73. توزيعات الأرباح في البورصة
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة جديدة وضيف جديد في كلام ينور معانا النهاردة الأستاذ أحمد يوسف ..
أحمد هو عضو منتدب في المجموعة المالية المصرية Efg Hermes
هو المسؤول عن حسابات المؤسسات في المجموعة (فرع الإمارات) .. النهاردة أول حلقة من الحلقات اللي أحمد هيكون معانا فيها .. بنتكلم النهاردة على توزيعات الأرباح في البورصة
Ahmed Youssef @LinkedIn : وتقدروا تتواصلوا مع أحمد من خلال اللينك
ازاي الشركة بتوزع أرباحها في السوق؟
هل الفلوس اللي جايه عن طريق الأرباح ممكن أرجع استثمرها تاني في الشركة أو أصرفها؟
ساعات بنشوف الشركات بتعمل التوزيع ده من خلال الأسهم المجانية بدل ما يديني الفلوس كاش يديني أسهم زيادة صح؟
هل السياسات الاستثمارية لتوزيعات الأرباح بتختلف من شركة للتانية؟
في الجمعية العمومية لأي شركة المفروض بيدوا توجيهات لتوزيعات الأرباح .. ممكن تكلمنا شوية على إيه التوجيهات دي؟
بعض الشركات مش بتوزع أرباحها هل دي تعتبر خطر أو الناس مبتبقاش عايزة تشتريها ولا ليها المستثمرين بتوعها؟
شكل الكوبونات والتوزيعات بتبينلك النضج بتاع الشركة في أنهي حته في دورة الأعمال التجارية .. صح؟
هل المعلومات دي موجودة أونلاين يعني الناس ممكن تعرف ازاي عن التوجيهات؟
هل أقسام الأبحاث في شركات السمسرة ممكن تساعدني؟
كل شركة بتوزع أرباحها على حسب السياسة بناءاً على السيولة صح كده؟
أنا بس عايز الناس تعرف إن الكوبونات دي نوع من انواع الدخل السلبي اللي ممكن يجيلك من استثمارك في البورصة
استنونا الحلقة الجاية وموضوع جديد مع ضيفنا الأستاذ أحمد يوسف
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور النهاردة معايا ضيف عزيز الأستاذ أحمد يوسف هو عضو منتدب في المجموعة المالية المصرية ، أحمد بيشتغل من فرع الإمارات مسؤول عن حسابات المؤسسات في المجموعة ، علاقتنا ترجع لفترة طويلة وهو من الناس اللي ديماً بحب أتكلم معاها في المجال المالي فحبيت النهاردة أستضيف أحمد ويشرفني بوقته وأتابع معاه كذا موضوع كان في دماغي عايز أتكلم فيه يمكن النهاردة أول حلقة من الحلقات اللي أحمد هيكون معانا فيها وهنتكلم على العوائد اللي جايه من الأسهم يارب تتبسطوا من الوقت وتسمعوا من أحمد لأن أحمد من الناس اللي بحس خبرتها في المجال المالي طويلة وعميقة جداً وتقدروا ديماً تتواصلوا مع أحمد من خلال اللينك اللي هنحطه في الشو نوتس اسيبكوا تسمعوا الحلقة
عمر: اول حاجه يا يوسف عايز أرحب بيك النهاردة أنا مبسوط جداً جداً أن أنت معايا ، من أول ما ابتديت البودكاست وانت من الناس اللي في دماغي ديماً نفسي يجو معايا فشكراً انك جيت معانا النهاردة
أحمد: والله شرف ليا شكراً يا عمر
عمر: أنا عارف إن يمكن دي أول مره نتكلم في بودكاست ده مع بعض ، احنا اتكلمنا كتير طبعاً قبل كده بس النهاردة احنا بنحاول نغطي موضوع بالنسبة للناس اللي بتستثمر في أول حياتها وعايزة تعرف إيه العمليات غير الشراء والبيع اللي أنت ممكن تشوفها في محفظتك وبالنسبالك ممكن تبقى معقدة شوية ومش فاهمها .. يعني أنا في أول حياتي أتذكر وانت ممكن كمان أول مره نشوف الحاجات دي بالنسبالنا برضه كانت غريبه ، فأنا في ناس كتير من اللي بيسمعونا لأول مره بيستثمروا وبيبعتولي رسايل فأنا عايز أتكلم كده وابتدي معاك في أول نوع على أرباح الشركات بشكل عام..
