18. أمناء الحفظ
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
أمناء الحفظ اسم بيتكرر كتير في المجال المالي ، وديماً بيبقى صعب على الناس بالذات اللي مش شغاله في المجال تعرف يعني ايه أمين حفظ وبما اننا أتكلمنا في الحلقة اللي فاتت على شركات السمسرة كان لازم على طول نتكلم على أمناء الحفظ
في حلقة النهاردة بنحاول مع ضيفنا العزيز أحمد قاسم نفهم أكتر يعني إيه أمين حفظ وإيه الخدمات اللي بيقدمها أمين الحفظ
أحمد قاسم
بكالوريوس في إدارة الأعمال المالية من الأكاديمية العربية للعلوم والتكنولوجيا
أحمد بيشغل منصل نائب الرئيس لخدمات الحفظ في بنك نيويورك – دبي BNY Mellon
: تقدروا تتواصلوا مع قاسم بطريقة مباشرة من خلال الرابط
: في هذه الحلقة
01:18 يعني إيه أمين الحفظ؟
04:04 هل لو روحت لشركة سمسرة وفتحتلي حساب هي تلقائياً بتفتحلي حساب مع أمين حفظ مظبوط؟
04:26 هل أمين الحفظ بيحميني من شركات السمسرة؟
06:27 أنا فتحت حساب السمسرة وبعدين فتحت أمين حفظ أنا كده خطواتي في الاستثمار ابتدت؟
06:58مع كذا سمسار وأمين حفظ واحد؟
07:45 ايه هم أنواع أمناء الحفظ؟
09:44 إيه اللي بيميز أمين حفظ عن التاني؟
10:34 أمين الحفظ بيعمل فلوسة ازاي؟
12:04 هل أمين الحفظ بيكون ليه دور في حاجة زي الكوبونات أو التوزيعات بتاعة الشركات؟
13:20 كأمين حفظ ازاي أحولك فلوس وازاي استلم منك فلوس؟
15:05 هل أقدر احول فلوس وأخد فلوس من الخزنة دي؟
15:49 لو اي حد عادي بيشتغل في الأسواق الوسيط بيساعدة ازاي؟
16:36 هل أختياري لأمين الحفظ بيكون صعب؟ يعني بأختار من عدد قد إيه؟
17:22 لو حد حابب يعرف أكتر عن الموضوع ده تنصحهم بإيه؟
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:43
مقدمة
اهلاً بيكوا في حلقة جديدة من بودكاست كلام ينور.. النهاردة أنا معايا أحمد قاسم ، أحمد عنده خبرة طويلة جداً جداً في شركات أمناء الحفظ وبما اننا أتكلمنا في الحلقة اللي فاتت على شركات السمسرة وايه الآليات اللي ممكن نحاول نفهمها اننا نبتدي نستثمر كنت عاوز اننا من بادري نتكلم على أمناء الحفظ أنا سعيد بوجود أحمد معايا النهاردة وأول حاجة عاوز أرحب بأحمد أزيك يا أحمد
زي الفل
01:18
النهاردة أنت معانا بقى علشان تاخدنا كده في حاجة اسمها أمين الحفظ ، أنا كنا بنناقش الحلقة اللي فاتت شركات السمسرة ومن الحاجات اللي لازم يبقى عندك فيها حساب أو عقد معين هو شركات أمناء الحفظ ، وأنت خبرتك طويلة في المجال ده فأنا قولت تيجي معانا النهاردة بحيث الناس اللي بتسمعنا تعرف ايه هو أمين الحفظ
بص أمين الحفظ ده بالظبط زي أكنك أخدت صندوق في خزنة بنك وبيبقى معمول عن طريق حساب وبيتحط فيه محفظة الأسهم بتاعتك بحيث ان ميبقاش في أي مخاطرة ان حد يبعلك الأسهم وياخد الفلوس وهو اللي بيتعامل المعاملات المالية بتاعة الأسهم
02:10
أوكيه.. يعني زمان مثلاً أنا فاكر أن البورصة أبتدت في الأول بالورق ، صح؟
