41. ما يسأله المستمعون - الجزء الرابع
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
في الحلقة اللي فاتت معرفناش نغطي كل الاسئلة فقررنا نكسر النظام بتاعنا النهاردة ونعمل حلقة تانية على طول نرد فيها على باقي الاسئلة.. نتمنى إن شاء الله تستمتعوا بالحلقة وتلاقوا ردود على اسئلة بتفكروا فيها او حل لمشاكل بتمروا بيها وديماً أبعتولنا احنا بنجمع كل الاسئلة اللي بتوصلنا وبنرد عليها في حلقات ما يسأله المستمعون
: اسئلة الحلقة
00:45 المقدمة
01:56 ازاي استثمر في الدهب وأعرف البورصة ماشية ازاي؟
05:45 أماكن موثوقة للتداول والاستثمار؟
08:10 متى ستحدث الأزمة المالية القادمة؟
12:36 ازاي استثمر في الأسهم والسندات؟
13:49 المعاملات المالية بدون شبهات ربا؟
15:50 ازاي استثمر المبالغ الصغيرة ؟
18:22 لو أنا طالب وبشتغل في الأجازة أقدر ازاي ابدأ استثمر مرتبي؟
19:50 خطوات أعملها تجاه مستقبلي لو أنا لسه في الجامعة؟
20:43 الخاتمة
قريب إن شاء الله هنعمل جلسات تفاعلية على تويتر علشان لو عندكم اسئلة نتكلم فيها والحلو في الموضوع إن الاسئلة هتفتح اسئلة تانية وهيبقى نقاش أكتر من أنه سؤال وجواب فتابعونا على تويتر هتلاقوا الروابط بتاعتنا كلها موجودة تحت في الصفحة
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
المقدمة
اهلاً بيكوا في حلقة جديدة من بودكاست كلام ينور
الحلقة اللي فاتت بصراحة كان عندنا اسئلة كتير جداً جداً في الحلقة رقم 40 ومعرفناش نغطي كل الاسئلة الموجودة فغصب عننا كسرنا النظام بتاعنا وعملنا حلقة تابعه للحلقة 40 بقت الحلقة 41 اللي هي حلقة النهاردة
برده بنحاول نغطي فيها اسئلة وشوفنا كلامكوا إن الناس ممكن تبقى عايزة أكتر اننا نغطي الاسئلة بتاعتكوا فيارب تستمتعوا بالحلقة دي برده وتبعتولنا ديماً احنا على جنب كده بنجمع الاسئلة لو حاجه مغطينهاش بنحاول نغطيها في حلقات قدام
برده كنت عايز أقول للناس إننا على صفحتنا في تويتر يعني قريب أنا بفكر نعمل جلسات اسئلة وأجوبة مباشرة ، نعمل جلسة زي اللي بنعملها على البودكاست دي بس جلسة تفاعلية علشان الناس لو عندها اسئلة مباشرة نتكلم فيها والميزة في الطريقة دي إن الاسئلة تفتح اسئلة ويبقى نقاش أكتر من اني بجاوب على الاسئلة بتاعتكم
01:56
هبتدي في أول سؤال بيقول ازاي استثمر في الدهب وأعرف البورصة ماشية ازاي؟
أكتر سؤال مكرر الناس عايزة تستثمر في البورصة.. طيب أنا النهاردة لما باجي أعامل البورصة بعاملها كأي أداة استثمارية زي أي حاجه تانية ، زيها زي البيت زي فلوسك اللي في البنك هي بالنسبالي أنا كعمر يعني نوع من أنواع الاستثمار مبتحمسنيش اللي هو الله أنا عايز استثمر في البورصة وأبقى فاهم بقى وجبت التايهة كل مرة وأنا بشتري وأنا ببيع لأ أنا بالنسبالي البورصة مش كده