ازاي الشركة بتوزع أرباحها في السوق؟
يعني لو أنا عندي حصة في شركة وعندي أسهم.. ازاي الشركة بتوزع الأرباح بتاعتها؟
أحمد: هو طبعاً توزيع الأرباح بيبقى ديماً احد أهم أسباب الأستثمار لناس كتيرة مش مجرد إنه عائد على رأس المال بس ده هو كوبون الكاش أو كوبون الأسهم هو اللي بيبقى فارق كعائد لناس لما بيبقوا مستثمره إن يجيلها دخل تاني غير المرتب من الشغل أو عمل خاص أو أي حاجه .. فالعائد أو توزيع الكوبون أهم حاجات الناس بتستثمر ليه
الكوبون واضح وصريح بيطلع من أرباح الشركة مش من رأس مال الشركة ، الشركة بتحقق أرباح وعلى أساسها ممكن توزع كوبون ، والكوبون نوعين حسب سيولة الشركة في وقت معين أو على حسب هدف الأستثمار ، هدف الشركة بتكبر ازاي وبتسخدم الفلوس اللي هي بتطلعها من الأرباح دي هل عشان تكبر الشركة او على أساس أن هي تدفع للمستثمرين بتوعها بس
فالنوع الأولاني طبعاً هو الكوبون كاش بيبقى واضح وصريح بيطلع من أرباح الشركة بيتحدد بنسبة معينة في العادة الشركات بتدي إرشاد تحديد معين إن أنا عادة مثلاً في الـ 3 سنين الجايين هوزع نسبة كذا من أرباحي أو مش هوزع لأن أنا عندي صرف على النفقات الرأسمالية معينه إننا نزود الصرف فيها فمش هيبقى عندي سيولة أوزع كوبون كاش .. وإلخ
فالكوبون الكاش مباشر جداً بيطلع من الشركة ، الفلوس دي بتتوزع على المقاصة لو احنا بنتكلم على مصر وعلى أساسه بيبقى السمسار بيجمع بناءاً عن العملا من الشركات فالعميل مش لازم يتدخل في الموضوع إنه يجيله فلوس الكوبون بتاعه
عمر: حلو .. يعني أنا مثلاً عندي استثمار في سهم 100 جنية مثلاً خلينا نبسط الموضوع ، الشركة السنادي حققت 10 جنية أرباح ، كل شركة بتقولي أنا مش هوزع الـ 10 جنية كلهم صح كده؟
أحمد: هو الكوبون في الشركات كل واحده تفرق عن التاني ، في شركات بتوزع نص سنة وفي بتوزع سنة ، النص سنة نادر في مصر بس السنة هو اللي بيقى موجود فلما بتطلع أرباح السنة كلها هي دي اللي على أساسها بتحدد هطلع مثلاً نسبة 60 أو 70% من الفلوس دي فزي ما أنت بتقول أنا لو طلع 10 جنيه أرباح وأنا هوزع 60% يبقى أنا كل التوزيع بتاعي 6 جنيه
عمر: الـ 6 جنيه دي جاية من أرباح الشركة وزي ما أنت قولتلي السمسار بتاعي هو اللي بيلمها بالنيابة عني
أحمد: بيحصلهالك من المقاصة .. بظبط كده بتتودع في حسابك مع السمسار فلو أنت اول مره بتستثمر وبتودع فلوس في حساب السمسار بتاعك وعلى اساسها بتشتري ولما تبيع بيدخلك فلوس البيع .. الكوبون الكاش بيبقى بنفس الطريقة
عمر: يعني معنى كده إني مش محتاج أبيع أسهم عشان أطلع سيوله ده بيبقى سيولة داخلة المحفظة بتاعتي أنا دخلي 6 جنيه النهاردة أضربهم في عدد الأسهم اللي عندي بيجيلي سيولة من غير ما أبيع أو أعمل أي حاجه أو أرفع سماعة التليفون على حد بتدخل في حسابي ، الفلوس دي ممكن أرجع استثمرها تاني في الشركة أو أنا أخدها أصرف بيها متفرقش زيها زي الإيجار اللي بتلمه لو عندي شقة أو حاجه بتوزعلك حاجه سنوية الأسهم ده المقابل ليه تقريباً جاي من أرباح الشركة صح كده؟