بالظبط ، البورصة لما أبتدت ورق أمين الحفظ كان بيبقى أن هو بيروح يدفع الفلوس وياخد الورقة اللي بتثبت أمتلاكك للأسهم دي ، دلوقتي البورصة كلها حاجات إلكترونية مفيش ورق فاللي بيحصل ان أمين الحفظ بدل ما بياخد ورق هو بياخد رصيد أسهم ليك في السوق وقصاد كل رصيد لازم بتدفع فلوس هو بيروح يدفع فلوس للسوق وبيروح لشركات السمسرة يدفعلها العمولة بتاعتها ويخلي الأسهم دي فخلينا بس ناخد مثال إن عميل عنده أسهم وشركة السمسرة عندها انها ممكن تبيعله الأسهم دي وهو معملش المعاملة دي فبيجي هنا أمين الحفظ مجالوش تعليمات على الحساب بتاعك على المحفظة دي مش بيتمم المعاملة ميخليش الأسهم تطلع من محفظتك ولا بياخد الفلوس فهي دي شغلته هو بيأمن المحفظة بتاعتك وإن محدش يقدر يبيع من أسهمك وياخد الفلوس زمان كانت معظم المعاملات عن طريق شركات السمسرة يعني مكانش في أمين حفظ ، البورصة بتاخد فلوسها من الوسيط وانت بتدفع للوسيط دلوقتي لأ أختلف بأن أنت عندك أمين حفظ بتبعتله تعليماتك زي أكنك عندك حساب بنكي تبعتله التعليمات بتقول ان والله اشتريت من عمر شمس شركة إعمار تمنها 100 درهم فأنا بقوم جاي رايح لعمر فين الأسهم دي أنا شايف المعاملة في السوق آه اتنفذت معاك بقوم واخد المعاملة دي مدي للسوق فلوسه ومدي لعمر العمولة بتاعته وببعتلك رصيد يومي بكل الأسهم بتاعتك معايا
04:04
طيب لو أنا روحت لشركة سمسرة على طول وفتحتلي حساب هي تلقائياً بتفتحلي حساب مع أمين حفظ مظبوط؟
لأ ، أنت لازم تروح تفتح حساب مع أمين حفظ ولازم تروح تفتح حساب مع شركة سمسرة ، لما أنت بتفتح حساب مع أمين حفظ معناها إن شركة السمسرة مش هتقدر تعمل أي حاجه من غير أمين الحفظ
04:26
حلو ، يعني أنا ليه بسألك هنا علشان مثلاً لو حد خايف إن شركة السمسرة ممكن تتعامل على حسابه على طول أو من غير ما هو يعرف ممكن مثلاً حاجات تحصل ليها علاقة بالمخاطرة ، أنت أمين الحفظ أنت بتحميني صح؟
أنا بحمي أن مفيش حد يقدر يعمل معاملة غير بإذنك على حسابك وده ازاي أبتدت أمناء الحفظ.. دلوقتي أمناء الحفظ تطور بقى حاجات أكتر من كده يعني بمعنى في حاجه اسمها خدمات ما بعد الشرا والبيع اللي هي يعملك حساب المحفظة دي بتكسب ولا بتخسر ، بيطلعلك والله أنت بتتعامل مع شركات وساطة كذا وكذا بمبالغ مالية في الشهر كذا فتقدر تروح تتفاوض معاهم على أسعار أقل مثلاً في العمولات وبيساعدك أن أنت لو عاوز تستخدم الأسهم الموجودة في حسابك دي أنت مش عاوز تبيع وتشتري بس عاوز تطلع منها فلوس فأمين الحفظ بيساعدك إن أنت تسلف أو تستلف الأسهم دي علشان تطلع فلوس وتدورها من غير ما تبيع وتشتري
05:32
طيب يعني هو ابتدي زي الخزنة ، انه بيحفظلي الحاجه لأن زمان لو أنت عندك ورق حاطه في البيت ودي الأسهم بتاعتك في شركة فلان الفلاني لو واحد جه عليك وأخدهم وسرقهم يقدر يبعهم فأنت فقدت الملكية لما جه النظام الإلكتروني ساعد الموضوع شوية أن الموضوع يبقى محفوظ بس علشان أحفظه بطريقة مظبوطة بعيداً عن السمسار وبعيداً عن البورصة أتعمل الظيفة بتاعة أمين الحفظ
بالظبط ، مأنت أمين الحفظ ده اللي بيحميك من السمسار ، يعني السمسار حتى لو عمل غلطة من غير قصده مش لازم انه كان بيحاول يسرق ، عمل غلطة من غير قصده أنت مش هتعرف أنه عمل غلطة غير لو عندك أمين حفظ لأنه هيجي يقولك والله حصل معاملة الفلانية على حسابك في السوق الفلاني أنت تعرفها ولا متعرفهاش لو متعرفهاش هو بيحمل الوسيط الخطأ ده
06:27
طيب أنا فتحت حساب السمسرة عرفت ازاي أفتحه وبعدين فتحت أمين حفظ أنا كده خطواتي في الاستثمار ابتدت؟ يعني لما يبقى عندي الحاجتين دول هل اقدر ابدأ اشتغل على طول؟
