الحلقات مش عاوز تسمعها أو عاوز تفرها بسرعة أو نسيت الحلقة دي كانت بتتكلم على إيه ، التقسيم الصوتي بالدقايق كمان بيبقى مكتوب لو حضرتك عاوز تروح لحته معينة في الحلقة وتسمعها
أنا عن نفسي برجع اسمع حلقات قديمة لو في موضوع بيشدني برجع اسمعه تاني وتالت ورابع ، مش البودكاست بتاعي مش عارف لو هقدر اسمع نفسي ولا لا ولكن أنا قصدي على البودكاست الأخرى فالموضوع ده مفيد فياريت تستخدموا الموقع أكتر كمصدر للمعلومات وهستناكوا إن شاء الله الاسبوع الجاي في حلقة جديدة من كلام ينور
Translation of some words and terms:
Retirement التقاعد
Chronic Disease الأمراض المزمنة
Life Expectancy متوقع عمر الإنسان
Article مقالة
Lung Cancer سرطان الرئة
COPD داء الإنسداد الرئوي المزمن
National Cancer Institute المعهد الوطني للسرطان
Average Cost متوسط السعر
City مدينة
MSI global شركة ميكرو ستار انترناشونال العالمية
ETF (Exchange Traded Fund) صندوق المؤشرات المتداولة
Assumptions إفتراضات
Equation معادلة
Benefit المنفعة
Bonus علاوة
Medical Expenses النفقات الطبية
Lost Productivity الإنتاجية المفقودة
At Least على الأقل
Doubled مضاعف
Model نموذج
Transcript نسخة مكتوبة طبق الأصل
Notes ملاحظات
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #التدخين #التكلفة_الحقيقية