45. من هو المستثمر الأفضل .. الرجل أم المرأة؟
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
من المتعارف عليه في حياتنا إن في مجالات معينة بتشد الرجال أكتر من السيدات والعكس! وبما إن كلامنا عن المجال المالي والإستثمار ياترى كمستثمر مين أفضل الرجل ولا المرأه؟ ومين قدر على المدى الطويل يحقق عوائد أعلى؟
حلقة النهاردة بتناقش موضوع مهم جداً ألا وهو التحيزات السلوكية في الإستثمار.. وازاي التحيزات دي ممكن تأثر على القرارات الإستثمارية بالنسبة للرجل والمرأة؟
(Fidelity Investments) تفاصيل كتيرة بنتكلم عليها بناءاً على دراسات إحصائية قام بها كلاً من
(moneycrasher) وموقع تثقيف مالي اسمه
: عن
الأداء الإستثماري بين السيدات والرجال؟ -
نسب الإدخار بين السيدات والرجال؟ -
المميزات بين السيدات والرجال؟ -
فئات الأصول المفضلة للرجال والسيدات؟ -
العوائد الإستثمارية بين السيدات والرجال؟ -
سيكولوجية الرجال والسيدات في أساليب الإستثمار المختلفة؟ -
وفي النهاية عشان تبقى مستثمر كويس لازم تبقى فاهم نفسك وعندك وعي بنقاط ضعفك ونقاط قوتك وهو ده الهدف من حلقة النهاردة الموضوع مش ماتش هنشوف مين كسبان على قد ما ازاي كمستثمر (رجل أو امرأة) تستغل نقاط قوتك وتتجنب نقاط ضعفك عشان توصل لأعلى عوائد إستثمارية
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
حلقة النهاردة بتجاوب على سؤال : مين كمستثمر أفضل الرجل ولا المرأه؟
وهنا أنا مش بسأل السؤال عشان أقارن ما بين مجموعة من الناس ضد بعض أو اني اشوف مين كسبان والكلام ده ولكن هو بيسلط الضوء على موضوع مهم بالنسبالي إن في تحيزات معينة للراجل وفي تحيزات معينة للمرأه ومن خلال الحلقة دي هنفهم ازاي التحيزات دي ممكن تأثر على القرارات الإستثمارية بالنسبة للرجل وازاي التحيزات دي بتأثرعلى القرارت الإستثمارية بالنسبة للمرأه وبالمرة كده نشوف مين كسبان مين عرف يعمل عوائد على المدى الطويل وعملها ليه وتفاصيل تانية كتيرة من خلال الحلقة دي
رد الفعل الطبيعي لسؤال زي ده إن أنت هتقولي إن غالباً الرجل الأداء الإستثماري بتاعه أفضل ، ولكن في إحصائيات ودراسات أتعملت كتير النهاردة هنذكر منهم واحدة أو أتنين.. في مجموعة اسمها فيديليتي احنا اتكلمنا قبل كده على البحث بتاعهم
فيديليتي هو بنك إستثمار عنده شركات إدارة أصول ، شركات سمسرة .. في المجال المالي يعني ، فعنده إمكانية الوصول لعمليات التداول بتاعة المستثمرين بتوعه ، وعمل إحصائيات في فترات متباعدة في الزمن على أداء وسلوك المستثمرين بتوعه واحنا النهاردة بناخد دراسة معموله تقريباً سنة 2016 على 8 مليون عميل من فيديليتي
فيديليتي عنده المستثمرين الأفراد هو مركز عليهم فعشان كده عدد المستثمرين كبير عنده ، وهو عمل الإحصائية بتاعته على الأداء ما بين الرجل والمرأه في الإستثمار والعوائد بتاعتهم ولقى إن العوائد بتاعة السيدات أعلى من العوائد بتاعة الرجال وده لأسباب هنتكلم عليها واحد واحده دلوقتي ، والعوائد دي تقريباً على حسب الدراسة 0.4% يعني تقريباً أقل من نص % ممكن تقول إن الرقم ده قليل أو ده حاجه بسيطة يعني ولكن الفرق ده في العوائد السنوية لما ناخد الكلام ده على مدار 10 / 20 / 30 سنة هنلاقي إن الأداء فيه فجوة كبيرة ما بين السيدات والرجال
لما سألوا السيدات في الدراسة دي تفتكروا أنتو أدائكوا أفضل ولا أداء الرجال؟
