28. اعجوبة العالم الثامنة : الفوائد المركبة
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
منوّرنا في حلقة الإسبوع ده من كلام ينوّر صديق البودكاست العزيز مروان حايك
مروان هو شريك مؤسس لشركة Introspect Capital وخبرة طويلة في المجال المالي
تقدروا تتواصلوا مع مروان على : Marwan Hayek @LinkedIn
واللي ميعرفش مروان أكيد مسمعش الحلقة رقم 8 اللي اتكلمنا فيها عن مفهوم التضخم وازاي الوقت بيأثر على الفلوس
اسمعوا الحلقة 8 من هنا : episode-08
ولأننا في البودكاست ده بنحاول ديماً نوصّل للناس مفاهيم مالية معقدة شوية بس في إطار بسيط وسهل ومفهوم في حلقة النهاردة بنتناقش مع مروان في مفهوم جديد هو (الفوائد المركبة) واللي بيطلقوا عليه في العالم المالي الأعجوبة الثامنة في العالم
: في هذه الحلقة
ما هي الفوايد المركبة؟ -
الفرق بين الفايدة البسيطة والفايدة المركبة؟ -
هل الفايدة المركبة هتوصلني للهدف الادخاري بتاعي أسرع؟ -
هل الفرق الحسابي بين الفوائد البسيطة و المركبة كبير؟ -
ازاي الفوائد المركبة بتأثرعلى سلوكي الادخاري؟ -
قيمته الوقت فلوس ، كل ما تبدأ بدري كل ما هتربح فوايد على الاستثمار -
الفايدة المركبة ممكن تشجع الناس انها تبتدي حتى لو بمبالغ صغيرة -
الفايدة المركبة بتقصرلك الوقت وبتشجعك كمستثمر انك تلتزم بجدول الادخار بتاعك -
هل الفايدة المركبة بعد كده ممكن تساعدني ابطل ادخر؟ -
الهدف منه العادة وليس النتيجة في المرحلة دي خاصة لو انت صغير -
أخد فايدة عادية واعيدها كل سنة أفضل ولا اجرب حظي كل سنة؟ -
ما هو قانون 72؟ -
ليه المعلومات دي متقالتلناش واحنا صغيرين -
ازاي الإنترنت سيف ذو حدين؟ -
بعد ما فهمت موضوع الحلقة المفروض أعمل ايه؟ -
وفي النهاية وزي ما بنقول ديماً The Earlier the Better
كل ما تبدأ بدري كل ما هتحقق هدفك أسرع وتوصل للحرية المالية أسهل ، حتى لو بدأت برقم صغير جداً دلوقتي واستثمرت الفوايد مع الوقت هتلاقي نتايج وهتحقق عوائد أكبر
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
عمر: مروان ازيك إيه الأخبار؟
مروان: بخير يا عمر ماشي الحال ، انت إيه أخبارك؟
عمر: والله تمام الحمدلله ، أعتقد إن ردود الأفعال بتاعة الحلقة الاولانية كانت كويسة جداً بصراحة وشكراً جداً للناس اللي سمعتها وبعتتلي كتير قد إيه هما استفادوا من مفهوم التضخم وشكراً انك جيت معانا تاني النهاردة
مروان: شكراً ليك
عمر: أنا عايز النهاردة زي ما اتكلمنا المرة اللي فاتت على مفهوم التضخم ، أنا عارف ان دي مصطلحات تقيلة شوية برده هنحاول نتكلم فيها بالعربي ، هنحاول نفك الموضوع شوية
النهاردة انا عايز اتكلم على مفهوم الفوايد المركبة اي حد بيقرا كتب او مدونات في التمويل الشخصي ديماً الكلمة دي بتتكرر كتير ، يعني إيه الفوايد المركبة
مروان: أنا اول حاجه بتخطر على البالي لما اسمع كلمة الفوايد المركبة ، انك بتستثمر وبيطلعلك فايدة سنوية أو شهرية أيا كان ، تاني حاجه بتخطر على بالي لما أسمع كلمة فوايد مركبة أول شي بفكر فيه انه قد إيه بحتاج وقت عشان أضاعف فلوسي لو بستثمر بمعدل فايدة معين ودي هنتكلم عنها يعني ايه وازاي الواحد يحسبها
