27. حكايتي مع المجال المالي
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
في حلقة النهاردة شمس بيحكلنا عن بداياته مع المجال المالي وتجربته الشخصيه والخبره اللي وصلها بعد 15 سنة.. ازاي الموضوع بدأ وازاي تطور من مجرد فضول لشغف لوظيفه ، ايه العلامات اللي أثرت في تجربته دي وايه النتايج اللي خرج بيها بعد 15 سنة
الشغف والفضول مهمين جداً -
انت مش محتاج موافقة الناس في أي حاجه بتعملها طول مانت فاهم انت بتعمل إيه ورايح فين -
كل واحد عنده قصة فريدة من نوعها ، تفاصيل مختلفة ، عمرك ما هتطلع بنفس النتائج حتى لو حاولت تعمل نفس الحاجات -
حاول ، جرب ، اسمع واقرا أعمل حاجات مختلفة ولكن كلها بتصب في هدف واحد -
متستناش إن النتيجة بتاعتك تبقى صح ديماً -
متاخدش اي حاجه مسلم بيها لازم تدور وتبحث بنفسك -
لازم تكون فاهم إن اللي بيتقال النهاردة ممكن يكون غلط في المستقبل لأن البيئة نفسها بتتغير -
الأحتراف و الأستمرارية من أهم عوامل النجاح في حياتك -
مفيش حل سحري ، مفيش حاجه واحده بتناسب الجميع -
تصرفاتك الغير مباشرة مع أولادك أهم بكتير من أوامرك المباشرة -
توقعاتك في الحياة لازم تكون محسوبه ومنطقية ولازم تستمتع بالنجاحات الصغيرة.. احنا مش في سباق -
كن متواضع وابتدي حوش واستثمر -
التجارب هي قصص عاديه وطول ماحنا عايشين بنمر بتجارب ، بس نقل الخبرات والتجارب دي ممكن يساعد ويلهم ناس كتير بتحاول تبدأ سواء في المجال المالي أو اي مجال عموماً وهو ده هدف حلقة النهاردة
: مؤشرات تداول الشركات بالبورصة المصرية
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكوا في حلقة جديدة من بودكاست كلام ينور
في حلقة النهاردة أنا عايز اتكلم عن البدايات بتاعتي وازاي ابتديت ، عايز احكي قصة سريعة أستغل المنصة بتاعة البودكاست ده إني احاول اقولكم القصة بتاعتي ممكن تلهم ناس معينة بتحاول تبتدي في المجال بتاعنا أو في العموم ، هي قصة عامة وفي الأخر هبتدي أتكلم على شوية نقط أنا اتعلمتها من خلال التجربة بتاعتي
أنا هتكلم في الحلقة دي عن قبل ما ابتدي أشتغل.. ازاي ابتديت أشتغل
أول حاجه انا عايز بس أقول الحلقة دي بهديها لوالدي الله يرحمه هو كان جزء كبير جداً من التكوين بتاع شخصيتي وهو من أول الناس اللي خلاني أخد بالي ان في حاجه اسمها بورصة وده ابتدى في سنة 2000 تقريباً كان في إكتتاب الشركة المصرية لمدينة الإنتاج الإعلامي وقتها مكنتش البورصة معروفه لناس كتير أنا مش فاكر حتى إيه اللي خلاه يخش هو ملهوش علاقة بالمجال المالي خالص ولكن كان في طرح لشركة اسمها المصرية للإنتاج الإعلامي
الشركة دي نزلت سنة 2000 يمكن أول اسبوعين تلاتة كان السهم بيطلع بطريقة جامدة جداً ، كان هو حاطت حاجه صغيرة في البورصة زي ما قولتلكوا هو ملهوش علاقة بالمجال المالي أوي بس كانت تجربة كده ودي كانت نقطة تحول بالنسبالي لأن أنا ابتديت اتفرج أو اسمع يعني إيه بورصة ، ابتديت بعد كده لقيت في الجرنال اليومي بتاع الأهرام الصفحة دي لازالت موجودة لحد دلوقتي أنا بصيت عليها أونلاين هنحطلكم اللينك في الشو نوتس ، الصفحة دي عبارة عن إيه الأسهم الموجودة في البورصة إيه أسعارها النهاردة إيه أعلى سعر إيه أقل سعر تداولت عليه ، حجم التداول ، أنواع المستثمرين ، القيمة بتاعة المؤشر معلومات بسيطة جداً عن البورصة