لقوا إن فقط 9% من السيدات اللي جاوبت على السؤال ده هما اللي فاكرين إن أدائهم أفضل من الرجاله وده بيعكس عدم الثقة كسيدة إني أقدر أتفوق على الرجل
وده كان على كل مستويات التعليم ، كل مستويات الدخل يعني النتيجة دي طالعة في كل الناس الناجحة جداً في السيدات أياً كان في هنا شك في القابلية بتاعة السيدة أنها تبقى مستثمر كويس
ولكن لما سألوا السؤال ده للرجال لقوا الرجال بالعكس أكيد احنا أحسن أو أكيد أدائنا أحسن وده بيعكس هنا الثقة المفرطة الزائدة عند الرجل في الإستثمار هو ديماً شايف نفسه أحسن كونه ياخد قرارات إستثمارية وزي ما قولنا احنا هنمشي واحده واحده دلوقتي ونشوف الثقة المفرطة جاية منين والثقة القليلة جاية منين برده
برده حاجه لقوها إن السيدات بتحوش أكتر من الرجال في نفس الدراسة لقوا إن 9% من دخل السيدة بتحوشه وبتعيد إستثمارة في مقابل 8.4% للرجال ، نسب التحويش هنا أفضل للسيدات فمعنى كده إيه؟ أنا بحوش نسبة أكبر من دخلي وبعرف أعمل عائد أعلى من عائد الراجل فعلى المدى الطويل أدائي غالباً أفضل
إيه بقى اللي بيميز السيدات ، إيه اللي مخليهم يعملوا الكلام ده؟
لقوا إنهم بيعرفوا يعملوا حاجه اسمها تخطيط استراتيجي.. السيدات بتحدد الأهداف بتاعتها أفضل من الرجل ، السيدات بطبيعتهم بيفكروا لقدام ، بيفكروا في الهدف على المدى الطويل ، بيفكروا للأسرة بالكامل ممكن تاخد قرار يفيد المجموعة فبتحط أهداف أطول دي أول حاجه لقوها ، تاني حاجه لقوها إنهم بيبقوا متحفظين أكتر بيحاولوا ياخدوا مخاطرة أقل ، الرجل بياخد مخاطرة أعلى من السيدة
تالت نقطة لقوها إنهم صبورين أكتر من الراجل ، ودي نقطة مهمه جداً جداً كمستثمر أنت النهاردة لما بتحط خطة وتلتزم بيها لازم يكون عندك صبر ، صبر لتحقيق النتايج لأنك ممكن تكون بتبتدي الإستثمار بتاعك في فترة مش شايف فيها نتايج أوي بقالي مثلاً 6 شهور أو سنة بستثمر ومش شايف نتايج الحاجه اللي أنا بشتريها مبتطلعش ، أو العوائد بتاعتي مش جايه ولكن لما بنحط الخطة بتاعتنا على المدى الطويل المفروض يبقى معاها في التنفيذ الصبر ، الصبر على تحقيق النتايج والعوائد هتشوفها مع الوقت فلقوا السيدات هنا هما أحسن من الرجال في الحتة دي لقوا إن هما لما بيحصل هبوط شديد في الأسواق مبيغيروش أفكارهم زي الرجال ، الرجال ممكن يحصله فزع أو يحاول يعمل تجارة أو يحول شكل محفظته في أوقات غلط وأتكلمنا قبل كده في كذا حلقة إن أنت لو بتحاول تعمل توقيت للسوق مش ديماً بيبقى في مصلحتك فالصبر هنا فاد السيدات ومخليهم عندهم ميزة شوية عن الرجال
النقطة اللي بعديها أو النقطة الرابعة اللي لقوها في الدراسة دي إن السيدات بيبقوا عايزين أو بيحاولوا يتعلموا ويدوروا على مصادر تعليمية إنهم يتعلموا الحياة المالية بتاعتهم أو يروحوا يسجلوا في كورسات أو يدوروا على مصادر ومراجع يقروا منها فلقوا إن السيدات عندهم القابلية دي أكتر من الرجال
ودي حاجه أنا شخصياً حسيتها من خلال تجربة البودكاست ده ، الصفحة بتاعتنا على السوشيال ميديا بيديك توزيع كعدد قد إيه رجال وقد إيه نساء وأعمارهم وهكذا ، وأنا فوجئت بالنسب بتاعتي بالنسبة لصفحات تانية أو المتعارف عليه بالنسبة للصفحات إنستجرام عموماً إن في مجالات معينة بتشد رجال أكتر أو نساء أكتر ، أنا كنت متوقع المجال المالي ممكن يكون المتابعين بتوعي أكتر من الرجالة ولكني فوجئت إن النسبة تقريباً 50 / 50 ، وبرده لما بيجيلي أسئلة بيجيلي أسئلة كتير جداً من السيدات فأنا النقطة دي أنا شخصياً لامسها اللي هو بدور على مراجع او مصادر أو اسئلة لتطوير الحياة المالية فدي نقطة أنا بجد شايفها جداً