تاني حاجه بفكر فيها هو ان الفايدة المركبة بالنسبة ليا هي ازاي بتزود فلوسك بطريقة تصاعدية لأنه في معدلين للفايدة في معدل فايدة مركبة وفي معدل الفايدة البسيطة
معدل الفايدة البسيطة هو اذا أنا بستثمر النهاردة بـ 100 دولار بفايدة 5% كل سنة راح يطلعلي 5 دولار كل سنة حتى لو حاططها على 20 سنة لأن الفايدة بتطلعلي على اصل المبلغ الاساسي بتاعي اللي هو الـ 100 دولار
الفايدة المركبة بتختلف عن الفايدة البسيطة لان الفايدة المركبة بتطلعلي كل سنة على الأصل اللي حاطه + الفايدة اللي أخدتها على السنة اللي قبلها يعني اذا انا حطيت 100 دولار أول سنة بيطلعلي عليها 5% مثلاً السنة الجاية بيكون معايا 105 دولار ، تاني سنة بيطلعلي 5% على 105 مش بس عالـ 100 الأساسية
فكل سنة الفايدة اللي بتطلعلي بتزيد عن السنة اللي قبلها لأنه انا باخد الفايدة على المبلغ الأساسي + الفايدة اللي طلعتها السنة الماضية
وعشان كده الفايدة المركبة هي متصاعدة لأن اول سنة الفايدة 5 تاني سنة الفايدة 5.5 مثلاً تالت سنة الفايدة هي 6 واذا بتحط قد إيه معك فلوس كل سنة وبترسمهم على رسم بياني مش بيطلعلك خط مستقيم بيطلع تصاعدي وهي دي فكرة الفايدة المركبة
عمر: يعني عشان أحقق فكرة الفايدة المركبة المفروض أعيد استثمار الفايدة مع أصل المبلغ ، عشان أوصل للزيادة اللي احنا بنتكلم عليها
مروان: صح 100% هي دي الفكرة
عمر: طيب ده معناه انها هتوصلني للهدف بتاعي أسرع! يعني لو أنا عاوز اروح من 100 لـ 500 السرعة اللي انا هوصل بيها في إعادة استثمار الفايدة أعلى
مروان: صحيح
عمر: طيب احنا شوفنا اقتباسات كتيرة من ناس كبيرة إن الفائدة المركبة هي "الأعجوبة الثامنة في العالم" ديماً الإنترنت بيقعد يتكلم عليها طيب هل الفرق بيبقى كبير يعني الحساب اللي ورا الموضوع بجد بيفرق للدرجة دي؟
مروان: أفضل طريقة عشان تشوف اذا بتفرق أو لأ تعمل إكسيل وتاخد مثالين
أول واحد تستثمر فلوسك مثلاً على 15 سنة بفايدة 5% مثلاً وهنا بنرجع على القاعدة العامة اللي هنحكي عنها بعدين اذا حطيت فلوسي بـ 5% على 15 سنة راح تضاعف يعني اذا حطيت 1000 دولار اليوم بـ 5% كل سنة بعد 15 سنة هيبقوا 2000 دولار
بينما لو مش هرجع اعيد اسثتمار الفايدة وهاخد كل سنة الفايدة على المبلغ الأساسي اللي حاطه الـ 100 دولار بس ، الـ 1000 دولار هتبقى 1700 دولار بعد 15 سنة
وبالتالي الفرق هو إن واحده عملتلي 100% عائد والتانية عملتلي 70% عائد وكل ما تطول الفترة كل ما يزيد الفرق يعني هنا حكينا على 15 سنة لو بعمل نفس المثال على 30 سنة الفرق بعد 30 سنة هيكون أكبر بين الفايدة المركبة والغير مركبة.. ليه؟ لانه لو عملتها على رسم بياني واحده هتكون خط مستقيم والتاني هيكون تصاعدي
ولذلك كل ما بيمر وقت أكتر كل ما البُعد بين الخطين هيبقى أكبر ولذلك أفضل طريقة هو أنو نحط مثال على الإكسيل نشوف ازاي السرعة اللي انا بزود بيها فلوسي وانا بس بستثمر واعيد استثمار الفايدة اللي بتطلعلي بمقابل اذا بصرف الفايدة كل سنة وباخد فايدة جديدة على المبلغ الأساسي
عمر: احنا هنا مش بنتكلم على وجود تضخم في المجتمع أو اي حاجه ، احنا بنتكلم بس رياضياً أو حسابياً الموضوع بيتحسب ازاي ، موضوع التضخم ده قصة تانية خالص مش هدف الحلقة اللي بنتكلم فيها لأننا اتكلمنا فيه قبل كده