أحمد: صح لأنه طالع من الأرباح هو بيتحصلك وبيتحط في حسابك وممكن ترجع تستثمر الفلوس دي تاني تشتري نفس السهم أو اسهم غيرها أو تسحب الفلوس دي تصرفها زي ما أنت عايز والحل التالت طبعاً انك تسيبها في حسابك لحد ما يجيلك فرصة استثمار جديدة
عمر: حلو جداً .. طيب في نوع تاني ساعات بنشوف شركات بتعمل التوزيع ده من خلال أسهم يعني بدل ما يديني الفلوس دي كاش يديني أسهم زيادة .. صح كده؟ اللي هي اسمها الأسهم المجانية
أحمد: بالظبط .. الأسهم المجانية دي يعني لو زي ما انت قولت احنا فاتحين شركة رأس مالها 100 جنيه الـ 100 جنيه دول متقسمين على 100 سهم ، سعر السهم في السوق مثلاً 2 جنيه وأنا معايا 100 سهم فالقيمة السوقية دلوقتي بقت 200 جنيه بس عدد الأسهم 100 أنا لما بوزع اسهم اللي أنا بعمله كشركة إننا بطلب من الهيئة إن أنا هزود رأس مال الشركة دي بعدد اسهم أياً كان احنا هنقول اننا هنزود رأس المال
عمر: عملنا 10 جنيه أرباح فهنوزع 6 جنيه أرباح برده بس في شكل أسهم مجانية
أحمد: بالظبط كده فأنت الـ 6 جنيه دول هتقسمهم على قيمة السهم اللي هو في مصر جنيه أو 10 جنيه وعلى اساسه أنت بتصدر أسهم جديدة وبتغير في السجل إنك عدد اسهمك زاد وبتوزع الاسهم دي مجاناً على المستثمرين حاملين الأسهم في الشركة ، يعني لو أنا وانت حاملين دول المقاصة بتصدر بعد ما تاخد الموافقات بتصدر عدد الأسهم الزيادة بنشوف ملكية كل شخص قد إيه في الشركة وبتوزع الأسهم المجانية دي على حسب نسب الإمتلاك في الشركة
عمر: هايل يعني في نفس المثال ده هنحط الـ 6 جنيه اللي أنت عملتهم جداد دول نفس المثل اللي أنت قولته شركة عندها 100 سهم 6 أسهم جديدة فأنا النهاردة هينزلي 6% من رصيدي اسهم زيادة بالتقريب يعني
أحمد: صح كده .. وساعات زيادة رأس المال دي مبتبقاش رقم مقفول ممكن يبقى 6 أسهم وربع ، 6 أسهم ونص بس أنت متقدرش تدي 6 اسهم وربع لحد أنت لازم تدي السهم كامل فالفرق ده بيتحسب كاش
عمر: تمام واضحت كده ، يبقى أنا كواحد حامل للأسهم أنا ممكن أسمع من الشركة انها بتوزعلي كل سنة يا أسهم مجانية يا كاش .. طيب لو بصينا على تاريخ الاسهم في أسهم مشهورة أنها بتوزع كوبونات وفي اسهم تانيه مش مشهورة أنها بتوزع كوبونات يعني السياسة الاستثمارية بتاعة الإدارة بتاعة كل شركة بتختلف من شركة للتانية مظبوط؟
أحمد: طبعاً لأنه على حسب السيولة على حسب نضج الشركة في حاجات كتير بتدخل في قرار انا بطلع كوبونات اسهم أو بطلع كوبونات فلوس لانه خلينا واقعين في شركات بيبقى معاها نسبة سيولة معينة ، ونسبه ارباحها كويسة بس السيولة هو محتاجها في حاجه تانية فبيقسم على الاتنين ممكن يدي جزء كاش وممكن يدي جزء اسهم هو بيقسم يعني أنا هربح 10 جنيه يقولك أنا هوزعهم كلهم بس هوزع نصهم كاش ونصهم اسهم اعرف انك هيجيلك من الارباح دي يعني لو احنا شركاء في شركة 50% 50% انت معاك نص الشركة وانا معايا نص الشركة وطلعنا ارباح 100 جنيه يعني انت المفروض يجيلك 50 جنيه وانا 50 جنيه نص ونص يعني 25 جنيه داخلين ككوبون كاش و 25 جنيه هيدخلولك كاسهم زيادة بعد ما نزود رأس مال