دول الأربع نقط الموجودين في الدراسة بتاعة فيديليتي وبتوضح ليه في ميزة للسيدات ، النوع التاني عندهم خطة استراتيجية ، بياخدوا مخاطرة أقل وعندهم صبر وفي نفس الوقت بيدوروا على المصادر التعليمية
money crashers في دراسة تانية لموقع تثقيف مالي اسمه
عمل برده دراسة حوالين سيكولوجية الرجل والمرأه في أساليب الإستثمار المختلفة ، لقوا إن ضعف الرجال بالنسبة للسيدات عندهم قناعة إن استثماراتهم هتعمل أدائها أعلى من أداء السوق يعني هنا برده نفس النقطة بتاعة الثقة المفرطة الموجودة عند الرجال اللي هو أكيد أنا محفظتي هتبقى أحسن من السوق وأكيد أدائي هيبقى أحسن من السوق وأكيد أنا هعرف أعمل عوائد كويسة فدي نقطة الثقة المفرطة مهم جداً اننا ناخد بالنا منها لأنها مكررة في الدراستين
لقوا كمان إن الرجال عندهم قابلية أكتر إنهم يبقوا هما المستثمرين بتوع المحفظة بتاعتهم ، لقوا إن 60% من الرجال عايزين يديروا فلوسهم بنفسهم ولكن لقوا الأغلبية في السيدات بيحولوا يستخدموا المستشار المالي أو بيحاولوا يستخدموا مؤسسة أو شركة أو شخص يساعدهم في تكوين المحفظة بتاعتهم ودي من وجهة نظري على المدى الطويل مفيدة جداً لما أنت بيبقى عندك مستشار مالي بتاعك تقدر تسأله أنا ازاي أكون محفظتي دي بتساعدك تحقق إنتاج أحسن على المدى الطويل
لقوا إن الرجال بيحبوا الأسهم والسيدات بيستريحوا أكتر في العقار فدي من ناحية فئة الأصول إيه فئة الأصول اللي الرجال بيحبوها وبيحبوا يستثمروا فيها أو السيدات بيستريحوا أكتر للعقار
لقوا كمان إن 75% من الرجال عندهم أسهم في البورصة ولكن 50% فقط من السيدات عندهم أسهم في البورصة ونرجع للنقطة بتاعة الدراسة الأولانية برده إن السيدات متحفظين ، ودي من وجهة نظري حاجه المفروض هتتغير مع الوقت يعني السيدات نسبهم في إمتلاك الأسهم مع الوقت هتتغير لأعلى
آخر نقطة لقوها في الدراسة دي إن السيدات بتهتم جداً جداً إنها تستثمر في الشركات أو صناديق الإستثمار اللي عندها أهداف محدده عندهم قناعة بيه ، زي مثلاً حاجات صديقة للبيئة ، أو فكرة معينة مثلاً زي شركات الأسمنت أو البترول اللي هي تقيلة جداً بيبعدوا عنها فلقوا إن السيدات عندهم أهداف أكتر في الإستثار من الرجال هو مش فارقة معاه أوي هو بيستثمر وخلاص لقوا السيدات مهتمه جداً بالحتة دي
احنا ليه بنحاول نرفع الوعي بتاع الحتة دي؟
لأن أنا كمستثمر محتاج أعرف المزايا والعيوب يعني كمثال مثلاً واضح احنا اتكلمنا عليه كرجال أنت عندك الثقة المفرطة فدي من الحاجات اللي أنا بحسها وبشوفها في نفسي ساعات أو في حد تاني إننا ديماً بنبقى حاسين إننا مسيطرين ، مسيطر على المحفظة بتاعتك أو أنت مش قلقان ولكن في طبيعة الأمر ممكن الثقة الزائدة اللي موجودة عندك في الإستثمار بتاعك تكون بتأذيك دي من الحاجات اللي أنا شايفها ممكن تتغير عند الرجال
عند السيدات العكس الإحصائيات بتقول إن فرص إنك تعملي أداء على المدى الطويل أفضل من الرجال فليه انتو قلقانين أو خايفة إنك تستثمري بالعكس إنتي عندك الإحصائيات في مصلحتك فاللي مبيتستثمرش من السيدات المفروض إنه يبتدي يستثمر