مروان: صحيح ، احنا هنا بس بنتكلم عن فكرة انه انا كل سنة بعيد استثمار المبلغ الاساسي اللي حطيته والفايدة
عمر: طيب انا مثلا واحد بحاول أحوش ، ازاي ده هيأثر على السلوك بتاع التحويش بتاعي؟
مروان: الجواب الواضح ديماً بالأمور المالية هو The Earlier The Better
لانه في مفهوم "القيمة الوقتية للمال" ده اهم حاجه ، يعني أنا لو قررت النهاردة استثمر 1000 دولار اكيد أفضل بكتير من انه اقرر بعد 5 سنين ابدأ أجمع فلوس واستثمر الـ 1000 دولار دي ، فالجواب الواضح هو انك تستثمر اليوم احسن بكتير من بكره
عمر: حتى لو بأرقام صغير، يعني مثلاً انا لو هبتدي بحاجه صغيره على الأقل الحاجه الصغيرة دي هتعملي فايدة وممكن اعمل الفايدة المركبة دي على مدى أطول
مروان: هناخد مثال صغير لو انا هستثمر 1000 دولار بفايدة 5% النهاردة أو بعد سنة
أول مثال بعد سنة هيكون معايا 1050 دولار وتاني مثال هيكون معايا بس 1000 دولار ولذلك كل ما ابدأ بدري كل ما طبيعي أحسن لأني بضيع أيام والوقت قيمته فلوس ، كل ما ابدأ بدري كل ما هربح فوايد على الأيام اللي بستثمر فيها
عمر: أنا بشوف حاجه كمان من خلال التعامل مع الناس بلاقي الناس تقولك اصل أنا محتاج أحوش مبلغ معين عشان ابتدي احوش ، أو انا ان شاء الله مثلاً بعد الخطة الخمسية اللي جاية بعد 5 سنين ان شاء الله هترقى وابدأ احوش
ده بيخليهم ديماً من وجهة نظري عمرهم ما بيبتدوا ، فهو النهاردة لو سمع ان في حاجه اسمها الفايدة المركبة أعتقد إن دي حاجه تشجع الناس انها تبتدي حتى لو بمبالغ صغيرة
مروان: صحيح ، زي ما قلت حتى لو مبلغ صغير ، وبفتكر ان اي إنسان ممكن يشيل مبلغ صغير لأنه مش كل مصروفه بيروح على اساسيات ، أكيد في جزء بيروح على رفاهيات اللي ممكن يستغني عنها ويبتدي يحوش
عمر: لما أنت بتشوف النتايج بتاعة الفايدة المركبة دي انها بتقصرلك الوقت شويه فدي طبعاً حاجه بتشجعك كمستثمر انك تلتزم بالجدول بتاع الادخار بتاعك
وبرده في حاجات انا شوفتها إن افتراضاً مثلاً عمر الهدف بتاعه يحوش في يوم معين رقم كذا فابتديت من وانا عندي 20 وانا عندي 40 وصلت للرقم ده هل الفايدة المركبة بعد كده ممكن تساعدني ابطل احوش؟ هل ده ممكن تقصر لي عدد السنين قدام؟
مروان: طبيعي ، يعني زي ما قلنا انت كل ما تبدأ من بدري كل ما بيساعدك قدام ، المشكلة ديماً اننا بس نقول ابدأ بدري حتى لو مبلغ صغير مثلاً 50 دولار بالشهر ، 20 دولار بالشهر الفايدة عليهم مبلغ صغير أوي
اللي مش بيخلي الناس تبدأ من بدري إنها بتقولك انا مش هستثمر الـ 20 دولار لأنها مش هتديني حاجه يعني الـ 10% عليها هتديني 20 سنت مبلغ صغير جداً ، اللي مش بيشجع الناس لأنهم مش عارفين إن مفعولها بعد 20 سنة أكبر
زي اللي بيروح الجيم اسبوعين وميشوفش نتيايج فيقولك خلاص ، لأ محتاج ألتزام وهتشوف نتايج بعد 6 شهور.. نفس الشيئ فكرة الادخار
عمر: دي نقطة فعلا مهمه وده ممكن يكون من أكبر الاسباب الطاردة للناس انها عمرها ما بتبتدي ، انهم بيتخيلوا هي هتجبلي إيه النهاردة؟ لما تقعد تتكلم مع واحد يقولك يعني العائد بتاعها قد إيه؟ لو مقولتلهوش رقم رهيب يقولك إيه ده يا عم لأ قليل.. طب انت ايه البدايل بتاعك
مروان: صحيح ، هي الفكرة انها احسن من ولا حاجه