أنت بتفتح أمين حفظ الأول وبعدين بتفتح السمسرة بعد كده وبعد ما تفتح السمسرة أنت تقدر تبيع وتشتري وحاطط فلوسك مع أمين الحفظ أنت بس بتعت لأمين الحفظ تقوله أنا أشتريت في الحتة الفلانية من فلان الفلاني وهو يجيبلك أسهمك
06:58
يعني ده معناه اننا ممكن أفتح مع كذا سمسار وأمين حفظ واحد؟
بالظبط ، أمين الحفظ بيفضل واحد بس في بلاد دلوقتي بدأت تتطور إن يبقى عندك أكتر من أمين حفظ بس دي بتقتل الفكرة بتاعة أمين الحفظ ، أنت فكرة أمين الحفظ أنك بتبقى عاوز أسهمك كلها في مكان واحد فمش هتبقى عاوز دي أحطها مع أمين حفظ HSBC مثلاً أو دي عاوز احطها مع CITI لأ الفكرة كلها أنك عاوز تحط أسهمك في مكان واحد بس عاوز تتعامل مع كذا سمسار
07:32
كذا سمسار ممكن سمسار يبقى كويس في الإمارات وواحد تاني كويس في مصر
مش بس كده مش عاوز تعرّف السمسار ده أنت مركز استثمارك فين ، لأن أنت لما تتعامل مع سمسار واحد هو بقى فاهم محفظتك ماشية ازاي
07:45
وده برده بيديني وجود أمين حفظ دولي أو عالمي بيساعدني اني أنوع السماسرة بتوعي.. طيب ايه هم أنواع أمناء الحفظ؟
بص هم في أمين الحفظ اللي بيبقى موجود في البلد اللي هو المحلي ده مثلاً لما بيبقى في صندوق تمويلي متخصص لدولة معينة بيتعامل معاه وفي صناديق تمويلية بتبقى شغاله على منطقة بالكامل أو شغاله على العالم كله على بورصة العالم كله ده بيروح لأمين حفظ دولي أو عالمي ، أمين الحفظ الدولي ده بيبقى عندك حساب ، الحساب ده فيه أسهمك في كل بلد في العالم وهو ده بتبعتله عن طريق حسابك المعاملة بتقوله أنا اشتريت في مصر من فلان الفلاني سهم كذا واشتريت في اليابان سهم كذا ميزة أمين الحفظ أنك مش محتاج ييبقى عندك رصيد يعني مثلا لو اشتريت مصري مش محتاج يبقى عندك مصري ممكن يبقى عندك دولار وهو اللي بيتكفل بتغيير العملة سواء في البيع سواء في الشرا وهو اللي بيتعامل في المعاملات المالية بتاعتك أنت بس بتراقب حساب واحد اللي هو الدولار
09:30
طيب يبقى كده نوعين واحد في بلد واحدة وواحد عالمي على كل العالم ، طيب أنا النهاردة لو ببتدي حياتي في الاستثمار وأنا راجل قاعد في الإمارات أو في مصر غالباً الأفراد هيروحوا للي هو بتاع الدولة الواحدة مظبوط ؟ لو أنت بتشتغل في سوق واحد يعني
الأفراد عمتاً مش بيروح أوي لأمناء الحفظ لأن أمناء الحفظ برده بيجي بتكلفة هو بيبقى للمحافظ المالية والمؤسسات المسؤولة عن الاستثمار بس في أفراد بحجم محفظة هم دول اللي بيروحوا لأمناء الحفظ
09:44
طيب أنا النهاردة إيه اللي يخليني أختار أمين حفظ عن التاني ؟ يعني مثلاً أنا عندي 5 أو 6 اسامي من المشهورين مثلاً في عالم أمناء الحفظ إيه اللي يميز أمين حفظ عن التاني من خلال الخبرة بتاعتك في المجال
أول حاجة الخدمات طبعاً ، المواعيد اللي تقدر تبعت فيها التعليمات وكده لأن بيبقى في مواعيد لكل سوق. تاني حاجة الأسعار ، أمين الحفظ بياخد أسعار على كل تعليمة أنت بتبعتهاله بياخد عليها سعر بياخد نسبة شهرية على الأسهم بتاعتك أخر كل شهر ، في طبعاً أمناء حفظ بتاخدها يومي في أمناء حفظ بتاخدها شهري ولما بتروح للدولي بيبقى أسعارة أغلى لأنه بيحفظلك في حساب واحد في كل العالم
10:34
