75. حلقاتك برجالاتك
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
أي حد بيرزق بمولود جديد بيصب كل أهتمامه على توفير احتياجات المولود الوقتية وده طبعاً شيء اساسي ومهم ، ولكننا بننسى إن في يوم من الأيام الطفل ده هيحتاج يدخل جامعة ، ويتجوز.. وهيحتاج مصاريف كتيرة جداً في المستقبل عمرنا ما بنخطط لها ، موضوع حلقة النهاردة ممكن يبان غريب شوية ولكنه مفهوم بسيط جداً لو طبقناه هيكون ليه عوائد عظيمة في المستقبل
01:24 فرصة المولود الجديد في الاستثمار
02:02 عاده صغيره وبسيطة تساعدك في مصاريف طفلك المستقبلية
02:18 الصحة والتعليم من أكتر القاطاعت اللي بيحصل فيها تضخم
03:11 معظم هدايا المولود الجديد إستهلاكية بتُستهلك أول سنتين من عمره
04:55 دولار واحد في اليوم لمدة 18 سنة ممكن يعمل إيه؟
07:10 لو ابتديت وطفلك 5 سنين؟
07:30 كل ما تبتدي بدري كل ما الأرقام هتتعاظم بسبب المضاعفة
07:58 لو ابتديت وطفلك 10 سنين؟
10:04 ازاي تعلم ابنك/بنتك يكون مستقل ذاتياً؟
هدفنا من الحلقة دي إنك بحاجه بسيطة جداً توفر على نفسك الجهد والعناء والضغط النفسي اللي بيحصل للأب والأم عشان يعلموا أو يجوزوا أولادهم
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة أنا هتكلم على موضوع ليه علاقة بالزيادة بتاعة الفلوس بشكل متضاعف بسبب الوقت ، النهاردة أنا هتطرق للموضوع بطريقة مختلفة شوية بإننا هبص على مين أكتر واحد عنده وقت في الدنيا – طبعاً الأعمار بيد الله زي ما أحنا عارفين – ولكن العمر المتوقع لطفل لسه مولود هو يعتبر أكتر من والده أو والدته بس إحصائياً مش بتكلم على هل دي حقيقة ولا لأ
01:24
فلو جينا أتكلمنا من ناحية الوقت هنلاقي إن البيبي المولود الجديد عنده فرصة للاستثمار – أنا عارف إن الموضوع ممكن يبقى غريب شوية لو فكرنا فيه بالطريقة دي – ولكن هو الوحيد اللي عنده الوقت الأطول في الاستثمار
01:40
ومن هنا هنرجع نقول إن غالباً الناس أول ما بتولد بتبقى فرحانة وبيبقى في طبعاً مصاريف كتير على الأب والأم لتوفير أحتياجات ولكن بننسى إن في يوم من الأيام الطفل ده محتاج جامعة ، محتاج يتجوز ، محتاج مصاريف قدام وعمرنا ما بنخطط لها
02:02
هدف الحلقة دي إني أوجه وجهة نظري للناحية إنك لما تجيب طفل أنت ممكن تعمل حاجات بسيطة جداً تساعدك تخليك قدام متعملش المجهود الكبير اللي بنشوف الناس بتعمله وأبنها بيتجوز أو بنتها بتتجوز
02:18
برضه من الحاجات اللي أسعارها ديماً بتطلع التعليم هنلاقي في قطاعات كتير مبيحصلش فيها تضخم ولكن زي مثلاً الإلكترونيات ، القطاع التكنولوجي ساعات أسعاره بتقل مع الوقت يعني لو بتشتري تليفزيون النهاردة قدرتك على تحمل تكاليفه بقت أسهل من 10 سنين ، من 20 سنه من 30 سنه! فمع الوقت أسعار التكنولوجيا بتقل ولكن القطاع التعليمي ، الدراسة ، الجامعات في أي إحصائيات دولية بتنزل على الموضوع ده بنلاقي إن الصحة والتعليم من أكتر القاطاعت اللي بيحصل فيها تضخم
وده لسبب إن ممكن يكون المعروض منه أقل من الطلب يعني ديماً الناس بتبقى في إحتياج لتعليم أفضل ، المنافسة على كليات القمة بتبقى أعلى وبتكلم هنا على التعليم الدولي حتى
03:11
فإزاي ممكن نفكر في الموضوع ده بطريقة تانية هنلاقي إن لما بيبقى في مولود جديد في العيلة بنلاقي إن بيبقى في هدايا من جده وجدته وعمه وخالته أياً كان بيحبوا يهادوا العيلة دي وبنلاقي إن الهدايا دي في معظم الأوقات بتبقى حاجات إستهلاكية وممكن نستهلكها في السنة الأولى أو التانية من عمر الطفل ، ممكن تبقى لعبة أو أياً كان الحاجه اللي الأسرة طلباها
ولكن لو وجهنا جزء بس في فكرنا زي ما قولتلكوا احنا ممكن نغير من الضغط المادي اللي هيحصل على العائلة دي في المستقبل