البورصة هي أداة من أدوات الاستثمار العادية مفهاش أي نوع من أنواع العاطفة ، وأنت بتستثمر المفروض تتبع نظام معين واحنا هنتكلم على البورصة في مجموعة حلقات مخصوصة عن البورصة وهنشرحها بشكل تفصيلي ولكن الناس اللي معندهاش وقت ومعندهاش فرصة أنها تركز هي بتعمل إيه إجابتي السريعة أنت ممكن تعمل الاستثمار السلبي اللي هو انت بتروح تشتري صندوق استثمار بيتبع مؤشر معين ، المؤشر ده احنا ضامنين إن الأداء بتاعه على مدار مثلاً 20 / 30 سنة هيبقى أداء إيجابي وأنا كواحد مش فاضي أشتغل في البورصة أو مش فاضي إني اركز أو مش عايز أضيع وقت ليه لأن أنا ممكن أوقف حياتي كلها بحاول أعم فلوس من البورصة ولكن لو أنا مثلاً بشتغل دكتور وبشتغل الصبح في مستشفى أو عيادة أياً كان وعندي استثمارات حاطتها في البورصة فالاستثمارات هنا هي مش بتاخد من وقتي هي بتاخد وقت قليل جداً في الاستثمار وأنا بقدر أعمل فلوسي الصبح من شغلتي الأساسية واستثمر في حاجه تانية
فعشان مضيعش وقت أنا هعمل إيه؟ يأما هروح أدي فلوسي لصندوق استثمار لواحد محترف ياخد القرارات بالنيابة عني ، يأما هروح أشتري صندوق مؤشرات صندوق المؤشرات ده هو عبارة عن صندوق استثمار بيشتري أكبر 30 شركة في بلد معينه ، خلاص أنا ضمنت إن فلوسي ديماً مستثمره في أكبر 30 شركة في الإقتصاد بتاع الدولة الفلانية
طب لو في شركة فلست أو شركة وحشه فهي هتقع من الـ 30 شركة وفي شركة تانية هتخش مكانها وهفضل برده بستثمر فلوسي في 30 شركة ، فالنظام ده مميزاته اننا مفكرش ، مضيعش وقتي واستثمر وعلى المدى الطويل أعمل فلوس وأنا بنصح كل الناس إن هي لغير الخبير أو اللي مش عايز يضيع وقته وأنا أنصح كل الناس اصلاً تعمل كده بدل ما تحاول تفهم الدنيا لأن الدنيا مش سهله وعلى المدى الطويل من الصعب جداً تكون مستثمر شاطر وتعرف تكسب أكتر من السوق فأنصحك تشتري صندوق استثمار أو صندوق مؤشرات على حسب الدولة اللي أنت فيها وعلى حسب البلد
04:53
نفس الكلام على الدهب
لو حضرتك عايز تحط جزء من محفظتك في الدهب عندك نوعين من الاستثمار في الدهب هتروح تشتري الدهب كسبايك أو حاجه مفهاش شغل كتير عشان متبقاش بتخسر على الدهب نفسها فأنت بتشتري المعدن الثمين وتخزنه يأما بتروح برده لصندوق استثمار بيستثمر في الدهب بتقوله حضرتك أنا عايز أحط 1000$ ، 1000 جنية أياً كان الرقم اللي أنت عايز تحطه وهو بيستثمره بالنيابة عنك في سبايك دهب وبنلاقي صناديق مؤشرات برده موجودة على بورصات كتيرة في العالم هي شغلتها فقط أنك تستثمر في الدهب فلو لقينا الدهب طالع 10% مثلاً السنادي بنشوف إن الصندوق بيحاول يطلع نفس الـ 10% وبيديك العائد على الاستثمار بالطريقة دي
05:45
سؤال بيقول أماكن موثوق بها للتداول ونعمل استثمار من خلالها؟
طيب أنا سريعاً كده ودي برده ممكن ناخد حلقة نتكلم عليها بالتفصيل أكتر بس سريعاً يعني هنا أنا نوعية الشركات اللي أتكلمنا عليها هما إيه يا إما سمسرة يا إما شركة إدارة أصول