عمر: وانت برده ليك الحق في بيعها يعني لو جالي الاسهم الزيادة دي ، برده في حاجه انت ذكرتها ظريفة إن الإدارة ساعات بيدي إرشاد على السنين اللي قدام يعني أنا لو سمعت المحادثة الجماعية بتاعة الشركة أو الجمعية العمومية بتاعتها ساعات بيدوا توجيه ممكن تكلمنا شوية كده على إيه التوجيهات دي؟
أحمد: هو عادة مبدأ التوجيه إنه بيتكلم على إستراتيجيه الشركة ، يعني لو هي شركة ناضجة عمرها 20 / 25 سنة في نفس المجال صرف رأس المال على قد ما هو محتاج فاللي بيدخله أرباح صرف فهو مش محتاج الفلوس دي إنه يكبر الشركة فممكن التوجية بتاعه يقولك إني هوزع جزء كبير أو كل الأرباح بتاعتي على الاسهم دي بتبقى حافز انه يبقى عارف إن الراجل ده لما يدخله أرباح وانا عارف انه ارباحه صحيح مش بتنمو بشكل كبير في السنة بس مدام هو بقاله 4 سنين أول سنة دخل 100 جنية تاني سنة دخل 110 تالت سنة دخل 120 بس الراجل ده بيقولي انا هوزعهم كلهم فصحيح أنا مش بيضاعف فلوسي بس أنا عارف وقتها من الدليل ده إني ممكن يجيلي دخل إلى حد ما ثابت شبه دخل السندات ودي حاجه في ناس كتيره بتعتمد عليها فأنا بالنسبالي ده قرار أنا بدور عليه في الدليل
أو ممكن تكون شركة جديدة بتفتح مصنع التكلفة عليا هتبقى عالية جداً فانا دخلت أرباح من المصنع الصغير اللي كان عندي بس أنا دلوقتي نيتي إن أنا أضاعف أضعاف الإنتاج بتاعي فعشان أعمل كده أنا لازم ابني مصنع قد المصنع بتاعي 10 مرات فصحيح أنا داخلي فلوس بس الفلوس دي كلها أنا بصرفها للمصنع الجديد اللي أنا ببنيه فوقتها انا معنديش السيوله إني أوزع فأنا ممكن أدي توجيه إني فترة الـ 3 سنين الجايين انا مش هوزع اي كوبون فبالنسبالك أنت بتبقى عارف انك بتستثمر في السهم ميعتمدش عليه كدخل تاني انت بتستثمر في السهم على أساس أن انت بتزود أرباح رأس المال على اساس النمو اللي هيطلع في المستقبل
عمر: لأن انت لما بتحسب الأرباح اللي جيالك من الاسهم هي بتيجي من حاجتين بتيجي من أرتفاع القيمة السوقية بتاعة السهم يعني السهم أنا اشتريته بـ 100 وعاوزة أبيعه بـ 200 والحاجه التانية هي التوزيعات أو الكوبونات اللي بنتكلم عليها يبقى الأتنين مجموعهم هو ده العائد على الاستثمار بتاعي اللي انا حطيته أول يوم
أحمد: بالظبط
عمر: ده برده جابني لسؤال تاني هل معنى كده الشركات اللي مش بتوزع خالص يعني مثلاً زي أمازون أو تسلا أياً كان حاجات حتى بره عشان مشهوره شوية بذكرها دول شركات مبتوزعش هل معنى كده إن دي تعتبر خطر أو الناس مبتبقاش عايزة تشتري الحاجات دي ولا لأ يعني هل في نوعية من المستثمرين بيروحوا للشركات اللي مبتوزعش؟ عشان أنا بس مش عايز الناس تفهم إننا بنقول الشركات اللي بتوزع أحسن أو أوحش فاهم قصدي
أحمد: فكر فيها بنفس المبدأ اللي كنا بنتكلم فيه
شركة لسه النفقات الرأسمالية عندها عالي بس أنا متوقع إن هي في المستقبل هيجيلها طفرة سيولة رهيبة أنها تقدر ترد بس أنا بشتري معدل النمو بتاع الشركة دي فأنا استثماري مش أعتماداً على العائد أنا استثماري على أساس إن انا زيادة في سعر السوق بتاع السهم اللي أنا بشتريه واحنا متفقين في الموضوع ده أنا لما بشتري السهم وبستثمر مبشتريش السهم على سعره بتاع النهاردة أنا بشتري سهم متوقع سعره في المستقبل لأن أنا السعر بتاع النهاردة