ودي كانت الشباك الوحيد اللي ابتديت اتفرج فيه على البورصة ، ابتديت أجيب الجرنال كل يوم ابتديت ابص على الجرنال ، ابتديت أتابع الأسعار ، ابتديت احفظ شوية أسهم الموضوع بالنسبالي كان حاجه غريبة جداً اللي هو أسعارعماله تطلع وتنزل كل يوم ، كل حاجه ليها سعر يومياً ، ليه السعر ده بيحصل؟ ابتدى يبقى عندي تساؤلات أنا وقتها كنت صغير يعني فمكنتش فاهم أوي اللي بيحصل لكن دي كانت أول علامة
بعد كده ابتديت بالصدفة كده وانا في الجامعة روحت محاضرة في مكتبة إسكندرية كان في محاضرة عن البورصة بشكل عام فأخدت واحد صاحبي من القريبين جداً وروحت المحاضرة دي بعدين لقيت الناس بتتكلم عن السوق والأسعار ، والأسعار ليه بتحصل وليه بتطلع وليه بتنزل وفي مدرسة معينة اسمها التحليل الفني
المحاضرين يوميها انا فاكر منهم واحد اسمه أ/ أيمن واكد ، المحاضرة كانت بالنسبالي حاجه سحرية يعني حاجه علمت معايا ، حاجه فجأه كده من لا شيء انا رايح بس اشوف ايه بيحصل وفجأه لقيت حاجه رهيبه بتحصل ، المحاضرة كانت قويه جداً تفسيرات معينه لاسئلة كتيرة في دماغي مكنتش فاهمها ودي كانت نقطة تحول تانية في حياتي اننا روحت المحاضرة دي وانا مكنش عندي أي توقعات
بعد كده سنة 2006 اطرحت شركة المصرية للإتصالات وده إكتتاب كان كبير جداً وقتها برده حصلت هيصة في الإعلام ، طرح كبير في البورصة ، ابتدت الناس تركز ، الاسعار كلها بتاعة الأسهم ابتدت تطلع جامد ، ابتدى شريحه جديدة تخش السوق لأول مره وده ديماً اللي بيحصل في الإكتتابات
الإكتتابات دي من الحاجه اللي بتعملها انها بتدخل شرايح الجديدة من المستثمرين عمرهم ما سمعوا عن البورصة ولكن من كتر ما بيحصل إعلانات عليها والناس بتبتدي تروج ليها فتلاقي شريحة جديدة جداً من المساهمين
سنة 2006 كنت كبرت شويه ، عندي شوية وعي باللي بيحصل فأبتديت اروح ابقى موجود خلال العملية بتاعة الإكتتاب بتاع المصرية للإتصالات لأن برده والدي للمره التانية أكتتب في المصرية للإتصالات يمكن من الإنتاج الإعلامي سنة 2000 للمصرية للإتصالات سنة 2006 هو معملش اي حاجه في النص مستثمرش في البورصة خالص ولكن لما حصل الإكتتاب بتاع المصرية للإتصالات ابتدى يخش تاني وقتها انا كنت بروح معاه الشركة والإيداع بتاع الفلوس والأسهم والحاجات دي كلها فمريت بالتجربة بتاعتي
هنا ابتدى الموضوع يتحول ويتطور بشكل أكبر لأننا ابتديت ادور على كتب ليها علاقة بالبورصة دورت في الأول على كتب بالعربي كان وقتها في كتاب مشهور أوي بتاع أ/ عبد المجيد المهيلمي اسمه التحليل الفني ابتديت اقرا الكتاب ده ، وحصلي تاني حاجه نورت بشكل أكبر بكتير لأن لقيت إن الموضوع بجد حلو جدا بالنسبالي أو يليق بشخصيتي أو عاجبني اللي بيحصل فتأثرت أوي بالكتاب ده وكان بالصدفه مكتوب على ضهر الكتاب زي مراجعة للكتاب من أ/ أيمن واكد اللي قابلته في المحاضرة بتاعة مكتبة إسكندرية زي ما قولنا فلقيت اسمه مكتوب وكاتب مراجعة للكتاب فقولت إيه ده!! ازاي! إيه الصدف دي وحاجه بتحصل مرتين.. يعني حسيت انها علامة اللي هو دور وكمل وامشي في الطريق بتاع البورصة