أولاً عشان أعرف هل هي شركة كويسة ولا لأ لازم أعرف هي مقننه في أنهي دولة ، مين اللي مقننها ، مين الجهة الرقابية اللي بتراقب عليها ، وهي مثلاً بقالها قد إيه في السوق وكل الحاجات الطبيعية اللي أنت حتى لو هتشتري موبايل هتسأل على الموضوع أنا عارف دي شركة آبل بقالها كام سنة عندها تليفونات سمعت عنها كده.. بتعمل البحث الطبيعي اللي هو مين مرخصلك ، في أنهي دولة ، هل الشركة دي موجودة نفسها على البورصة ولا لأ دي بالنسبالي حاجه كبيرة جداً لو أنا شركة السمسرة بتاعتي هي اصلاً شركة متداولة يعني إيه متداولة يعني هي نفسها طرحه أسهم لمساهمين ونازله على بورصة معينة يعني مثلاً لو روحنا في أمريكا تشارلز شواب ، انتراكتيف بروكرز أنا مش بنصح بأي حاجه أياً كان اسم الشركة هنلاقي إن الشركات دي اصلاً موجودة على البورصة أنت تقدر تشتري فيها ، ولكن أنا بفتح حساب فيها ليه لأني أقدر أتابع اخبارها عامة أقدر أشوف ميزانيات الشركة بتاعة السمسرة دي أو شركة إدارة الأصول دي بشكل سهل أنا اقدر اخش على جوجل كده واقرأ الأخبار كلها عن الشركة دي
فدي بالنسبالي بتريحني عن شركة مش مقيده أو معرفش مين الملاك بتوعها أو معرفش حجم الميزانية بتاعتها عاملة ازاي
طب هتقولي هي الشركات اللي على البورصة عمرها ما بتفلس؟ لأ طبعاً في شركات بيفلسوا ، تبقى شركة كبيرة واسم كبير جداً في الاستثمار وتفلس ، يحصلها ازمه عالميه ، أو حاجه تخبطها أو مشاكل داخليه وممكن تفلس بس لما هي تبقى شركة مدرجة أنا هسمع أخبارها ، الشركات المدرجة عندهم درجة أعلى من الإفصاح عن الشركات الغير مقيده فبالنسبالي أفضل أفتح حساباتي في الحاجات دي
08:10
في سؤال جميل برده بيقول متى ستكون الأزمة المالية القادمة؟
الإجابة بمنتهى البساطة أنا معنديش أي فكرة ، يعني أنا لو عارف الأزمة المالية إيه أنا هبقى أغنى واحد في البلد اللي عايش فيها مثلاً أنا معنديش فكرة ، أنا مقدرش أتوقع لأن العوامل اللي بتسبب الأزمات المالية هي عوامل معقدة جداً يعني ممكن نقول أنا مش ساعة ما أشتغلت مثلاً شوفت 4 أو 5 أزمات كبار في دول معينه أو في موقف معين والكلام ده كله ، لكن قبليها أنا مبتوقعش اللي هو على فكرة كمان شهرين الساعة 5 بعد الضهر هيحصل أزمة مالية في الدولة الفلانية مستحيل وأي حد هيقنعك أنه عارف فهو معندوش أي فكرة ليه لأنه قبل ما يطلع صح مرة هيبقى طلع غلط 16 مرة قبليها لأنه هيفضل في اللعبة بتاعة توقع الأزمات المالية
أنا بقول كده ليه؟ لأنه في جميع الحالات في حياتي أنا مغيرش طريقتي في الاستثمار أنا ابديت حياتي وشوفت أزمة 2008 اللي هي أكبر أزمة في العالم بس بعديها بـ 3 / 4 سنين حصل تعويض لكل الناس بتاعة الأزمة المالية ودي كانت أكبر أزمة عالمية جت في الـ 100 سنة اللي فاتوا وأتعمل عليها أفلام وإستهلاك في الميديا كبير والكلام ده كله
طيب في 2015 على ما أتذكر كان في أزمة كبيرة في أسعار البترول ، البترول تقريباً كان بـ 120$ نزل لحد 25 أو 26$ ودي تعتبر في إقتصاديات معينة بتقفل الإقتصاد بالكامل ولكن شوفنا إن احنا النهاردة مثلاً في 2022 البترول تقريباً قرب الـ 90$