يعني زي ما بقى دلوقتي معدلات الفايدة عالمياً متدنيه جداً فتمام أنا بفتح حساب جاري مش باخد عليه فايدة يقولك ليه أعذب نفسي وأروح عالبنك وأفتح حساب توفير عشان يديني 0.5% لأنه بالنسبالنا مبلغ صغير جداً فخلاص مش هنتعذب ونعمله
عمر: ولكن الهدف منه العادة وليس النتيجة في المرحلة دي وخاصة لو انت صغير ، أنا كده وضحت بالنسبالي
طيب عايز أقولك برده الناس اللي بتدور على العوائد العالية اللي هو أنا عايز أعمل 50% في السنة أو عايز اعمل 3 مرات فلوسي ، المشكلة بتاعة طريقة التفكير دي بالمقابله مع الواحد اللي هيعمل فايدة مركبة على معدل واطي خلينا نقول مثلاً واحد هيعمل 5% لمدة 20 سنة أو 30 سنة وواحد تاني عايز يدور على الفرصة الرهيبة اللي هي هتقلبه من حاله لحاله الفكرين دول إيه رأيك فيهم؟
مروان: شوف هي فكرة انه تدور على الفرصة اللي بتديك عائد 100% بفترة قصيرة مثلاً بـ 6 شهور دي زي المضاربة لأنه اذا الفرص سهله اوي كل الناس هتعملها وده بنشوفها مؤخراً مع العملات الرقمية
مع ذلك مش بتشوف في الأخبار إلا اللي عمل 500% أو اللي عمل 2000% او اللي عمل 3000% على المحفظة بتاعته مش بتشوف بالأخبار اللي خسر 50% فده اللي بيشجعهم انهم يشوفوا غيرهم عمل 100% بـ 3 شهور وعمل 1000% بـ 6 شهور فخلاص انا هعملها
ولكن ده فيها مخاطره يعني ده مش بيتعمل كل سنة يعني لو عاوز تعمل 50% او 20% كل 5 سنين في بالمقابل السنين اللي بينهم ممكن تعمل انت -10% وتخسر 50%
ولذلك احنا بنحكي هنا عن الفايدة المركبة وبنقول إن المحفظة المتوازنة بتديك عائد ثابت 5 / 6 / 7% اللي هي معدلات الأسواق بالمقابل محفظة بتديك 20% مثلاً كل 5 / 6 سنين بس بينزل 10% كمان أوقات
كمان اذا بنحط الأمثلة دي مقابل بعض بنشوف انه لأ أنا أخد 6% واعيدها كل سنة أفضل من اني اجرب حظي كل سنة وممكن أخسر وممكن أربح
عمر: طيب انا في حاجه اخدت بالي منها ، عشان ألاقي كل شوية الفرصة الرهيبة اللي هتعملي 50% ولا 100% مرتين انا محتاج مجهود ، محتاج ادور عليها محتاج حد يقولي عليها محتاج أبحث طيب أغلبية الناس معندهمش وقت وزي ما قولتلي الـ 6 / 7% دي حاجه بتحصل من الأسواق او من محفظة متوازنة يعني معنى كده انهم ممكن يعملوها أو مش كلهم يعني بس الاغلبية يعني حتى تلاقي في أمريكا صناديق التقاعد مثلاً إن زي ما قولنا قبل كده بيستثمروا معظم استثماراتهم في الأسهم اللي الناس كلها خايفه منها وبتعتبرها حاجه خطر ولكن هي على المدى الطويل 6 / 7 / 8%
مروان: اصلا لو متنوع بشكل جيد زي سياسات صناديق التقاعد اللي هي متنوعة بشكل جيد بس اه زي ما قلت خاصة ان احنا بنتكلم عن الشخص اللي مش بيشتغل في المجال ده
عمر: دكتور ، مهندس ، واحده بتشتغل مدرسة ، يعني الناس كلها مختلفة
مروان: اذا كل سنة هتجرب تعمل 20 / 30 / 40% بقت وظيفة بدوام كامل عشان تقدر وممكن متقدرش كمان
عمر: احنا ممكن منعملهمشي اصلاً
مروان: على الأرجح مش هتقدر ، حتى حسابياً لأن تاني مثال بيعملك عائد أكتر كمان أنت بتجرب تجيب 20 / 30% ومش هتجيبهم ولذلك اذا بتحطتهم بالـ 6 /7% كل سنة هيعطيك بعد 15 / 20 / 30 سنة محفظة أكبر بالنهاية