المهم أنا قعدت أدور وقتها على أ/ أيمن ، كان مكتوب في الإهداء إنه رئيس الجمعية المصرية للمحللين الفنيين فابتديت ادور كده أونلاين كان لسه الأنترنت بسيط شوية كان في موقع مكتوب فيه عنوان او نمرة تليفون مش متذكر أوي يعني بس أعتقد كانت الطريقة اللي أنا جبت بيها عنوان الجمعية كان من الموقع وأتجهت للجمعية من غير ما أعرف أي حاجه دخلت عليهم يا جماعة انا مش فاهم أي حاجه انا قريت الحاجات دي والحاجات دي حلوة جداً أنا عايز أشترك في الجمعية ممكن أعمل إيه عشان أشترك
المهم اشتركت في الجمعية وابتديت ادرس معاهم حاجات ليها علاقة بالتحليل الفني وكان في مستوى أول ومستوى تاني ومستوى تالت ومع الوقت خلصت الحاجات دي وابتديت ادرسها كمان معاهم يعني بعد شوية دوري كبر في الجمعية اننا ابتديت ادرس كمان الحاجه دي ، في كل الوقت ده أنا لسه مشتغلتش أنا لسه في الجامعة أنا لسه بذاكر ، وبعمل حاجات تانية في الحياة ولكن دي حاجه على جنب لقيت نفسي مشدود ليها
بعد كده جالي فرصة أكون موظف تحت التمرين مع نفس المجموعة دي فأبتديت أتعرف على ناس حاولت ألاقي شغل ولقيت من خلال حد تاني في الجمعية اسمه أ/ صالح ناصر واللي أنا بدين ليهم بالفضل أ/ أيمن و أ/ صالح هما الأتنين كانوا نقطة كبيرة في حياتي إني ابتدي في المجال
المهم ابتديت اتمرن معاهم وابتديت اشتغل ، التمرين المفروض كان يبقى شهر أنا قعدت يمكن سنة يعني على قد ما أقدر ما حاولتش أمشى مقولتلهمش أمشي وهما مقالوليش أمشي فقعدت وكنت باخد حاجه بسيطة جداً كموظف تحت التمرين وكنت مبسوط وهما مبسوطين والسنة عدت وكنت لسه في أخر سنة في الجامعة بتاعتي
بعد كده قعدت واشتغلت بعد ما وصلت لموضوع التمرين ده ابتدا الموضوع يتحول لموظف ثابت وابتديت من هنا رحلتي في المجال المالي
الكلام ده يمكن من 15 سنة وعايز بس أحط شوية نقط عن اللي حصل أو ألخص الأهداف اللي بتكلم فيها انا قصتي يمكن قصة عادية مكرره خمسميت ألف مره مفهاش حاجه مميزة أوي يعني ولكن أنا في نقط معينة وأنا ببص من 15 سنة وانا واقف دلوقتي بعد الخبرة والشغل أنا عايز أعرف أنا استفدت إيه من التجارب دي
أول حاجه الشغف مهم جداً يعني لما أنت يبقى عندك شغف لحاجه ، عندك حاجه بتحبها ، عندك حاجه أنت عايز تنجح فيها الموضوع بيفرق تماماً وانا فاهم إن مش كل الناس عندها القدرة أنها تشتغل في الحاجه اللي عندها شغف فيها ولكن انت ممكن تكون بتشتغل شغلانة عادية جداً بس أنت عندك شغف جانبي في حاجه تانية ممكن تبتدي تقرا فيها تبتدي تعلم نفسك فيها ممكن تبتدي حاجه على جنب صغيرة ممكن مع الوقت تكبر انت متعرفش إيه اللي ممكن ينجح في الحياة
التجربة دي اثبتتلي ان انا وانا صغير لو كنت قولت إني هطلع واشتغل اللي انا بشتغله النهاردة مستحيل ولكن ان انت ابتديت تمشي ورا الشغف ده ممكن الموضوع يقلب معاك بشغلانة أو منتج تبيعه أو اي حاجه الكلام ده عموماً في العموم ملوش علاقة بالمجال المالي بالذات يعني