أنا كل اللي عايز أقوله إيه إن حتى لو عرفت إن في أزمة مالية مش هتغير فكرتي عن طريقة الاستثمار ليه لأن أنا بستثمر بإطار زمني 20 / 30 سنة مش بفكر إن في النص هيبقى في أزمات هتوقفني المحفظة بتاعتي لازم تبقى متنوعة ما بين فئات الأصول عشان تقدر تستحمل الخبطات دي ما هي الأزمة المالية عبارة عن إيه؟ عبارة عن خبطه للمحفظة بتاعتي أو حاجه هتنزل جامد ، لو أنا منوع استثماراتي مش لازم تكون في بلد واحده ، مش لازم تكون فئة أصول واحده مع الوقت وبعد 10 ، 15 سنة أنت أصلاً مش هتحس أو مش هتفتكر إن كانت في أزمة وان احنا كنا خايفين والدنيا هتبوظ وكده
طيب مين أكتر واحد بيضر بقى في الأزمة؟ يعني في ناس كل أزمة بيتبهدلوا وبنسمع بقى جاله القلب وراح المستشفى واللي نط من فوق السور القصص دي دول الناس اللي بيبقى عندهم تركز في قلب الأزمة نفسها يعني ده دخل قلب المشكلة ، عنده أسهم في السوق الفلاني أو في الشركة الفلانية بنسبة كبيرة جداً من محفظته والمحفظة دي راحة لصفر.. يبقى هنا درجة المخاطرة بتاعتي كانت غلط مش المشكلة إن كانت في أزمة وده مفهوم مهم جداً لازم الناس تبقى فهماه إن مش مشكلة ان يحصل أزمات ما أنا نفسي في حياتي العادية بعيداً عن الاستثمار مانا ساعات بيحصلي أزمات وبتطلع من الأزمات وتعديها وتنساها ومش بتفتكرها اصلاً هي هي نفس الكلام في الاستثمار المشكلة الوحيدة لما أنا ابقى 100% في حاجه معينه وهنا مش بكلمكوا بس في سهم أنا بكلمكوا في فئة أصول واحده إن أنا متركز في بيوت في أمريكا في 2008 كل محفظتي وكل حياتي في بيوت في أمريكا ومستلف عليها 10 مرات وفجأة محدش عايز يشتري بيوت ده اللي هيتبهدل فبما إن حضرتك المفروض عايز تعدي أي أزمة ومتفكرش اصلاً ولا تقرا الجرنال ولا تقول في إيه ده بيفلس وكده هتعمل إيه؟ هتعمل محفظة متنوعة من فئات أصول مختلفة ده حلي اني ابطل أتوقع الأزمات العالمية
12:36
سؤال تاني بيقول ازاي استثمر في الأسهم والسندات؟
رجوعاً برده للسؤال اللي أتكلمنا عليه من شوية لو حضرتك معندكش الوقت ، وأنا انصح حتى لو عندك الوقت متحاولش تعملها ، يعني أنا انصح إن أنت تستثمر بأسلوب سلبي مضيعش وقتك بتحاول تختار أسهم أشتري مجموعة من الأسهم طيب هشتريها فين؟ هشتريها يا من خلال شركة سمسرة يا شركة إدارة أصول دول الجهتين المرخصين في أي دولة إن أنت تستثمر فيهم فلوسك ، ممكن إدارة الأصول دي تكون موجودة عندك في البنك ، ممكن تبقى شركة قائمة بذاتها ، أو ممكن تبقى مع مستشار مالي ياخدك من أيدك كده يقولك روح للشركة الفلانية ، وشركة السمسرة حضرتك بتروح عندك نوعين من شركات السمسرة عندك النوع القديم اللي هو بتكلمه في التليفون تقوله أنا عايز أشتري وأبيع ، أو عندك السماسرة الأونلاين بتفتح كل حاجه أونلاين وبتعمل كل حاجه أونلاين.. فالمكان هو شركات الأصول ، الحاجه هي الأسهم والسندات
13:49
في سؤال بيقول المعاملات المالية بدون شبهات ربا؟
طيب انا مقدرش أفتي هل هي ربا مش ربا أو أقول رأيي في الحاجه دي ده مش مجال أختصاصي ولكن في عالم اسمه الإقتصاد الإسلامي أو المنتجات الإسلامية ، المنتجات الإسلامية دي هي بتعدي على كل فئات الأصول اللي احنا أتكلمنا عليها في الحلقة بتاعة فئات الأصول ، بتعدي على كل أدوات الاستثمار المتاحة للأفراد وبتعمل منها إصدار إسلامي