أو قيمة الشركة النهاردة أنا بالفعل عارفها ، سعر السوق موجود قدامي على الشاشة أنا بالفعل عارف إن الشركة دي السهم الواحد فيها تمنه 10 جنيه وفيها 100 سهم تبقى بـ 1000 جنيه دي قيمة الشركة النهاردة معروفه اللي أنا بستثمر على أساسه إني لما بشتري أنا بشتري للمستقبل بتاع الشركة دي أياً كان نوعه انا مستقبل الشركة دي شايف إنه عنده سيولة كافية إنه يدخلي عائد كوبونات كاش أو أسهم هل سيولة الشركة دي هتكون قليلة جداً لأنه في مرحلة صرف عالي جداً وبيستلف وبيصرف فلوس بس إنه يكبر الشركة وفي المستقبل على حجم الشركة الموجود دي هيدخله عائد أو ارباح فلكيه وإن أنا قيمة السهم بتاعي هتطلع قيمة السوق الضعف أو تلاته .. فهل الشركة هي وحشة عشان مش بتوزع أرباح؟ لأ طبعاً لأن في شركات كتيرة زي الشركات الناشئة أو الحاجات اللي لسه بتبقى بتبدأ الكلام ده كله بتاخد استثمار كبير في الأول على اساس انها في فترة ما في المستقبل بعد ما تكبر ويزيد العائد بتاعها من جميع الاستثمارات اللي هي عملتها دي بإنها هتقدر توزعلي
المستثمر عادة حاجه من اتنين يا مستني الدور ده ، يا أنا مستني إني اشتريتها والشركة أعلنت أني هصرف كذا وهبني كذا وأرباحي هتضاعف لـ 3 أو 4 مرات فأنا سعر السهم أشتريته بـ 10 جنيه لقيته انا بـ 20 جنيه أنا مش مستني السيولة اللي هتجيلي كمان 3 أو 4 سنين انا هبيعه عشان زيادة رأس المال فقدر اني ابيع السهم
عمر: هايل.. انت برده لما كنت بتتكلم على المراحل بتاعة الشركة دي انا جه في دماغي الشركات الناشئة أكيد اي شركة بتفتح النهاردة جديد في أول سنة أو سنتين معندهاش السيولة هي أصلاً لسه بتدور على فلوس عشان تحقق فكرتها أكيد هي مش هتبقى عايزة ترجع للمستثمرين فلوسهم من أول سنه أو تاني سنه وفي نفس الوقت المستثمر اللي رايح يستثمر في شركة ناشئة هو عارف إن الفلوس دي مش هترجع دلوقتي خالص فمعنى كده احنا برده روحنا لنقطه مهمه جداً إن شكل الكوبونات والتوزيعات بتبينلك النضج بتاع الشركة في أنهي حته في دورة الأعمال التجارية صح؟ أو لو شركة زي مثلاً شركات الاتصالات مثلاً اللي هي معندهاش توسع أكبر ، خدت الحصة السوق كله وبتعمل أرباح كتير ومش لاقيه حد يستثمرها في أسواق جديدة ، معندهاش توسع ، الاسواق بتاعتها بتكبر 1 أو 2 % زي الاقتصاد بتاع الدولة اللي هي فيها فمعندهاش فرص فتديها أحسن للمستثمرين صح كده؟
أحمد: بالظبط كده
عمر: هايل.. أنا برده بنعش معلوماتي الواحد برده لما بيتكلم فيها بيفهم تاني الحتت دي بشكل أفضل
أحمد: وفي حاجات كتيرة برده ممكن تأثر الشركات ملهاش يعني مثلاً لو أنا حطيت توجيه وفي مستثمرين جم قبلوني قولتلهم والله يا جماعة أنا هصرف 1 2 3 في السنة الأولانية والتانية مش هيبقى معايا فلوس وفي السنة التالتة والرابعة متوقع أرباح كذا مثلاً والأرباح دي كلها أنا هوزعها للتلت سنين لأني معنديش صرف بعد كده جه بعد أول سنة حصل أي ظروف ممكن تأثر على سيولة الشركة والكلام ده كله فأنت كمستثمر لازم تاخد موقفك هل أنا مش مستعد أستنى الأوضاع تتحسن أو أنا محتاج السيولة دلوقتي أو انا محتاج يجيلي كاش كوبون كدخل ثانوي لأن أنا دخلي مش كفاية ومحتاج دخل زيادة وقتها بتضطر تبيع السهم وتدور على سهم تاني تشتريه دي كلها ظروف بتبقى خارج نطاق الشركة حتى في وجود الدليل لما يبقى موجود مفيش حاجه زي ما بنقول قرآن كريم مفيش حاجه مؤكده فأنت لازم حتى لو انت مستثمر معتمد على الكوبون كاش أو اسهم أو سيولة معينة أو طريقة استثمار مينفعش انك تشتري حاجه لمجرد انك تنسى عنها 10 سنين ومعتمد إن الدخل ده جايلك جايلك