تاني حاجه انت مش محتاج موافقة الناس في اي حاجه بمعنى إيه المجال المالي وقتها مكنش في حد يعرف يعني إيه بورصة مفيش ناس كتير بتشتغل محدش فاهم فيها حاجه ، أنا مكنتش محتاج موافقة من الناس إنه الله انت بتشتغل في المجال الفلاني أو أطلع دكتور أو مهندس أو أطلع الحاجات الرئيسية اللي هي بتحتاج موافقة من المجتمع ، انت ممكن تسوق لوحدك ، ممكن تروح في حته لوحدك وتسوق لوحدك عادي طول مانت فاهم انت سايق إيه وعارف إنت رايح فين ودي تاني نصيحة انت مش محتاج موافقة الناس في أي حاجه
تالت حاجه ان كل واحد عنده قصة فريدة من نوعها ، تفاصيل مختلفة ، عمرك ما هتاخد القصة بتاعتي دي وهتطلع بنفس النتائج حتى لو حاولت تعمل نفس الحاجات فكل واحد عنده قصة فريدة من نوعها
رابع حاجه إنك تفرك أو تجرب أو تحاول ومتستناش إن النتيجة بتاعتك تبقى صح ، يعني ديماً حاول ، جرب ، أفتح الباب وأقفله ، روح هناك ، اسمع دي ، اقرا كتاب أعمل حاجات مختلفة ولكن تكون كلها بتصب في هدف واحد فالفرك ده حاجه مهمه جداً
خامس حاجه لازم تبقى فضولي يعني متاخدش اي حاجه مسلم بيها ، يعني مثلاً أنت بتسمع البودكاست ده عشان عايز تعرف حاجات ليها علاقة بالحياة المالية متاخدش كلامي اللي انا بقوله ده على إنه مسلم بيه انت لازم تعمل بحث ، لازم تعمل تحليل خاص بيك لازم تكتب أفكارك ، لازم تكون فاهم اللي بيتقال النهاردة ده ممكن يكون غلط في المستقبل يعني ممكن حاجه احنا وصلنالها النهاردة واتعلمناها ممكن بعد سنة / 5 / 10 المفاهيم دي تتغير لأن النظام نفسه بيتغير أو البيئة نفسها بتتغير فديماً كن فضولي
النقطة اللي بعد كده لازم تكون محترف ودي حاجه انا اتأثرت بيها بسبب اني بتفرج على رياضة كتير وبالذات كرة سلة اللي هو الدوري الامريكي للمحترفين ، أنا بحس ان الناس دي على مستوى من الأحترافية مش طبيعي يعني الفرقة ممكن تكون خسرانه الماتش ، والماتش خلص خلاص في نص الشوت التاني مثلاً اللعيبة مازالت بتموت نفسها في كل كورة ليه؟ لأن هو بيبني نفسه ، بيمرن نفسه حتى لو هو خسران لما بيلعب بيلعب كل دقيقة على الملعب زي هو كسبان هو خسران هو ملهوش دعوة بالنتيجة هو محترف هي دي شغلته ، الأحتراف ده حاجه مهمه جداً جداً وأول ما بيطلع من الملعب بيبقى إنسان طبيعي عادي جداً ، يعني هو جوه الملعب ممكن يبقى جامد وشديد وبيزعق ومركز وكده ولكن هو بره بيكون إنسان طبيعي بيهزر مفيش اي مشكله ، فالأحتراف ده حاجه مهمه جداً جداً
سابع نقطة أنا برده أتعلمتها ان انت لازم تبقى دائم التكرار يعني بتقدم نفس النتايج بطريقة مكررة بمعنى إيه أن انا مينفعش اصحى من النوم فجأة حاسس إني مش عايز اروح الشغل فمش هروح الشغل ، أو اعمل مفاجئات معينة في الشغل بتاعي أو أغير رأيي كل 5 دقايق ، الاستمرارية مهمه جداً يعني أنا بيريحني جداً لو بشتغل مع واحد مثلا 7/10 ولكن هو كل يوم هيقدملي الـ 7/10 كل يوم مفيش مفاجئات ، زي الزحمة كده الطريق بيبقى فاضي وبعد كده بيتزحم فيبتدي يعمل أزمة نفسية ولكن الراجل ده لآ هو سرعته ثابتة ، أداءه ثابت ، بيعمل المطلوب منه حتى لو مش أحسن حاجه ولكن هو دائم ، أنا ده بالنسبالي مريح جداً وأحسن بكتير من واحد نجم أو 10/10 أو 9/10 بس هو بيجي يوم ويغيب 15 فبالنسبالي الأستمرارية من أهم الحاجات في حياتك فلو أنت ابتديت في مجال معين وركزت فيه خليك مستمر فيه