يعني إيه إصدار إسلامي يعني العقود المكتوبة بتاعة صندوق الاستثمار نفسه تابع للشريعة الإسلامية يعني هو بيستثمر في الأسهم في مختلف القطاعات طبعاً في حاجات مبتعملش حاجه مخالفه للشريعة أو مبتاخدش فوايد بنسبة كبيرة من الكاش اللي هي حطاه
بعيداً عن كل وجع الدماغ ده لو حاجه محطوط عليها الختم اللي بيقول إن ده وفق للشريعة الإسلامية أعرف إن مجلس إدارة الصندوق ده عمل مجهود إنه يوفرلك سلعة تقدر تستثمر فيها من غير ما تعدي أي قانون من قوانين الشريعة وهنلاقي ده في كل حاجه يعني هما عملوا من كل حاجه الإصدار الإسلامي.. هل في فرق كبير؟ آه في فرق في اللغة اللي مكتوب بيها كل العقود وكل المعاملات الموجودة جوه المنتجات دي فدي طريقة معينه لو أنت حابب تروح تستثمر وفق الشريعة تقدر تدور على المنتجات دي هنلاقيها موجودة في بنوك كتير وهنلاقي في شركات استثمار بتقدمها للناس بتاعتها
15:50
سؤال برده بيتكرر كتير لو أنا عندي مبالغ صغيرة ازاي استثمرها؟
لو رجعنا برده للحلقات القديمة بتاعة فئات الأًصول هنلاقي إن مش كل حاجه بتبقى عايزة مبالغ كبيرة أو حلقة المفاهيم المغلوطة عن الاستثمار مش كل حاجه بتحتاج مبالغ كبيرة عشان تبتدي بمعنى إن أنا ممكن ابتدي حياتي مستثمرش أصلاً بس أنا بحوش وابتدي أخش في حاجه اسمها الجمعيات حاجه متعارف عليها جداً في الوطن العربي ، اللي هو أنا بحط حاجه كل شهر وباخد المبلغ ده في الأخر مثلاً بخش جمعية سنتين بدفع كل شهر 1000 فواحد هيجي يقبضني بعد سنة مثلاً 24 ألف هنا دي مبالغ صغيرة ممكن 1000 ، 500 ، 300 الرقم اللي أنت عايز تخش بيه
طب إيه هدف الجمعية؟ إن انت بتاخد الرقم الكبير ده وقت ما تقبض وممكن تحطه في استثمار أكبر شوية ، أو تبتدي في حاجه أنت مكنتش عارف تبتدي بيها بالمبالغ الصغير دي فدي أول طريقة أنك تحط مبالغ صغيرة
طيب لو أنا مش عايز أعمل جمعية وعايز استثمر على طول أروح أعمل إيه؟ عندك صناديق استثمار بتقبل مبالغ صغيرة يعني صندوق الاستثمار هو هدفه اصلاً معمول إنك تستثمر في البورصة أو في السندات أو في الدهب أو في العملة المشفرة (كريبتو) أياً كان نوع صندوق الاستثمار اللي أنت بتفكر تخشه هو هدفه إنه يجمع الفلوس بتاعة الناس الصغيرة ويدخلها في استثمارات قريبة
وبرده ممكن من خلال حسابك في شركة سمسرة تقدر تشتري صنادق المؤشرات بالمبالغ الصغيرة دي ومع الوقت اصلاً المواضيع دي بتتحسن يعني بنلاقي الشركات بتقدم على طول حاجات للناس أنها تقدر تخش بمبالغ صغيرة فالأفكار كتير اللي أنت ممكن تعملها أنت بس حدد الفئة بتاعتك اللي أنت عايز تخشها وتبتدي
العقار برده من الحاجات اللي أنت ممكن تحط فيه مبالغ صغيرة كل شهر لأن احنا النهاردة لقينا إن في حاجات بتدي أقساط مثلاً على 10 سنين ، على 15 سنة وفي فبعض الدول بتوصل لـ 25 سنة مع إن سعر العقار بيبقى كبير جداً ولكن لما بتقسمه على 25 سنة في الفترة اللي احنا فيها الفوايد هي نوعاً ما فوايد واطية فبتلاقي الأقساط مبقتش كبيرة بالنسبة لحجم البيت في أفكار كتير على حسب أحتياج كل واحد