عمر: احنا عملنا بالفعل قبل الحلقة دي مثالين لو عملت مثلاً 5 / 6% في السنة وواحد تاني لو عملت 20% وبعد سنين عملت 2% وبعد سنين عملت -5% / -10% وعملنا عوائد مختلفة برده ممكن نحطها في الشو نوتس بتاعة الحلقة ان انت ممكن بالعوائد اللي هي تعتبر عادية او الناس مش متخيله انك بعد 20 سنة تبقى أعلى بكتير من الواحد اللي بيجازف.. الأستمرارية هنا ممكن نقول عليها احتمالات؟
مروان: صح اكيد هي لعبة احتمالات يعني بنقول احتمال تجيب 20% كل سنة كتير أو أقل من انه تجيب 5 / 6% كل سنة
عمر: طيب الحاجه اللي بعد كده اللي انا عايز اسألك فيها برده من الحاجات اللي بشوفها اونلاين كتير وفي كتب المالية وكده في اختصار رياضي اسمه قانون 72 ممكن تكلمني عليه ، إيه رأيك فيه؟
مروان: قاعدة 72 هي حساب قد إيه بتاخد وقت عشان تضاعف فلوسك
ديماُ لما يكون في معادلة حسابية صعبه بيختصروها بحاجه اسمها قانون 72
حتى بالحياة العادية في نظريات وفي قوانين عملية أكتر هي مش بتديك نتيجة دقيقة زي ما بتطبق المعادلة الكاملة بس بتديك نتيجة قريبة لو مش عاوز أحسب حاجه دقيقة جداً أسهل لي استخدم قاعدة 72 لو بتستثمرهم بفايدة سنوية معينة
الفكرة هي انه مثلاً اذا بتستثمر بـ 5% في السنة الوقت اللي بضاعف فلوسي فيه هو 72 ÷ 5
وبالتالي المعادلة هي عدد السنين = 72 ÷ الفايدة اللي بستثمر بيها يعني مثلاً اذا انا بستثمر بـ 5% في السنة محتاج تقريباً 14 سنة عشان اضاعف فلوسي لأن 72÷5=14.5
لو مثلاً بستثمر بفايدة 2% محتاج 36 سنة عشان اضاعف فلوسي لأن 72÷2=36 ودي بتديني طريقة سريعة قد إيه محتاج وقت عشان اضاعف فلوسي ، لو بستثمر بـ 10% في السنة محتاج 7 سنين لأن 72÷10=7
عمر: ولو بعمل 1% في السنة يبقى 72 سنة ، يبقى أنا النهاردة لو روحت البنك اديتله الـ 1% عشان أضاعف فلوسي هحتاج 72 سنة ، لو انا عرفت أعمل كل سنة 10% محتاج 7 سنين ، لو عملت 50% هيعتبر سنة ونص عشان أضاعف فلوسي يعني أطلع من 1 لـ 2 لـ 4 لـ 8 لـ 16 لـ 32 لـ 64 مظبوط كده؟
مروان: صح
عمر: حلو اوي ، هي فعلا سريعه انك تحسبها بسرعه
مروان: دلوقتي لو انت بتعمل المعادلة الكامله على 5% محتاج 14.5 سنة
عمر: طيب أنا ليه بقى الناس مقالتليش وانا صغير الحاجات دي!! على فكرة ده أكتر رد فعل بيجيلي يعني كل الناس ندمانه انا ليه معرفتش الحاجه دي زمان انا ليه مفهمتهاش زمان
الفايدة المركبة دي مفهوم سهل قوي من وجهة نظرك يعني
مروان: مش بس على الفايدة المركبة أنا بشوف إن في العموم لو بنرجع 20 / 30 سنة لورا كان كل شخص بيهتم بإختصاصه يعني الاستثمار خليه لخبراء الاستثمار
بس دلوقتي مع التطور التكنولوجي و دمقرطة الأخبار والمعلومات انت لو عاوز أي حاجه بتدخل على الأنترنت بتلاقية ومش بس بالأمور المالية بكل حاجه
يعني دلوقتي لو بتسأل 10 أشخاص على الطريق عن لقاح فيروس كورونا كل واحد عنده رأيه لأنه دلوقتي المعلومات موجودة كله متاح كل واحد بقى عنده إمكانية الوصول لنفس المعلومات وكل واحد بيحللها بالطريقة اللي بيشوفها ودلوقتي كمان الإتجاه بقى للاستثمار لأنه بقى سهل الوصول إليه انت بتدخل تفتح حساب وبتبدأ تستثمر وتشتري وتبيع أسهم
عمر: وتشتري محفظة تقاعد في 5 دقايق
مروان: صحيح والموضوع ده بيخلق إيجابيات وسلبيات سيف ذو حدين لأن سلبياته انه في ناس مش فاهمه بتعمل ايه بتاخد مخاطرة وممكن تخسر فلوسها ، بس الإيجابيات انه كمان بيساعد في تثقيف الناس لانه انا بقى عندي حرية الوصول لده فلازم اقرا عنه واتثقف فبيحصلي محو أمية مالية واللي انت كمان بتساهم فيه بالبودكاست ده