من الحاجات المميزة مثلاً اللي لقيناها عند الرجال إن محفظة الأسهم عند الرجال أعلى من محفظة الأسهم عند السيدات وأنا من وجة نظري الإستثمار في الأسهم على المدى الطويل – وتاني هنا الإستثمار في الأسهم بمعنى محفظة متنوعة عالمية مش لازم تبقى في بلد واحدة او مش لازم تبقى في سوق واحد أو في شركة واحدة أنا بتكلم على المحفظة المتنوعة العالمية اللي مش معتمدة على بلد واحدة أو على شركة واحدة كرجال إنت عندك محفظة في الأسواق دي فأنت على المدى الطويل العوائد بتاعتك ممكن تكون كويسة ، السيدات أقل فبرده السيدات تبتدي تعلي الإستثمارات بتاعتها لأنها على المدى الطويل العوائد بتاعتها تعتبر عوائد إيجابية فمعنى كده إن التحفظ الزائد عن السيدات لازم مع الوقت يبتدي يقل
برده الحاجات اللي احنا شوفناها إن نسب التحويش عند الرجال أقل من السيدات فأنا هنا المفروض أنصح الاتنين إنهم يزيدوا ، سواء السيدات هي فعلياً عالية فأتمنى انها تعلى أكتر مينفعش نعمل أي إستثمار من غير ما ندخر النسب اللي محطوطه تقريباً 8 ، 9 %.. أنا أتمنى إن الناس تبقى عند نسب أعلى من كده لأن ده بيساعدك وبيسهلك بشكل رهيب إن أنت توصل للحرية المالية بتاعتك فهنا الرجال أقل من السيدات ننصحهم إنهم يطلعوا وعايز السيدات كمان يطلعوا والناس تبتدي تحوش بشكل أكبر
وملخص الموضوع بشكل بسيط إن أنت عشان تبقى مستثمر كويس لازم تبقى فاهم نفسك
الوعي.. إني اعرف نفسي أعرف نقط ضعفي ، أعرف نقط القوة بتاعتي وهو ده هدف الحلقة إن أنا اسلط الضوء على الحتة دي عشان لو أنا راجل أخد المميزات بتاعتي وأحاول أبعد عن العيوب بتاعتي وأشوف عند المرأه كانت بتعمل إيه كويس أحاول أزوده عندي الموضوع زي ما قولت في أول الحلقة هو مش ماتش هنشوف مين كسبان على قد ما هو أنا عايز أبقى في أعلى ناحية سواء رجال أو سيدات عايز أبقى من أكتر الناس اللي بتحقق عوائد فأنا النهاردة معاكوا أتعلمت إن الثقة المفرطة بتاعتي لازم تقل ، لازم متحركش بشكل كبير وسريع مغيرش قراراتي أتعلم من السيدات ازاي يبقى عندك صبر ، ازاي يبقى عندك تركيز على أهداف طويلة المدى ، ازاي يبقى عندك أهداف إستثمارية متحاولش تبعد عنها
والسيدات في نفس الوقت لو بتسمع الحلقة دي ووصلت معايا للحتة دي لازم تتعلم إنها تثق في نفسها أكتر ، تبتدي رحلتها في الإستثمار متقلقش وتحاول تاخد مخاطرة أعلى لأنهم بطبيعتهم بياخدوا مخاطرة أقل والأقل ده ممكن يقلل العوائد بتاعتك على المدى الطويل فمتقلقش والناحيتين المفروض يستثمروا ، الناحيتين المفروض يحوشوا ودي كده نظرة سريعة على العوائد بتاعة الإستثمار ما بين الرجل والمرأه وأتمنى تكون الحلقة دي عجبتكوا وسلطت الضوء على الحاجات اللي احنا عايزين نتكلم فيها واشكركوا جداً جداً وأشوفكوا إن شاء الله الإسبوع الجاي
Translation of some words and terms:
Gender جنس
Returns عوائد
Long Term المدى الطويل
Reaction رد فعل
Research بحث
Access إمكانية الوصول
Behavior سلوك
Retail Investors مستثمرين الأفراد / صغار المستثمرين
Gap فجوة
Outperform يتفوق على
Professional Achievement الإنجاز المهني
Doubt شك
Overconfidence الثقة المفرطة
Strategic Planning تخطيط استراتيجي
Conservative محافظ
Risk مخاطرة
Turbulence اضطراب
Panic فزع
Trading تجارة
Timing توقيت
Edge ميزة
Self-education التعليم الذاتي
Sign up اشتراك
Breakdown توزيع
Investment Styles أساليب الإستثمار
Manage يدير
Financial Advisor المستشار المالي
Awareness وعي
Already بالفعل
Category فئة
focus التركيز
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #من_الأفضل