18:22
بيجيلي برده اسئلة كتير من ناس لسه في الجامعة ، سؤال منهم بيقول لو أنا طالب وبشتغل في الأجازة أقدر ازاي ابدأ استثمر من مرتبي؟
الميزة هنا أنك صغير يعني دي ميزة عني وعن ناس كتير بيسمعونا ، معناها إيه؟ أن أنت قدامك وقت في الاستثمار وأنت عرفت المعلومة إن انت ممكن تستثمر بدري ودي أهم حاجه في المعادلة بتاعتي دلوقتي حالاً مش فارقة معايا أنك تحط مبالغ كبيرة ، مش فارقة معايا إنك تستثمر كتير لأن أنت عندك وقت أكتر مني في الاستثمار وانت بتبتدي بدري حتى عني أنا مبتدش في الجامعة مثلاً فتبتدي ازاي ابتدي أنك تفتح الحسابات بتاعة الاستثمار بتاعتك ، تعرف أنت عايز تشتري في إيه ، إيه أدوات الاستثمار بتاعتك ، إيه فئة الأصول تعرّفها وتبتدي تفتح حساباتك ، بعد ما تفتح حساباتك تبتدي تحط جزء من مرتبك بتاع الصيف أو بتاع الشغل الجانبي اللي أنت بتعمله وتبتدي تاخد بالأرقام اللي هي هتعتبر صغيرة لأنك لسه في أول حياتك تاخد بيها مراكز معينة مثلاً في صندوق استثمار أو في محفظة متنوعة أياً كان الحاجه اللي أنت هتعملها وأعتقد دي البداية وفي خلال الرحلة دي أنت هتتعلم حاجات كتيرة جداً والميزة اللي عندك تاني مش عندي إن أنت بادي بدري عني
19:50
خطوات أعملها تجاه مستقبلي لو أنا لسه في الجامعة؟
ده برده من الاسئلة بتاعة الناس اللي بتيجي وهي في الجامعة ، الخطوات بتاعتنا تعملها وأنت في الجامعة أو تعلمها وأنت كبير أو تعملها في أي سن من وجهة نظري هي حاجه بسيطة يبقى عندك ميزانية ، تبقى فاهم بتصرف على إيه ، فاهم دخلك ازاي ، تستثمر الفائض من دخلك في أدوات استثمارية وبرده هكرر تاني في الجامعة بدري فعنده دراية مالية قبل معظم الناس اللي بتسمعنا فدي حاجه جميلة جداً وتبتدي تعمل الحاجتين دول ومع الوقت هتتعلم وهتعرف وهتقرا وهتسمع بودكاست وهتسمع ناس آرائهم في الحياة عاملة ازاي وتبتدي تشكل وجهة نظرك مع الوقت
20:43
الخاتمة
عاجبني جداً برده إن الاسئلة جاية من كل الألوان ومن كل الأعمار ، الناس اللي في الجامعة ، الناس اللي فبداية حياتها العملية ، ناس برده في منتصف حياتها العملية زيي مثلاً أو ناس اكبر شوية كمان.. أنا مبسوط ان التساؤلات بتاعة الناس إن البودكاست ده فتح اسئلة بالنسبالك كتير ، حاجه أنت عايز تسأل عليها أو مشكلة عايز تحلها فأتمنى ديماً تبعتولنا الأسئلة وأشوفكوا إن شاء الله في حلقة جديدة الاسبوع الجاي
Translation of some words and terms:
live sessions جلسات مباشرة
Passive Investing الاستثمار السلبي
Index Funds صناديق المؤشرات
Trusted موثوق به
Research بحث
balance sheets الميزانيات العمومية
Financial Crisis أزمة مالية
Invest استثمار
Time frame إطار زمني
Risk المخاطرة
Stocks أسهم
Bonds سندات
Financial Advisor مستشار مالي
Online Brokersالوسطاء عبر الإنترنت
Version إصدار
crypto currency عملة مشفرة
ETFs صندوق المؤشرات المتداولة
Equation معادلة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #ما_يسأله_المستمعون #اسئلة