عمر: طيب الناس اللي بتسمعنا لو عايزة تعرف عن التوجية الطريقة بتاعتها إن احنا مثلاً نشوف الميزانيات بتاعة الشركة بيكون مذكور فيها المحادثات الجماعية وأعتقد إنها بتبقى عامة اعتقد إنه في هذا الزمن الناس ممكن تحضرة عن بعد ، ممكن تسأل السمسار في أي حاجه تانية ممكن ، هل المعلومات دي موجودة أونلاين يعني الناس ممكن تعرف ازاي؟
أحمد: هو أي شركة مدرجة لازم الأمور المالية بتاعتها تكون على جدول ربع السنة ديماً بتصدر الأرقام بتاعتها دي شروط أي سوق موجود عادة ، أقل فترة اللي هي ربع سنة وبتشوف كل ربع سنة الامور المالية الكاملة للشركة ، الميزانية العمومية مع بيان الدخل الكلام ده كله كل التفاصيل اللي انت محتاج تبص عليها فدي كلها معلومات عامة مش سر أي حاجه انت محتاج تعرفها عن الشركة عن سيولة الشركة انا عايز أعرف الناس دي معاها فلوس كام النهاردة أو على أخر الربع كان فلوسهم قد إيه ، دخلهم قد إيه ، صرفهم قد إيه ، خسارتهم قد إيه أو أرباحهم قد إيه .. كل دي بتبقى تفاصيل موجودة قدامي فأنا مثلاً لو عارف إن الشركة عامله الدليل بتاعي إن في الـ 3 سنين الجايين يا جماعة أنا هوزع 60% من الأرباح فأنا ممكن أستنى الربع الأولاني وشوف بيان الدخل أشوف أرباحه قد إيه واستنى الربع التاني لو الراجل بيقولي إنه هيوزع 60% وعدى عليا أول تلات أربع وشايف إن الراجل ده مدخل 1000 جنيه يبقى انا اعرف إن في حوالي 600 جنيه توزيع هيتوزع على الشركة كلها احسب حسبتي وأعرف انا داخلي كام تقريباً ومنها ممكن اخمن حتى لو عرفت الربع الرابع من ارقام بتاعتي بتاعة الأرباح الأولانية ومنها برده ممكن الشركة تكون مديه دليل بس الأرقام بتحكي قصة غير اللي الشركة بتقولها فأنا بالنسبالي زي ما أنت بتقول لو أنا مستثمر في شركة بيقولي والله أنا هوزع في حدود في ناس بتحدد الدليل على اساس مبلغ معين والله أنا هوزع مليار جنيه السنادي وانا لما بصيت على الميزانية العمومية بتاعتة والله الكاش بيقول 100 مليون والأرباح 100 مليون زيهم فانت هتوزع مليار جنينه منين! فانا وقتها ممكن كمستثمر أشك بقى
عمر: برده أقسام الأبحاث في شركات السمسرة هل ممكن تساعدني؟ يعني مثلاً أنا حسابي في شركة فلانية أكلم قسم الأبحاث بتاعتهم؟
أحمد: هو قسم الأبحاث عادة ككلام بيتكلم على المستثمرين الكبار يعني أنا لو أحمد أحمد روحت أدور على حد في قسم الأبحاث يعني محفظتي مش هتبقى سبب كفاية إنه يكلمني أنا شخصاً بس اي قسم أبحاث لسوق معين بيصدر ابحاث عن الشركات او الأقتصاد العام أو قطاع معين في السوق بيدي رأيه والتوقعات بتاعته للمستقبل بتاع قطاع معين أو شركة معينة فأنا لو مستثمر صغير انا هبقى في شركة سمسرة بتعمل أبحاث على الشركات دي كلها وانا كمستثمر هيبقى ليها الحق اني استخدم البحث بتاعي بس هل أنا أتكلم مع محلل دي بتبقى حاجه عادة للمؤسسات الكبيرة