تامن حاجه مفيش حاجه واحده تنفع كل الناس بمعني إن كل شخص مبني بطريقة مختلفة فحضرتك هتاخد حاجه معينة هتقول دي نفعت مثلا على 80% من الناس ، ولكن هنلاقي إن ممكن أنت تكون من الـ20% عادي صدفةً إنت طلعت من الـ20% فديماً تأكد إن مفيش حاجه واحده تناسب الجميع ، يعني إيه احسن طريقة في الاستثمار مقدرش أقولك والله حضرتك دي أحسن طريقة نزلوها مفيش حاجه اسمها كده ليه؟ لأن كل واحد عنده متطلبات في حياته ، كل واحد عنده دخل معين هيعيشه مستريح ، كل واحد عنده إلتزامات مختلفة فمتاخدش حاجه جاهزة كده من على الرف ، او علبة كده فيها الحل السحري مفيش حاجة اسمها كده
النقطة اللي بعديها وده اللي أنا اتعلمته كأب بقى ، وأتعلمته من والدي ان التصرفات الغير مباشرة اللي أنت بتتعلمها من الأهالي أهم من الأوامر المباشرة يعني مثلاً أنا شوفته بيبص على البورصة ، شوفته راح حط فلوس في حاجه ، نزل عمل حاجه.. دي الحاجات اللي أنا شوفتها وفضلت في دماغي ، التصرفات وليس الأوامر المباشرة ، أنا مش فاكر دروس معينه اتقالتلي عمر أعمل كده او متعملش كده مش فاكر الحاجات دي فديماً انت كن نموذج لأولادك أو للناس الأصغر منك تتبعه من تصرفاتك الغير مباشرة ، برده حضرتِك خلي بالك من تصرفاتك الغير مباشرة أهم بكتير جداً من انك تزقيهم أنهم يعملوا حاجه او توجهيلهم رسالة مباشرة وانا بقول الكلام ده ليا كأب برده
النقطة اللي بعديها ان توقعاتك في الحياة لازم تبقى محسوبه يعني مينفعش مثلاً ان ابني بيلعب كورة أنا متوقع ان ابني هيكون محمد صلاح! بنسبة 99.9 هو مش هيبقى محمد صلاح يبقى توقعاتي لازم تبقى حقيقية ، لو طلع محمد صلاح يبقى مبروك عليك.. فأنت ديماً لازم تنزّل توقعاتك لازم تستمتع بالنجاحات الصغيرة متجريش ورا نجاح كبير هو ده المهم عشان احنا مش في سباق
أخر حاجه هقفل بيها النهاردة لازم تبقى متواضع وطيب ولازم تبتدي تحوش وتستثمر.. النهاردة معلش هي حلقة قصيرة شوية أنا حبيت بس أفكر في الـ 15 سنة اللي فاتوا وقفت وقفة مع نفسي قولت أفكر إيه اللي بيحصل يمكن حد يستفيد من التجربة دي شكراً على وقتكوا معايا النهاردة واشوفكوا الاسبوع الجاي في كلام ينور
Translation of some words and terms:
Inspiring ملهم
Book Review مراجعة الكتاب
Internship فترة تدريب
Full Time Job وظيفة بدوام كامل
Career مهنة / وظيفة
Product منتج
Confirmation موافقة
Hustling الصخب
System نظام
Environment بيئة
Professional محترف
Level مستوى
Professionalism الاحتراف
Consistent ثابتة / مستمرة
Population الناس
One Fits for All واحد يناسب الجميع
Shelf رف
Direct مباشرة
In direct غير مباشر
Reflect يعكس
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #البورصة #المجال_المالي #التجارب #الخبرات #النتايج