يبقى السعر هو حاجة مهمة جداً ، وأمين الحفظ بيعمل فلوسة ازاي؟ من العمليات نفسها ومن حجم المحفظة بتاعتي في أخر الشهر مظبوط كده؟
بالظبط ، أخر كل شهر من حجم المحفظة ، وطبعاً بيعمل لو أنت سايب فلوس في حسابك بيستثمر هو زي أي بنك لما بتبقى سايب فلوس في حسابك حاططها وديعة بيعمل منها فلوس
11:02
طيب في إيه تاني ممكن أدور عليه ؟ السعر ، الخدمات حاجة زي التوقيتات
وعدد البلاد اللي بيغطيها لأن مش كله بيغطي كل البلاد. وطبعاً في الشركات الاستثمارية اللي هم المحافظ الكبيرة مش بيفكر بس في كده بيفكر برده أنت هتديله شهري بتقوله والله أنت كسبت ولا خسرت في المحفظة؟ المحفظة بتعمل قد إيه؟ تحليل للبيانات بتاعتك تحليل محفظتك بتخسر ولا بتكسب ، أنت واقف فين. حاجة بردة من الحاجات اللي بتميز أمين الحفظ عن أمين حفظ تاني قربه للسوق بمعنى أي تغيير في السوق بيقربك منه بيجي يقولك والله السوق ده المخاطر بتاعته أقل السوق ده المخاطر بتاعتة أعلى ، السوق ده هيطلع مثلاً من فئة معينة لفئة معينة فطبعاً قرب أمين الحفظ من السوق بتخلي العميل يروحله
12:04
في برده حاجه اللي هو الكوبونات أو التوزيعات بتاعة الشركات هل أمين الحفظ بيكون ليه دور فيها؟
دي بقى الخدمات بتاعة الرصيد الموجود ، أمين الحفظ بيديلك خدمات زي إيه؟ أي زيادة رأس مال في شركة بيجي يقولك في زيادة في رأس مال في شركة أنت محتاج تشترك فيها ، خدمات الكوبونات اللي بتدفع هو بيراقب الكوبونات وبيروح يتابع لحد ما يستلم الفلوس دي ويديهالك طبعاً لو أنت عاوز الرصيد بالدولار بيحولهولك بالدولار على حسب أنت عامل حسابك يبقى عامل ازاي عاوز مثلا في إجتماع جمعية عمومية وأنت عاوز تشترك بس مش قادر تروح بتبعتله وهو بيروح بالنيابه عنك وبيوافق أو يرفض أي بند من البنود الموجودة في إجتماعات الجمعية العمومية دي فهو بيعملك الخدمات زي كأنك أنت موجود أنت اللي ماسك الحساب بس هو بيديرهولك أنت مجرد بتبعتله التعليمات زي أكنك عندك حساب بنكي وبعت تعليمات ان أنت تحول فأنت بتبعتله أنا عاوز أشترك في الجمعية العمومية عايز أشترك في زيادة رأس مال ، بعت كذا اشتريت كذا ، هو اللي بيعملك كل حاجه أنت بس بتبعت التعليمات زي الحساب البنكي العادي بتاعك الشخصي
13:20
طيب أنت كأمين حفظ بقدر أحولك فلوس ازاي وازاي أقدر استلم منك فلوس؟
بص يا سيدي أمين الحفظ العالمي بيديلك حساب واحد عالمي وبيديك قائمة حسابات موجودة في كل بلد دي علشان تديها لكل الوسطى وبيديلك حسابات اللي هي فلوس هتشتري في بلاد ايه ، يعني مثلاً هتشتري في مصر هيديلك حساب مصري مش لازم يبقى فيه رصيد لو انت في الإمارات هيديك إماراتي والسعودية وهكذا بعد ما يديك القائمة دي أنت بتقرر بقى أنت عايز تتعامل في عملة واحدة اللي هي مثلاً دولار هو بقى بيغطيلك الباقي عن طريق الحساب بتاع الدولار أو انت بتحط على حسب انت عايز إيه ، بالنسبة لحساب الأسهم ده بيبقى حساب واحد عالمي فيه كل الأسهم والحسابات اللي هي لكل بلد اللي موجودة في الحساب دي أنت بتديها بس للوسيط عشان هو يبعت تعليماته قصادك مش أكتر
14:26
يعني ممكن نبسطها نقول مثلاً أنا عندي خزنة في كل دولة؟
خزنة في كل دولة الوسيط العالمي عاملهالك بس أنت بتشوف خزنة واحدة اللي هي الخزنة العالمية
14:43
دي اللي عندي اللي بشوفها في حسابي الأسهم كلها مع بعض ولكن بطبيعة الأمر أنا عندي عنوان في كل دولة؟