عمر: بص انا هقولك حاجه انا بيجيلي كمية تعليقات من ناس ما بين 20-25 بيقولولي آراء انا مخضوض من انهم اصلاً وصلوا للمعلومات دي يعني في جزء من الناس اللي بيسمعونا ولاد وبنات عندهم معلومات احنا واحنا صغيرين عندنا 20 سنة كنا بنتكلم في حاجات تانية خالص فانا اعتقد إن الهدف من البودكاست ده زي مانت قولت اللي هو احنا بنحاول نوصل للناس الحاجات السهلة دي في إطار يقدروا يفهموه ويقدروا يترجموه ، طيب أنا النهاردة عرفت الحاجه دي مفروض أعمل ايه؟ يعني احنا خلاص اتكلمنا على مفهوم الفوايد المركبة مفروض أعمل إيه؟
مروان: روح على البنك ، ابدأ حوش هي دي الفكرة انه لو بتبص على اي مفاهيم مالية هتوصلك لنفس النتيجة
عمر: ان انت توفر وتستثمر
مروان: صحيح انه كل ما كان بدري كل ما كان أفضل بس الفكرة في إدارة المخاطرة
عمر: ودي برده ممكن ناخدها من حلقات تانية اللي هو ازاي تشتري ايه ، والحاجات اللي بتجبلك عوايد السوق والكلام ده كله.. مروان تحب تختم انت الحلقة النهاردة
مروان: يعني عاوز ارجع اشكرك على الاستضافه تاني مره وانا أكيد من متابعينك والبودكاست رائع فبالتوفيق في الحلقات المقبلة
عمر: ميرسي جدا جدا يا مروان وهتجيلنا تاني وهنتكلم في مفاهيم تانية وشكرا جدا على وقتك ، أشوفكوا الإسبوع الجاي في حلقة جديدة من كلام ينور
Translation of some words and terms:
Feedback ردود أفعال
Concept مفهوم
Inflation التضخم
compounding interest فوائد مركبة
Personal Finance تمويل شخصي
Blogs المدونات
Compound مركب
Interest Rate معدل الفائدة
A rule of thumb قاعدة عامة
Exponential متسارع
Simple interest rate معدل الفائدة البسيط
Capital رأس المال
Graph رسم بياني
Quote إقتباس
8th wonder of the world الاعجوبة الثامنة في العالم
Mathematical حسابياً
Example مثال
Double مضاعف
Return عوائد
Charts الرسوم البيانية
Linear خطي
Gap فجوة
Financial الأمور المالية
the earlier the better
Time value of money القيمة الوقتية للمال
Part جزء
Saving ادخار
Target هدف
Already بالفعل
Basis اساس
Basically في الأساس
Commitment ألتزام
Alternative البديل
Current Account حساب جاري
Gambling مضاربة
Recently مؤخراً
Cryptocurrencies العملات الرقمية
Portfolio محفظة
Risk مخاطرة
Balance portfolio محفظة متوازنة
Historically تاريخياً
Pension funds صناديق التقاعد
well-diversified متنوعة بشكل جيد
Field مجال
Full-time job وظيفة بدوام كامل
Probabilities احتمالات
Shortcuts إختصارات
Theory نظرية
More practical عملي أكثر
Accurate دقيق
Apply the exact formula تطبيق المعادلة الكاملة
In general في العموم
Investment استثمار
Investment professionals خبراء الاستثمار
Available متاح
Access إمكانية الوصول
Trend إتجاه
Accessible متاحة
Educate People تثقيف الناس
Financial Literacy محو الأمية المالية
Format شكل
The Sooner the Better كلما كان أقرب كان أفضل
The risk Managing إدارة المخاطر
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #الفوائد_المركبة