وبرضه بتبقى حاجه بتخليني كأهل أركز معاه مالياً ، أطمن عليه .. أي أب وأم هو ديماً عايز يشوف ابنه في وضع أحسن منه مادياً وتعليمياً والكلام ده كله فالأهداف أعتقد واضحة مش محتاجه أبررها
04:07
لو ابتدينا بقى نبص على الأرقام أنا هنا معلش هستخدم الحسابات بالدولار عشان الموضوع يبقى عام مش على دولة واحدة أو منطقة واحدة في عملات كتير بيحصل فيها تضخم مبنقدرش نتوقعه على المدى الطويل ولكن خلينا نتكلم بالدولار والنهاردة أنت تقدر تعرف قيمة الدولار وتعرف التضخم مثلاً بعد 20 سنة يعني في استقرار شوية على عملة زي الدولار فهتكلم في حساباتي النهاردة بالدولار وممكن أنت تترجمها بالعملة اللي أنت عايش فيها مش هتبقى بعيده أنك تعرف التحويل بتاعك النهاردة قيمته كام ومحتاج أحط بقد إيه دولار بدل مثلاً ما يبقى رقم ثابت بالعملة المحلية
04:55
فلو على سبيل المثال أخدنا طفل أتولد النهاردة ، جبنا هدايا ، حد من أهله عايز يحط حاجه للتحويش والكلام ده كله فهناخد فالأول مثال إني هحط 1 دولار في اليوم
1 دولار في اليوم هحوشه من سن 0 لحد سن 18 يعني تقريباً في الشهر هحط 30 دولار وهحطه في نوعين من الحسابات الحساب الأول حساب أستثماري العائد بتاعه مثلاً 7% هنقول مثلاً إني بحطه في محفظة متنوعة من الأسهم العالمية أو أياً كان
والحساب التاني حساب توفير هياخد 1.5% على الدولار وبرضه الفوايد هنا تعتبر واطية
05:33
هنلاقي إن في المثال الأول الدولار اللي أنا حطيته في حساب الاستثمار والولد عنده 18 سنه هيبقى عنده تقريباً 13 ألف دولار ، لو حطيته في حساب توفير هلاقي عنده 7500 دولار
يبقى الأسهام البسيط اللي انا حطيتها لأبني اللي هو 30 دولار في الشهر لما كبر لقيت عنده 13 ألف دولار في الاستثمار و7500 دولار في التوفير
دولار في اليوم الرقم ممكن تقول عليه آه أنا ممكن أعمله بس لما هنلاقي إن عندك 13 ألف دولار أو 7500 دولار أياً كانت طريقة الاستثمار هنا مش فارقة معايا الفكرة فالمفهوم هنلاقي إن الرقم ده فعلاً ممكن جداً يساعد واحد عنده 18 سنة إنه يقدر يخش جامعة
طيب لو حطينا 5 دولار في اليوم أو ما يعادل 150 دولار في الشهر!! هنلاقي إن محفظة الاستثمار بتاعته بقى فيها 65 ألف دولار أبتدت الأرقام تبقى كبيرة مع إني بحط 5 دولار في اليوم ولكني لقيت الأرقام على سن 18 بقت كبيرة وده راجع للمضاعفة في 18 سنة حصل فيهم مضاعفة للفلوس
طيب لو حطيتها في حساب التوفير هلاقي إني معايا 37 ألف و700 دولار يعني تقريباً 38 ألف دولار وده برده رقم مهم جداً إنك تبتدي بيه حاجات لأبنك في السن ده
07:10
هاخد كده نفس الأمثلة لو حد بيسمعني عنده طفل عنده 5 سنين فبرضه مش لازم تكون أبتديت من الصفر
لو حطيت دولار في اليوم هتلاقي وهو عنده 18 سنة بإذن الله عنده 7700 في الحساب الاستثماري وهيبقى عنده 7200 في حساب التوفير
لو حطيت 5 دولار هلاقي عنده 38 ألف و 700 في الاستثماري وفي المثال التاني بتاع التوفير هيبقى عنده 26 ألف و200
يبقى حتى الـ 5 سنين اللي في الأول اللي أنا ملحقتهمش بجد فيهم فايدة وفيهم مضاعفة يبقى كل ما ابتدي بدري كل ما الأرقام هتتعاظم والفايدة هترجع أكتر للطفل وهو عنده 18 سنة
07:58
طيب لو ابتديت وهو عنده 10 سنين؟
أنا برده اتأخرت ومسمعتش ومعرفتش وعندي طفل عنده 10 سنين فنفس المثالين هحط دولار في اليوم هلاقي عنده 4000 دولار في الحساب الاستثماري وهو عنده 18 سنة وفي التوفير هيبقى عنده 3000 دولار
لو زودت الأرقام لـ 5 دولار المثال التاني هلاقي عنده 20 ألف دولار في حساب الاستثمار و15 ألف دولار في حساب التوفير
ففي جميع الحالات الأرقام مهمه ومفيده جداً ولو حد عنده القدرة يحط أرقام أعلى من كده مثلاً 10 دولار في اليوم أو 300 دولار في الشهر في حساب الطفل بتاعه الأرقام هتتعاظم وتتعاظم وممكن برده تحسبها أو تبعتلي ونحسبها مع بعض بس أنا هنا بتكلم كفكرة