بالظبط عندك عنوان في كل دولة والوسيط بيوصل للعنوان ده
الوسيط ده اللي هو السمسار ، السمسار بقوله أنا أشتريت الأسهم الفلانية في الدولة الفلانية وديها في العنوان الفلاني
بالظبط
15:05
طيب وأنا برده أقدر احول فلوس وأخد فلوس من الخزنة دي يعني الخزنة دي بتشيل أسهم وفلوس
بالظبط بتشيل أسهم وفلوس
15:14
حلو جداً ، طيب أنا فتحت حساب السمسرة وفتحت أمين حفظ بقى عندي الخزن دي أنت كأمين حفظ بتبعتلي العناوين دي مظبوط؟
أنا ببعتلك كل العناوين بحيث إن أنت لازم تديها لكل الوسطى اللي أنت هتتعامل معاهم عشان يجيلك أسهمك وأنا اديهم فلوسهم لأن لو مجالكش الأسهم مش هديهم فلوسهم
15:36
طيب احنا هنا بنتكلم غالباً على المؤسسات أكتر مظبوط؟
هي بتبقى مؤسسات أو محافظ كبيرة يعني مثلاً مش محفظة 10 أو 20 مليون لازم تبقى مبلغ كبير
15:49
طيب الأفراد بقى لو انا وانت او اي حد بيشتغل عادي في الأسواق الطريقة اللي الوسيط بيساعدة فيها ازاي؟
الأفراد بيبقى فاتح حساب مع الوسيط ، بيشيل أسهمه مع الوسيط غير لو هو فرد بحجم مؤسسة
16:08
الوسيط هو اللي بيعملي دور أمين الحفظ وقتها؟
ساعتها آه الوسيط هو اللي بيعملك دور أمين الحفظ بيبقى أسهمك معاه وهو اللي بيجيبلك الكوبونات وبيعملك كل حاجه بس مش بيعملك برده شغل أمين الحفظ لأنه مش هيقولك في زيادة في رأس المال دي بتبقى حاجة معلونة في السوق أنت اللي لازم تدور عليها كعميل مش هيقولك في مثلاً إجتماع جميعة عمومية أنت اللي لازم تتابع مع نفسك
16:36
هل مثلاً في آلاف من أمناء الحفظ ولا عددهم قد إيه؟
يعني مثلاً في الإمارات عدد أمناء الحفظ المرخصين للإمارات بس 5 ، هو مش بيبقى أكتر من كده و 5 أصلاً كتير علشان السوق صغير طبعاً كل ما حجم السوق بيكبر كل ما عدد أمناء الحفظ بتكتر بس هي مش خدمة كل بنك بيقدمها
17:05
فأنا أختياري مش هيبقى صعب ، يعني معنديش مثلاً ألف احتمال أدور فيهم
هم 4 أو 5 الموجودين وهو عادة بيبقى 4 أو 5 حتى في كل سوق هم الكبار المعروفين وهم دول القريبين للسوق
17:22
طيب لو الناس عايزة تعرف أكتر عن الموضوع ده هل مثلاً تنصحهم يعملوا أي حاجه ، يقرأ أكتر في الحتة دي أو يعرف أي حاجة
لازم أول حاجة أن أنت تقرأ إيه أمين الحفظ وهيقدملك إيه وهيعملك إيه دي حاجة ، الحاجة التانية علشان تعرف قائمة أمناء الحفظ الموجودين في أي بلد هتروح على الموقع الخاص بالسوق تبص على القائمة هتلاقيها على طول بطرق الاتصال بكل حاجة
17:54
الخاتمة
طيب تمام ، ميرسى جداً جداً يا أحمد والله على وقتك النهاردة معانا ومش عارف أقولك هو ديماً الموضوع بيبقى صعب للناس بالذات اللي مش شغاله في المجال يعرف يعني ايه أمين حفظ بس هي اسم بيتكرر كتير في المجال ده فشكراً انك حاولت تساعدنا النهاردة اننا نفهم أكتر يعني إيه أمين حفظ ميرسي جداً.. شكراً
Translation of some words and terms:
Risk مخاطرة
Physical مادي
Directly بشكل مباشرة
Automatically تلقائياً
Direct مباشرة
Function وظيفة
Local محلي
Funds صناديق تمويلية
Regional إقليمي
Global دولي أو عالمي
Category فئة
List قائمة
Custodian أمين حفظ
Contacts جهات الأتصال
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #أمناء_الحفظ #أمين_حفظ