عمر: بس على الأقل انا عندي مكان أقدر من التقرير أو ممكن زي ما انت قولت من الابحاث وابتدي اقرأ .. أنا بس عايز النهاردة نعرف الناس لو على طريقة الدخل إن ده نوع من انواع الدخل السلبياللي ممكن يجيلك من استثمارك في البورصة وهو الكوبونات
أحمد: مظبوط ومعظم الابحاث حتى لما بتصدر بتصدر إن الشركة عادة هل الشركة دي تستثمر فيها للنمو المستقبلي بتاعها أو الشركة للعائد فدي بتبقى حاجه مهمه جداً لأي حد مستثمر ، نوع المستثمر لو أنت مستثمر جديد أنا والله عايز دخل جانبي او بس حاجه تخلي في فلوس كل ربع أو كل سنة زيادة يبقى أنا دي انواع الشركات اللي استثمر فيها وشركات النمو مش هي اللي استثمر فيها
عمر: وموضوع التكرار ده احنا النهاردة مثلاً في 2022 السنة هتقفل هنيجي 2023 الشركة هتعلن تقولي أنا عملت ارباح في 2022 مثلاً الـ 6 دولار دول أو جنيه هيقولي أنا هديهملك مثلاً على 4 مرات يا هديهملك مره واحده كل شركة على حسب السياسة بناءاً على السيولة صح كده؟
أحمد: بالظبط كده وبيبقى ديماً في حاجات مهمه جداً لازم يبقى في تاريخ الاستحقاق يعني أنا حامل السهم لتاريخ معين هو اللي يحق له انه يجيله الكوبون ده يعني مش عشان أنا ماسك السهم بقالي سنة يعني أنا اشتري في 1 يناير 2022 بيعت الاسهم في 31 ديسمبر 2022 يعني أنا قعدت في الشركة دي مالك فيها الشركة كلها ده مش معناه إني يحقلي الكوبون انا ليا تاريخ استحقاق يبقى لازم حامل السهم لتاريخه هو اللي يدخله كوبون أنا لو بعت قبلها ميحقليش كوبون فبيبقى في تاريخين مهمين جداً تاريخ الاستحقاق وتاريخ الدفع أنت اول ما تبقى مالك السهم في تاريخ الاستحقاق تاني يوم انت ممكن تبيعه حلالك هيدخل الكوبون امتى بقى الكوبون بيدخلك برده أي إعلان لشركة إن انا هدفع كوبون يا إما كاش أو أسهم بيعلن تاريخ الاستحقاق وتاريخ الدفع في مرحلة ما مش لازم في تاريخه بس في مرحلة قريبة من الإعلان لازم يحقق التاريخين دول
عمر: هايل عشان برده الناس متبقاش حاسه زي ما انت قولت ممكن تقع في الغلطة دي السهم قعد معاها سنة وبعدين يجي يدور على الارباح ميقدرش فهو يوم ما الشركة بتعلن عن الكوبون النهائي بتاعها بتديك التاريخين دول .. هايل
Translation of some words and terms:
Guidance توجيه / دليل
Capex النفقات الرأسمالية
Direct مباشر
Collect يجمع
On my Behalf نيابة عني
Market cap الحد الأقصى للسوق
Management إدارة
Mature ناضجة
Bonus share حصة المكافأة
conference call مكالمة مؤتمرية
Incentive حافز
Capital gain مكاسب رأس المال
Liquidity سيولة
Capital Appreciation زيادة رأس المال
Business Cycle دورة الأعمال التجارية
Remote عن بعد
Financial المالية
Balance sheet الميزانية العمومية
Income Statementبيان الدخل
Public information معلومات عامة
Research notes المذكرات البحثية
Sector قطاع
At least على الأقل
Passive income دخل سلبي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #توزيعات_الأرباح