08:46
طب تعالوا ناخد مثال إن أبنك أو بنتَك او بنتِك وصلت لسن 18 ودخلت جامعة عادية مش محتاجه مصاريف عالية أو عرفت تتكفل أو هو يتكفل بنفسه وبمصاريفه وأتجوز وساب الفلوس دي على جانب ولا حد بص عليها يعني أهله عملوله الحاجه دي من سن 0 لسن 18 من غير ما هو يستخدم الفلوس دي
وبعد الـ 18 سنة هو محطش ولا دولار فيها ، يعني هنقول إن حد عمله الهدية دي من 0 لـ 18 وعند الـ 18 قالوله خد الحساب بتاعك أنت كمل ملناش دعوة بيك
هنلاقي إننا لو مشينا بالمثال بتاع الـ 5 دولار في اليوم من سن 0 لـ 18 هنلاقي إن الطفل ده لما يبقى عنده 67 سنة هيبقى عنده في الحساب 2 مليون دولار .. رقم مخيف وكبير ولكن دي الحسابات اللي بالأرقام يعني لو حطيت الـ 5 دولار دي في اليوم وعملتلها استثمار وسبته بعد ما تم الـ 18 أديتله الحساب وهو ملمسهوش لحد سن الـ 67 هيبقى عنده 2 مليون دولار
اتنين مليون دولار دي أعتقد في أي زمن في أي وقت هتبقى فلوس مريحة جداً جداً للتقاعد
10:04
الحاجه كمان التانية اللي هتعلمها لطفلك لما تديله الحساب بتاعه وهو عنده 18 سنة أنت كنت ملتزم فيه وحاولت هو كمان يبتدي يبص عليه ويبتدي يحوش من أول دخل له وهكذا أنت هنا علمته ازاي ممكن يكون مستقل ذاتياً ويكون عنده فكر التحويش إنه عنده مبلغ ثابت بيحطه كل شهر
أنا هنا مش بتكلم في قد إيه الأرقام لازم تبقى كبيرة أنا بتكلم أكتر على قد إيه العادة مهمه إننا ابقى شايفها
10:35
طيب لو في النص واحنا ماشيين كده عنده مثلاً عيد ميلاد أو أي حاجه وجاله مثلاً دخل معين حد مثلاً بدل ما يديله هدية أداله فلوس جده أو جدته ديماً الأمثلة دي ظريفة لأنهم من أكتر الناس اللي بيدفعوا فجه الراجل أداني 1000 دولار / 500 دولار / 100 دولار أياً كان الرقم أنا وقتها ممكن برضه أخش أحطه كأهل في الحساب من غير ما أفكر
وبعد شوية تاني الحاجات اللي احنا بنجيبها بتبقى حاجات أستهلاكية فهرجع وأقول أن هي آه ممكن تستمتع بيها لعبة هتستمتع بيها 5 دقايق ولكن مهم جداً انه يبقى عنده حاجه إدخاريه زي دي
مش بقول برضه أنك متجبش الحاجات التانية اللي هتسعده وتخلي حياته لطيفة كطفل ويعيش سنه والكلام ده كله أنت ممكن تعملها في الخلفية من غير ما هو ياخد باله لحد ما يوصل او توصل لسن معين وتبتدوا تعرفوهم عن الموضوع
11:29
الحلقة دي يعني هي حلقة خفيفة مفهاش تفاصيل كتير مش زي الحلقات بتاعتنا العادية ولكن هو مفهوم صغير جداً اللي ممكن تتعمل تفرق كتير بمجهود قليل وفيها تأثير كبير
وتاني أنت ممكن تنوع الهدف بتاعك ممكن تقول أنا عايز أعمل الحساب ده للجامعة ، للجواز ، للتقاعد عايز تعمل الأتنين ، عايز تعمل التلاتة براحتك هي بس طريقة تفكير أنها بس بتسلط الضوء على الموضوع ده
11:59
ممكن حضرتك تروح تفتح حساب بإسمك في بنك تاني مخصوص للحاجه دي وتبقى بعيد جداً عن مرتبك ومصاريفك الشهرية أنت ممكن تعملها زي ما أنت عايز ، ممكن تشتري في صندوق استثمار مخصص للولد في شركات مثلاً ممكن تفتح بإسم القاصر على طول فممكن من أول يوم تفتحله حساب بإسمه وتحط فيه الحاجات دي أياً كانت التفاصيل دي كلها بالنسبالي مش مهمه كل واحد يعملها بالطريقة اللي تريحه بس الهدف منها انك تبقى فاهم ان دي حاجه موجودة في الحياة
شكراً جداً على وقتكوا النهاردة وإن شاء الله أشوفكوا الأسبوع الجاي
Translation of some words and terms:
Compounding مضاعفة
Sectors القطاعات
Affordability القدرة على تحمل التكاليف
Stability ثبات / استقرار
Contribution إسهام / مساعدة
Concept مفهوم
Significant مهم
Impact تأثير
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #المضاعفة